In nomine Domini amen. Ad perpetuam rei memoriam.
      Vladislaus Dei gratia rex Poloniae Lithuaniaeque¹ princeps supremus et haeres Russiae etc., notitiam praesentium habituris praesentibus et futuris, significamus quibus expedit universis.
      Quod sincere devotionis zelo accensi diem extremi iudicii cupientes operibus misericordiae praevenire et indubitatae salutis perpetuae compendia nobis² procurare, in immarcescibiles³ namque coelestes thesauros fiducialiter reponimus, quaecumque pro honore sacrarum aedium et augmento cultus divini liberaliter erogamus, ecclesiae nostrae cathedrali Vilnensi in honorem beatorum Stanislai pontificis et Vladislai regis martyrum nuper erectae et ipsius capitulo villam nostram Ponary sitam prope civitatem nostram Vilnensem, obstaculum in superiori parte nostri obstaculi in fluvio Vigilia situati in eodem fluvio Vigilia⁴ construendum per ipsos, decimum piscem de dicto nostro obstaculo, decimas post nostras araturas in Niemiezha⁵ , duodecim⁶ talenta cerae pud dicta de curia nostri castri Vilnensis, [quorum] singulis quatuor temporibus tria talenta solvi debent capitulo supradicto⁷, dictam villam Ponary cum omnibus fructibus, redditibus, censibus, utilitatibus, agris, pratis, campis, sylvis, nemoribus, gaiis, rubetis, quercetis, virgultis, piscinis, piscaturis⁸, borris, mellificiis, molendinis, pascuis⁹, venationibus, aucupationibus, pertinentiis et appendiis universis, prout Olcardus¹⁰ noster olim genitor ac nos eam tenuimus, cum omni iure, dominio et proprietate damus, attribuimus et pro donatione¹¹ perpetua et irrevocabili assignamus per ipsam ecclesiam Vilnensem et eius capitulum tenendum, habendum, utifruendum, commutandum et pro utilitate eiusdem ecclesiae convertendum ac perpetuis temporibus affuturis possidendum.
      Praedictae itaque donationis intuitu, quam ob spem retributionis aeternae facimus et fecimus, in eadem ecclesia Vilnensi singulis diebus temporibus perpetuis una missa in remedium salutis nostrae animae debet legi.
      Harum quibus sigillum nostrum appensum est testimonio litterarum.
      Actum Vilnae, die dominico infra octavas Ascensionis Christi anno Domini millesimo trecentesimo nonagesimo.
      Praesentibus his: Joanne Wislicensi¹², Cristino Sandecensi castellanis, Dimitrio marschalco, Michaele venatore, Peregrino subcamerario Sandomiriensi, Gnevossio¹³ de Dalewicze¹⁴, aliis nostris fidelibus fidedignis.
      Datum per manus domini Zaklicze¹⁵ cancellarii aulae nostrae, nostri fidelis.

¹ Lituaniaeque Lib. II. Lithvaniaeque Kop. 1741.  ² nobis compendia Lib. II і IV.  ³ imarcescibiles Lib. II.  ⁴ Vilia Lib. II.  ⁵ Niemieza Lib. II.. Niemeza Lib. IV.  ⁶ duodecem Lib. II.  ⁷ suprascripto Lib. II.  ⁸ piscatoribus Lib. II.  ⁹ piscinis Lib. II.  ¹⁰ Oleardus. ¹¹ dotacione Lib. II.  ¹² Visliciensi Lib. II і IV.  ¹³ Gneuosio Lib. II.  ¹⁴ Daleuice Lib. II.  ¹⁵ Zaklitae Lib. II.