Б(о)жею м(и)л(о)стью...¹ [на]шего великог королѧ Ѡндрѣя Казимира, Польскои Короуны ѡсп(о)д(а)рѧ и Ве[ликого кня]|цьста² Литовьског, Роуского и Жомоитьског и иных многих земль ѡсп(о)д(а)рѧ его м(и)л(о)сти здровьем. Мы, кн(я)зь Ю|рьи Лынквеневич, чынимъ знаменито симъ нашым листом каждому доброму нынешним и потомъ бу|доучым, кто нань оузрить или хто оуслышит его чтучы, кому его будеть потребно.
      Оузревшо есмо его | знаменитую слоужбоу, к намъ никды неѡмешканоую, нашего вѣрнаго слоуги, боярина [на]шего Воронца, | и мы, дорадившы с нашою радою, дали есмо ему и записали во Мстивьском³ повѣте село Гридково, што | было за Першком было [sic] да Наричыно.
      А к тому есмо ему придали Волкович садовника а Василца, а во | Мглине дали есмо боярину нашему Воронцоу Манюкову землю.
      А тыи села дали есмо и записали бо|ярину нашему Воронцу с людми, и з бортники, и с сободичы⁴, и с пашными землѧми, и з бортными зе|млѧми, и с сеножатми, с медовыми данми, и съ серебрѧными, з бобровыми и с коуничными, и со всимї | оуходы и приходы, што к тым селамъ истарадавна слушало и тѧгло, с лесы, с лоуги, и з дубровами, с ре|ками и з бобровыми береги и ставы, со всими правы, со всими пожытки, ничег на себе не выменѧючы, | можеть собѣ полепшывать и примножыть и рошырить и на нове посадить.
      А дали есмо и запи|сали та имѣ[нья] нашему вѣрному слузѣ Воронцу, ему самому на веки вѣчно и непорушно, его жонѣ и де|[тем]...¹.
      А нашему боярину Воронцу служыти ему нам вѣрно и нашему с(ы)ну.
      А намъ боярина на|[шего]...¹ вины не казнити а з ыимѣня не рушыть.
      А не [всхо]чет⁶ ли Воронець намъ слу|жыть ил[и]...⁷ ...вот его жона или ег дѣти, ино тая имѣн...⁸ нашег с(ы)на.
      А намъ самим| и нашему с(ы)ну оу люди боярина нашег Воронцовы не вступатца, а посощины не брать, а мету не метати, | а яловиць не брать, а емщыны не имать.
      А нашым намѣстником и тиоуном, инымъ нашым оурѧдником | оу пана Воронцовы люди не оуступатца, децких не довать а не судити. Соудити и рѧдити свои люди | боярину нашему Воронцу самому.
      А про лепшое свѣдоцтво и про [паме]ть⁹ казали есмо и печат нашу привѣ|сит.
      Дан  во Мстиславли, м(е)с(я)ца< ноембрия, в лѣт 6000-ное 960-ное... [4-е], индикта 4.

¹ Выпалъ кусокъ изъ пергамена. ² Должно быть: великого кнѧжества. ³ Должно быть: Мстиславьском. ⁴ Должно быть: слободичы. [В. А. Воронин читает "слободичы"]. ⁵ Вѣроятно: имѣньѧ. ⁶ Вѣроятно: всхочет или похочет. ⁷ Вѣроятно: или по жывоте. ⁸ Не разобрано. ⁹ Другіе читаютъ: и твердость.

На обороте позднейшая запись (прочитана П. А. Гильтебрандтом): "На рокох судовых земских Михаловских року 1602 м(е)с(я)ца ноѧбра 4 дня его м(и)л(о)ст панъ Миколай Воронецъ тотъ привилей у суду покладалъ и до актикованья до книгъ подалъ. Алѣксандер Каменский судя, Ѧн Чудовский подсудок, Ѧрош Воловичъ писар земский Мстиславский".