Свитокъ Ярославлъ.
      Се аз, княз  Ярославъ, нареченныи во св(я)том крещении Геѡргии  Владимерович, съ совитом¹ преѡсвещеннаго митрополита  | киевского Илариѡна и въсѣх  боголюбивых  епископовъ русийских  княжения нашего судих  написати  | сия номоканоны и свиток  соблюдения ради ѡпасного правил  св(я)тых  апостол  и святых  богоносных  | ѡтец, да не попираемы будут ѡт  неискусныхъ.
      Прежде убо всѣх  всѣ епископы княжения нашего, его же  | нам  Господъ покори, да повинуются преѡсвещенъному митрополиту киевскому во всем  под  изверженъемъ | ѡт  сана и ѡтринутием  ѡд  престол  их, чесому властелем, сѣрич  князем, боляром  и судиям  нашим  не супроти|вълятися, но пособъляти под  залогом  на церковъ соборную Киевъскую двох  тисячей  рубълеи  гро|шеи  широких.
      Такожде митрополя и епископъская власт  цела и нерушима да пребудет  над  всѣ|ми презвитери во предѣлех  ихъ сущими и не имет² никто з мирских  князеи  и боляр  заступати | ни единаго презвитера в каковом  любо дѣле ѡт  епископа, во его же предѣле церковъ имат, под  за|логом  тисячи рубълей  грошеи  широких  на церковъ соборную, в неи  же пребывает  епископъ и погу|блением  ктиторства.
      Браку всякого сана людеи  да не дерзнетъ никто судити, ниже разво|дити ѡт  мирских  властелей  под  залогом  на церковъ соборную епископъскую пяти сот  рубълей  | грошии  широких. Сии  бо суд  ест  епископъскии.
      Аже кто ѡт  чеснеиших  н(а)ших  боляр  во браце блудном  | живущи ѡбращется, сѣрич  аще муж  имый  жену живую, ину поимет, жена же видущи ѡ же|нѣ его прежнеи, яко жива ест, за него поидет, сия ѡбоя давъши залога на церковъ соборную ти|сящу рубълеи  грошеи  широких  развестися имут  и жити во покаянии. Аще ли же не восхощут, ино их  мирская власт  судити и казнити имат  по своему суду, повелевъши им  воздати за|логъ ѡнъ на церковъ соборную.
      Аще ли же кто ѡт  людеи  простых  ѡбращется живя во бра|це беззаконом, сих  епископъ по суду своему да казнит  залогом  елико возможно или иною каз|нию и ѡт  [ѡ]бщаго сожития их  развести и ко первому браку их  причитати, поучивши их, да живут  во покаянии.
      Аще ли же кто ѡт  сановитых  во блуде яве живет  да престанет  ѡт  блуда, | на церковъ соборную да даст  вины пят  сот  рубълеи  грошеи  широких.
      Аще ли же прост  человек, мужъ | или жена, ѡбращется яве тож  творя, да разведеться и залога на церковъ соборную да даст  | два рубъля грошеи  широких.
      Во всемъ княжении нашом  да искоренится всяк  беззаконенъ | бракъ и блуд, тѣм  же преѡсвещенныи  митрополит  и боголюбивыи епископы да посылают  | кождо³ во пределе своем  смотрити сего, и аще где таково беззаконие ѡбращется, исправляти, | яко же пред  написашася.
      Сия вся суды церковъ да судит  такожде и еретичество; князем  ж[е и] боляром  и судиям  в тые суды не вступатися и во иныя вся, яже сут  написана во пра|вилех  св(я)тых  апостол  и св(я)тых  богоносных  ѡтецъ и в  сих  номоканонех  наших  под  залогами пяти|сот  рублеи  грошеи  широких.
      Написан  же быст  свиток  сеи  номоканонов в лето ѡт  создания мира  6540.

¹ АЗР-1. совѣтомъ. ² АЗР-1. имать. ³ АЗР-1. кійждо.

Оригинал неизвестен.
Копия 1. По сообщению И. И. Григоровича, записана в 6-й книге Литовской Метрики, лл. 88-89 (номер книги, видимо, указан ошибочно).

