Милостію Божьею, мы, князь Юрей Лингвеневичъ, съ моею кнегинею Софіею и съ нашимъ сыномъ княземъ Иваномъ.
      Посмотрѣли есмо на листъ отца нашого, князя Семена Лингвеня, што поставилъ церковь во имя святого Онофрѣя на рѣцѣ Напотѣ и монастыръ устроилъ общежителный, и подавалъ люди къ тому монастыру, съ пашнями и сѣножатми, и данники съ данью медовою, и съ бортными землями, и съ серебряною данію, съ бобровыми гоны, и со всими приходы, што къ тымъ зѣмлямъ и пашнямъ прислушаеть вѣрно.
      И мы того ничего не рушили отца нашого приданья, еще есмо милостію Божьею и придали къ тому жъ монастыру, къ святому Онофрѣю, село Головчино, а другое село Колесниковское, съ людми, и съ пашнями и сѣножатми, и со всими приходы, што къ тымъ прислушаеть селомъ.
      А отца нашого приданье, князя Семена Лингвеня, Селце, близко монастыра святого Онофрѣя, съ людми, съ пашнями и сѣножатми, и село Комаровичи, съ данники, съ медовою данью и съ серебрянною, и съ бобровыми гоны, и со всими приходы, што къ тымъ землямъ и пашнямъ здавна прислушаеть.
      Ино што отецъ мой, князь Семен Лингвень, люди и данники [подавалъ], и я, князь Юрей Лингвеневичъ, еще придалъ к тому людей и данники к монастыру святого Онофрѣя: и тыхъ людей монастырскихъ нашимъ намѣстникомъ и тивуномъ и всимъ нашимъ заказникомъ не судить, ани рядить, [с. 58] ни дѣтскихъ не посылать. А на наше дѣло ни на которое не ходить, ни съ сохою, ни съ серпомъ, ни съ топоромъ, и ни подводъ у тыхъ людей не имать. А дачъ на насъ у нихъ никоторыхъ не имать, ни серебщизны, ни ямщины, и никакихъ наметовъ на ихъ не метать, ани вѣсчого, ни помѣрного, ни повозного, никакихъ пошлинъ нашимъ заказникомъ съ тыхъ людей монастырскихъ не имать. Вѣдати тыи люди монастырскіе архимандриту святого Онофрѣя, который коли будетъ служить у святого Онофрѣя. Судить ему и рядить тые люди самому и вси тые дани и дачи и пошлины имать на нихъ, людехъ монастырскихъ, ижь што вышей написаны въ семъ листу, архимандриту Онофрѣевскому.
      А коли митрополитъ поѣдетъ мимо монастыра светого Онофрѣя, ино митрополиту того архимандрита Онофрѣйского не судить, ани рядить, и ни подводъ ему у монастырскихъ людей не имать.
      А владыка который коли будетъ епископію Мстиславскую держать, ино тому владыцѣ того архимандрита Онофрѣйского не судить, ани рядить. Коли кому будетъ до него которое дѣло, ино намъ самымъ того архимандрита Онофрѣйского судить. А будетъ владыцѣ до него дѣло духовное, ино намъ самымъ же со владыкою того архимандрита досмотрѣть.
      А владычнымъ десятникомъ и городскимъ тыхъ людей монастырскихъ въ духовныхъ дѣлѣхъ не судить, ани рядить, и дѣтскихъ не посылать, и винъ не имать на владыку: што въ свитку Ерославли стоить, судить и рядить и вины имать въ духовныхъ судѣхъ на тыхъ людехъ монастырскихъ самому архимандриту, который будетъ служить у святого Онофрѣя.
      А коли будетъ которому человѣку нашому дѣло до монастырского человѣка, ино нашимъ намѣстникомъ и тивуномъ тыхъ людей судить съ архимандритомъ Онофрѣйскимъ. А коли будетъ нашъ человѣкъ правъ, ино пересудомъ дѣлятся наполъ съ архимандритомъ, а вина на монастырскомъ человѣцѣ архимандриту. А будетъ монастырскій человѣкъ правъ, ино увесь пересудъ архимандрита, а вина на нашемъ человѣцѣ намъ.
      Данъ во Мстиславью, лѣта шестьтысячного девятсотъ пятдесятъ первого, индикта шестого.

