Село Судиловичы, то есть слуги путные. Ониско Борочевичь и зъ братьею оказали прывилья два - кнегини Анны Швитрыгайловое, одинъ князя Ивана Ярославича на землю свою.

      Милостью Божою мы, кнегини Швитрыгайловая кнегини Анна.
      Отпустили есмо слузѣ нашому Данилу Борочевичу тое, штожъ ему въ заставу къ городу не ходити, какъ же тая волость ходить къ городу Городку на сторожу. Ино тое есмо ему отпустили, штожъ ему въ Городку на сторожу не ходити, а только ему намъ конемъ служыти.
      А отпустили есмо ему вѣчно и дѣтемъ его и внучатомъ и правнучатомъ его.
      А прото есмо печать свою прыложыли.
      Данъ у Дворцы, въ лѣто по шостой тисячы 979, индикта 4, луна 6, мѣсяца марца 2 день.

      Се я, князь Иванъ Васильевичъ Ярославичъ. Пожаловали есмо слугу своего Антона Борочевича, отпустили есмо его изъ заставы, посмотрѣвшы по кнегини великой Швитрыгайловое листу, и свой есмо ему потвержоный на то листъ дали, ижъ ему, ани дѣтемъ его, ани внучатомъ его въ заставу Городку не ходити, какъ же иншые слуги-люди ходять. Писанъ въ Городку, въ лѣто (7000) 4 году, индиктъ 14, мѣсяца февраля 14 день.