Публикации (по копии 1): Белорусский архив древних грамот (1507-1768 гг.). Ч. 1. М., 1824. С. 3-7, № 3; Акты, относящиеся к истории Западной России, собранные и изданные Археографическою комиссиею. Т. 1. 1340-1506. СПб., 1846. С. 189-190, № 166-I. - Электронная версия сделана по АЗР-1.

      Привилей митрополиту Киевскому зъ стороны справъ духовныхъ Греческого закону.
      Самъ Александръ. Во имя Божее, аминь.
      Чинимъ знаменито симъ нашимъ листомъ, хто на него посмотритъ, або, чтучи, его услышитъ, нынѣшнимъ и потомъ будучимъ, кому будетъ потреба того вѣдати.
      Клалъ передъ нами нареченый митрополитъ Кіевскій и всея Руси, епископъ Смоленскій Іосифъ списокъ, то есть свитокъ правъ великого князя Ярослава Володимеровича, которые жъ онъ права духовные выложилъ съ правъ духовныхъ греческихъ, то есть зъ Номоканону восточноѣ церкви, и тые права въ свитку выписалъ и заказалъ, абы тыхъ дѣлъ и доходов церковныхъ, и судовъ духовныхъ нихто отъ свѣтскихъ не смѣлъ судити и рядити. И полѣтилъ вси тые дѣла духовные въ моцъ митрополита Кіевского и всея Руси, хто коли будетъ митрополитомъ, и тежъ въ моцъ епископовъ тыхъ, которые суть подъ митропольею вышереченною Кіевскою, ино дей нѣкоторыи князи, и панове, воеводы, старосты, намѣстники и тивунове наши, державцы городовъ, мѣстъ, и волостей нашихъ церкви Божьей и митрополиту и епископомъ кривду чинивали, въ доходы ихъ церковные и суды духовные вступывалися, тые справы ихъ митропольи и епископскіе сами справливали. И билъ нам чоломъ митрополитъ Іосифъ, абыхмо тую уставу великого князя Ярослава, то есть свиток, выпис съ правъ духовных греческихъ, ухвалу духовенства обычая восточноѣ церкви нашимъ листомъ потвердили.
      И мы, посмотрѣвши у тотъ свитокъ Ярославль, обачили есмо, ижъ онъ вси справы духовные полѣтилъ в моцъ и справу митрополиту и епископомъ надъ поддаными тыми всими, которые суть греческого закону, на вѣчные часы зъ ласки нашое тое право, которое жъ выписано въ свитку Ярославли, потвержаемъ симъ нашимъ листомъ нареченному митрополиту, епископу смоленскому Іосифу и всим епископомъ в отчинѣ нашой, Великомъ князьствѣ Литовскомъ и въ панствахъ нашихъ Рускихъ.
      Мает митрополит Іосифъ и по нем будучыи митрополиты и вси епископы, которые жъ подъ митропольею Кіевскою, судити и рядити и вси дѣла духовные справовати, хрестіянство греческого закону подлѣ тыхъ правъ, выпису того свитка Ярославля, на вѣчные часы.
      И приказуемъ, абы князи и панове наши римского закону, такъ духовные, какъ и свѣтскіе, и тежъ воеводы, старосты и намѣстники, такъ римского закону, какъ греческого, и тивуны, и вси заказники, державцы по городомъ нашимъ, и тежъ по мѣстомъ нашимъ войтове, бурмистрове и радцы, тые, которые здавна отъ продковъ нашихъ права мають Майтборскіе, и тежъ вже которымъ мы тые права нѣмецкіе подавали, и напередъ еще которымъ инымъ мѣстомъ нашимъ тое право зъ ласки нашое дадимъ, кривды церкви Божьей и митрополиту и епископомъ не чинили, въ доходы церковные, и во вси справы и суды ихъ духовные не вступалися. Вже тые вышей писанные державцы наши не маютъ въ тые дѣла духовные вступаться, бо есмо приказали митрополиту и епископомъ судити и рядити, и дѣла духовные справовати, и люди церковныи завѣдати подлугъ давного обычая по городомъ и по мѣстомъ нашимъ.
      Тежъ которые люди митропольи або владычнины сѣдятъ по мѣстомъ нашимъ, а въсхотятъ торгомъ ся обыходити, тые поплатки наши маютъ намъ платити посполъ зъ мѣстомъ нашимъ по давному.
      И тежъ которые князи и панове наши римского закону маютъ по своимъ имѣньям церкви закону греческого, и здавна будетъ которая церковъ поданье митрополье або владычне, тая и теперъ нехай будетъ церковъ ихъ поданья. Естли бы жъ которая церковъ была въ поданьи здавна державцы того имѣнья, ино и теперъ нехай тот державца подаетъ зъ благословеньемъ митропольимъ, нижъли вже не маетъ моцы того свещенника отъ тоѣ церкви рушити безъ осмотрѣнья и воли митрополичоѣ оный державца.
      Тежъ свещенника руского, если бы хто соромотилъ, або збилъ, так отъ римскоѣ вѣри, как отъ греческоѣ, маетъ того дѣла смотрѣти митрополитъ або епископъ, бо то есть судъ духовный.
      И иныи вси члонки, которые выписаны у свитку Ярославли, и въ семъ нашомъ листу, потвержаемъ на вѣчность митрополиту Іосифу и потомъ будучимъ митрополитомъ и всимъ подъ его митропольею епископомъ симъ нашимъ листомъ. Маютъ они тые духовные дѣла справовати подлѣ обычая своее церкви, по давному.
      А на лѣпшую твердость и печать нашу казали есмо привѣсити къ сему нашому листу.
      Писан у Вилни, лѣта Божьего тысеча чотыриста деветьдесятъ девятого, марта двадцатого дня, индикта 2.
      При томъ был охмистръ, намѣстникъ ковенскій пан Войтко Яновичъ.