У того листа печать на шнурѣ едвабномъ червономъ завѣсистая одна.

      [л. 501] М(и)л(о)стию Божъею мы, княз Юреи Лынкгвиневичъ с моею кнегинею Софиею и з нашымъ сыномъ княземъ Иваномъ.
      Посмотрели есмо на лист отца нашого, князя Семена Лынкгвеня, што поставилъ церков во имя светого Ѡнофрея на Напоти и манастыр устроилъ ѡбщежытельныи и прыдавалъ люди къ тому манастыру с пашънями и сеножатми и з данъю и з бортъными землями, и з сребраною данью и з бобровыми гоны и со всими прыходы, што к тымъ землямъ и пашънямъ прыслушает, вечно.
      И мы того ничого не рушыли ѡтца нашого прыданъѧ, еще есмо м(и)л(о)стью Божею и прыдали к тому жъ манастыру, к светому Ѡнофрею, село Головчыно, а другое селце Калениковское з людми, и с пашнями и сеножатми, и со всими прыходы, што къ тымъ селамъ прыслушаеть.
      А ѡтца нашого прыданье, князя Семена Лынкгвиня, Селце, близко манастыра с(вя)того Ѡнофрея з людми, с пашънями и сеножатми а село Комаровичы з данъники, с медовою данью и среребраною [sic] и з бобровыми гоны и со всими прыходы, што к тымъ землям и пашням здавна прыслушает.
      Ино што ѡтецъ мои, кнѧз Семенъ Лынъкгвинии, люди и данъники, и я, княз Юри Лынкгвиньевич, еще прыдавалъ к тому люди и данъники к манастыру с(вя)того Ѡнофрея, тых людеи манастырских н(а)шым наместникомъ и тивуномъ и всимъ нашым законъникомъ не судити ани радити и децкихъ не посылати. А на нашо дело ни на которое не ходити ни з сохою, ни з серпомъ, ни с топором, [л. 501 об.] и ни подвод не имати. А дачъ на нас у них никоторых не имат, ни серебъщыны, ни подымъщыны, ни ямъщыны. Никаких метов на нихъ не метать, ани вещого, ни померъного, ни повозного. Никаких пошлинь нашымъ заказникомъ с тых людеи манастырских не имать. Ведати тыи люди манастыръские аръхимандрыту светого Ѡнуфрея, которыи коли будетъ служыть у с(вя)того Ѡнофрея. Судити ему и радити тыи люди самому и вси тые дани и дачы и пошлины имать на них, людех манастыръских, што вышеи написаны в сем листу, архиманъдрыту ѡнофреевскому.
      А коли митрополит поедетъ мимо манастыръ светого Ѡнуфрея, ино митрополиту того архиманъдрыта ѡнофреевского не судати [sic], ани радити, ани подвомъ [sic] ему у манастырскихъ людеи не имать.
      А владыце, которыи коли будетъ епископию Мстиславскую держать, ино тому владыцѣ того архиманъдрита ѡнофреевского не судит ани радить. Коли кому будет до нег которое дело, ино намъ самымъ того архиманъдрита ѡнофреевского судит. А будет владыце до него дело духовное, ино намъ самымъ же со владыкою того архиманъдрита досмотреть.
      А владычнымъ десятинникомъ городскимъ тых людеи манастыръских в духовных делех не судити ани радити, и децких не посылати, и винъ не имати на владыку, што в Свитку Ярославли стоит. Судити и радити и вины имат в духовных судех на тых людех манастырскихъ самому аръхиманъдриту, которыи будет служыт у с(вя)того Ѡнуфрея.
      А коли будет которому чоловеку нашому дело до манастырского чоловека, ино нашым наместникомъ и тивуномъ тых людеи судит со архиманъдритом ѡнуфрыевъскимъ. А коли будетъ нашъ чоловек прав, ино перед судом делитисе напол со архимандрытомъ, а вина [л. 502] на манастырскомъ чоловеку архимандрыту. А будет манастыръскии чоловекъ правъ, ино въ всем перед суд аръхимандрыту, а вина на нашомъ чоловеце намъ.
      Данъ во Мстиславю, лета шесттисечного девятсотъ шестдесят первого, инъдыкта первого.

У того листу печать на шнуре едвабномъ черъвоном завестая [sic] ѡдна.