Панъ Шимко Сопотко покладалъ передо мною два листы: оденъ славное памети его милости короля и великого князя Казимера на землю Ясуду <...> Первый такъ ся въ собѣ маеть:

      Самъ. Казимеръ Божею милостью король польскій, великій князь литовскій, рускій, княжа пруское, жомоитское и иныхъ. Маршалку нашему, намѣстнику Городенскому, пану Станку Судивоевичу.
      Просилъ у насъ Васко Александровичъ, ключникъ Городенскій, [с. 173] земли у Городенскомъ повѣтѣ, што былъ небожчикъ панъ Андрей Довойновичъ отрубилъ пусчи Ясуду Радунцу. То пакъ дей Ясудъ тую землю держалъ, а потомъ кони покралъ. И в томъ ся самъ обѣсилъ. А осталася въ него жона и дѣти. А отчина дей того Ясуда у Радуни. И вжо дей ему и договоръ былъ зъ Ясудовою: мѣлъ ее¹ десеть копъ грошей дати.
      Прото ж нынѣ тую землю, што тотъ Ясудъ держалъ, дали есмо Васку ключнику Городенскому со всимъ съ тымъ, какъ тотъ Ясудъ держалъ, а онъ десять копъ грошей маеть дати той Ясудовой.
      А которые поля или сѣножати будеть Ясудовая попродавала, маеть она выкупати тыми грошми. А повыкупивши все, нех дей идеть она съ своими дѣтьми на отчину того Ясуда къ Радуню. А въ тую землю вжо большей того ненадобе уступати ся ее и тымъ дѣтемъ ихъ.
      Писанъ у Берестьи, іюнь 3, индиктъ 8.
      Пн Мх во вл кн пн Гор².

¹ Ее - так в публикации. ² Так в публикации: П(а)н М(и)х(аил), во(евода) В(и)л(енский), кн (?) пн (?) Гор (?).