Оригинал неизвестен.
Копия 1. Российский государственный исторический архив (бывший ЦГИА СССР). Ф. 823. Оп. 1. № 8. Копия начала XVI в.
Копия 2. Российский государственный архив древних актов. Ф. 389 ("Литовская метрика"). Оп. 1. Д. 5 (5-я книга записей), л. 112 (копия конца XVI в.).

Основные публикации: Сборник Муханова. М., 1836. С. 134-135, № 84 (со ссылкой на 6-ю книгу записей ЛМ, с. 196-198); Витебская старина. Т. 1. Витебск, 1883. С. 36-38; Русская историческая библиотека. Т. 27. Литовская Метрика. Отдел 1. Часть 1: Книги записей. Т. 1. СПб., 1910. Стлб. 830-833, № 249 (по копии 2); Древнерусские княжеские уставы XI-XV вв. / Подг. Я.Н. Щапов. М., 1976. С. 191-193 (по копии 1). - Электронная версия сделана по изданию Я. Н. Щапова. Кириллические цифры заменены на арабские.

      ^1-Того ж свитка потвержене Александрово.^-1
      Александер², Божю милостию ^3-великии княз литовский^-3, во имя Божее. Амин.
      Чиним  знаменито | симъ ^4-листом нашим^-4, хто на него посмотрит, або, чтучи, его слышит, нинешним  и потом  будучим, кому | будет  потреба того ведати.
      Клал  перед  нами архиепископъ полоцкий  и витебский  Лука списокъ, | то естъ свиток  права великого князя Ярослава Володимеравича, которое ж  ѡн  права ду|ховные выложилъ с правъ духовъных  грецъких, то ест  з Номоканону восточное церкви, и тые | права [арк. 1 адв.] в свитку выписал  и заказал, абы тех  дел  и доходов  церковъных, и судовъ духовъных  нихто ѡт  свецъких  не смел  судити и радити. И полецил  всѣ тые дела духовъные въ архиепископии | Полоцъкии в моцъ архиепископа полоцъкого и витебъского, хто коли будет  архиеписко|пом, тыи, которые сут  под  архиепископъю вышеи  речоною Полоцкою: ино деи  никоторые кня|зи, и п(а)нове, и воеводы, и старосты, и намесники, и тивуны наши, державъцы городов, и мест, | и волостеи  наших  церкви Божеи архиепископу кривду чинивали, в доходы их  церковъныи | и в  суд  духовныи  вступовалися, тыи справы их ^5-архиепископъ и мы^-5 сами справовали. | И билъ нам  чолом  архиепископъ полоцкий Лука, абыхмо тую вставу великого князя | Ярослава, то ест  свиток, спис справъ духовъных  греческих, ухвалу духовенства ѡбычая | восточное церкви н(а)шим  листом  потвердили.
      Ино мы, посмотревъши в тои  свиток  Ярославълъ, | ѡбачили есмо, иж  ѡн  всѣ права духовные полецил  в моцъ и справу архиепископу по|лоцкому над  поддаными тыми всѣми, которые сут  под  архиепископиею Полоцкою | грецкого закону, на вечные часы с ласки нашое тое право, которое ж  выписано въ свитку | Ярославлю, потвержаем  сим  нашим  листом  архиепископу полоцкому и витебъскому Луце и | иным по нем  будучим архиепископом  полоцъким.
