Панъ Валентый Яновичъ, а панъ Юрій, а Петръ, а Андрей Станиславовичи, а Миколай Яновичъ Кголимонты покладали передо мною листъ зашитый славное памети его милости Казимера королевича, писаный до намѣстника Каменецкого, на имѣнье свое село Узводъ, который такъ ся въ собѣ маеть:

      Отъ великого князя Казимера королевича намѣстнику Каменецкому пану Пацу.
      Што дали были есмо Лисцѣ зъ братомъ Узводъ подъ Кголимонтомъ, и нынѣ отняли есмо отъ Лиски Узводъ и дали есмо опять Кголимонту Узводъ вѣчно и непорушно. А ненадобѣ подъ нимъ никому искати.
      А писанъ у Пуни, августа 31 день.
      Самъ господинъ великій князь.

      За тымъ листомъ съ того имѣнья пановъ Кголимонтовъ села ихъ Узвода входы къ дереву бортному и сѣножатемъ у пусчу его милости господарскую Бѣловижскую, на рѣчцѣ Наровцѣ, подлѣ границы пана Горностаевыхъ людей Минковскихъ и подъ границы Ходосовское, Каменецкое и на Дубинахъ дерево сумежъ зъ деревомъ бортнымъ князя бискупа Луцкого Морозовское. Тое пусчи удолжъ двѣ мили, а впоперекъ три мили. А на рѣчцѣ Наровцѣ избы и сѣножати.