|
Gregorius episcopus etc.
Carissimo in Christo filio Ludovico, regi Ungarie illustri, sal. etc.
Cum tua devota serenitas ad ampliacionem catholice fidei libenter intendat, nosque experiri optemus conversionem Lituanorum infidelium tuo Regno Polonie vicinorum, de qua nobis spes aliqualis est data, et propterea ducibus eorundem Lituanorum scribamus secundum tenorem presentibus interclusum: serenitatem eandem, quam in hac parte credimus velle ac posse utiliter operari, confidenter requirimus attentiusque rogamus, quatenus ob reverenciam Dei et amorem dicte fidei, ac pro anime tue salute, nostrorumque adiectione precaminum velis in hoc viis et modis, quibus poteris, solicitis studiis laborare, nosque informare de hiis, que circa id crederis esse per sedem apostolicam faciendum. Super quo dilecto filio Dobrogostio, preposito ecclesie Cracoviensis, decretorum doctori, latori presencium, digneris fidem indubiam adhibere.
Datum Avinione, X Kal. Novembris, anno tercio.
In e. m. Elisabeth, regine Polonie, et Wladislao, duci Opuliensi.
|