      Мает архиепископъ Лука и по нем  буду|чыи архиепископы полоцкии судити и радити и въсѣ дела духовъные справовати  | хрестиянство грецъкого закону подле тых  прав  выпису того свитка Ярославъля вечно | на веки веком.
      И приказуем, абы князи и панове наши римского закону, так  духовъ|ные, какъ и свецкие, и теж  воеводы, и старосты, и наместники, такъ римского закону, как и грецкого, и тивуны, и всѣ заказники, державъцы по городом  нашим, и теж  по местом  нашим  войтове, и бурмис|трове, и радцы, тые, которым  мы права немецкие подавали, и напред  еще которымъ и иным  местом  нашим тое право з ласки нашое дадим, кривды бы церкви Божеи  и архиепис|копу не чинили и в  доходы церковные, и во все права, и в  суды их  духовъные не вступовалися. | Вже тые вышеи  писаныи державъцы наши не мают  в тые дела духовные вступоватися, | бо есмо приказали архиепископу Луце судити и радити, и дела духовные справовати, | и люди церковъные заведати подле давъного ѡбычая по городом  и по местомъ нашим  | архиепископии Полоцъкое.
      Так теж, которые люди архиепископии седят  по местом  на|шим, а всхотят  торгом  ся ѡбходити, тые попълатки наши мают нам  платити поспол  з местомъ | нашим  по давъну.
      И тые ж, которые кн(я)зи и панове наши римского закону мают  по своим  именям  | церкви закону греческого, и здавъна будет  которая церковъ в подане архиепископъское, тая | и тепер  нехаи  будет  церковъ его поданъе. А если бы которая церковъ была в подани здавна | того именя державъцы, ино и тепер  нехаи  тот  державъца подает  зъ бл(а)гословенъем архиепис|копиим, нижли вжо не мает  моцы того св(е)щенника ѡт  тое церкви рушати без  ѡсмотреня и | воли архиепископъее ѡныи державъца.
      Теж  свещенника руского, если бы хто соромотил, | або збил, так ѡт  римское вери, как  и ѡт  грецкое, мает  того дела смотрети архиепископъ, бо | то ест  суд  духовъныи.
      И иныи  всѣ члонки, которые вышеи  писаные у свитку Ярославли, и в  сем  | нашом  листу потвержаем  на вечность архиепископу полоцкому Луце и по нем  будучим  архи|епископом  полоцъким  сим  нашим  листом. Мают  ѡны тые дела духовъные справовати подле ѡ|бычая свое церкви, по давъному.
      А на твердост  того и печат  н(а)шу казали ес[мо] привесити к сему | нашому листу. Писан  у Вилню в лето сем  тысячное ѡдинадцатое, м(е)с(я)ца декабра 26 днеи, | индикта 6. При т[ом] был  мар(шалок), нам(естник) полоц(кий) пан  Стан(ислав) Глебович, а мар(шалок), ѡх(мистр) королевое, намес(тник) ковен(ский) | панъ Воїт[ех]ъ Янович.

^1-1 LM-5. Подтверженье владыце полоцкому порядков и справ с канонов церковных, выписаных через великого князя Ярослава Володимеровича. ² LM-5. Сам Александр. ^3-3 LM-5. нет. ^4-4 LM-5. нашим листом. ^5-5 LM-5. архиепископъскии.