М(и)л(о)стью Б(о)жьею и г(о)с(по)д(а)рѧ Казимира, королѧ польского и великого кн(я)зѧ литовского и руского и кнѧжети пруского и жомоитьского | и иных.
      Язъ, кн(я)зь Михаило Иванович  Новосильскии и Ѡдоевъскии и съ своим  братом  съ кн(я)земъ Федором  Ивановичем  и съ своим  | братоничем  съ кн(я)земъ Иваном  Васильевичем  били есмо челом  королю Казимиру, г(о)с(по)д(а)рю великому князю, абы нас  принѧл  | у службу. И г(о)с(по)д(а)рь король и великии кн(я)зь нас, слуг  своих  пожелал  принѧт  у службу по дѧди своего, великого кн(я)зѧ | Витовтову докончанью.
      А нам  ему служити вѣрно во всем  | без  всѧкоя хитрости и во всем  послушним  быти.
      А ему | нас  во ч(е)сти и въ жалованьи и въ докончаньи держати, как  дѧдѧ его, великии кн(я)зь Витовтъ дѣда нашего | держал  и ѡтцевъ наших, и нас  во ч(е)сти и въ жалованьи.
      А полѣтное нам  давати по старинѣ.
      А быти нам  по коро|левои и великого кн(я)зѧ воли Казимировои.
      А с ким  будет  мирен  король и великии кн(я)зь Казимиръ, ино и мы с тым  | мирны. А с ким  король и великии кн(я)зь Казимиръ не миренъ, ино и мы с тым  не мирны.
      А королю и великому кн(я)зю | Казимиру боронити нас  ѡт  всѧкого, как  и своего.
      А без  королевы и великого кн(я)зѧ Казимировы воли нам  ни с ким  не до|канчивати, ани пособлѧти никому.
      А нѣшто никоторыми дѣлы што Б(о)гъ измыслит  над  королем  и великим  кн(я)земъ | Казимиром, ино нам  и нашим  дѣтем  служити королеви, и  дѣтем, и Литовскои земли, хто будет  великим  кн(я)земъ | на Литовскои земли. А што Б(о)гъ учинит  над  нами, ино по нашем  животѣ королю и великому кн(я)зю Казимиру | дѣтем  нашим  служити к Литовскои земли, а по его животѣ дѣтем  его, хто будет  г(о)с(по)д(а)ремъ на великом  литовъ|ском  кнѧженьи.
      А по коим  дѣлом  Б(о)жьим  ѡднова над  нашими дѣтми Б(о)гъ што учинит: не будет  ѡт  рода нашего, ино зе|мли не ѡтступити нашеи ѡт  Великого кнѧжества Литовского.
      А хто сѧ ѡстанет  по нашем  животѣ детеи | наших , и королю и великому кн(я)зю Казимиру съ ѡтчинъ наших  ихъ не рушити, а въ земли, и въ воды, и въ ѡтчи|ны наши сѧ ему не въступати, поколь рубежь Новосильскои и Ѡдоевскои земли, ѡпроч  того, што изда|вна ѡтшло.
      А и дѣтем  его, хто будет  на Литовскои земли г(о)с(по)д(а)ремъ, наших  детеи не рушити, а и правду и записи | такии жь ему нам  и нашим  дѣтем  дати. А хто не въсхочет  имъ правды и докончанья такоже дати, а по то|му жь ихъ не восхочет  держати, как  король и великии кн(я)зь Казимиръ, ино с нас  целованье долов, а нам  волѧ. |
      А суд  и справа королю и великому кн(я)зю Казимиру давати нам  ѡ всих  дѣлех  чисто без  перевода. А съехавсѧ судям  | королевым  и великого кн(я)зѧ с нашими судями судити, целовавъ кр(е)стъ, без  всякия хитрости въ пра|вду на ѡбѣ сторонѣ. А ѡ што сопрутсѧ суди ѡ которых  дѣлех, ино положити нам  на г(о)с(по)д(а)рѧ, на королѧ и великог  | кн(я)зѧ Казимира. И ѡни едут  перед  королѧ и великого кн(я)зѧ. А кого ѡбвинит, то судямъ не надобѣ, а винова|тыи истець заплатит.
      А съ великим  кн(я)земъ московским, и с великим  кн(я)земъ переславъским, и с великим  кн(я)зем | проньским, хто нь будет  тая великая княженья держати, с тыми нам  суд  свои имѣти по старинѣ. А чего | межи себе не управим  с тыми великими кн(я)зьми у доканчаньи, ино королю за то стояти и управлѧти, | коли ты [sic] три кн(я)зи великии верхуписаныи  с королем  и великим  кн(я)земъ будут  у доканчани, или съ его сыном, или | съ его намест(ни)ком¹, которыи будеть после его держати великое кнѧженье литовское.
      И ѡ чем  коли сами про|межи себе кн(я)зи новосильскии и ѡдоевскии сопремсѧ, и нам  положити на своего г(о)с(по)д(а)рѧ, королѧ и великого кн(я)зѧ | Казимира. И королю и великому кн(я)зю Казимиру межи нас  то управити.
      А на сем  на всем  я, кн(я)зь Михаило | Иванович  и съ своим  братом  съ кн(я)земъ Федором  Ивановичем  и съ своим  братоничем  съ кн(я)земъ Иваном  Васильевичем | целовали есмо ч(е)стныи кр(е)стъ своему г(о)с(по)д(а)рю, королю и великому кн(я)зю Казимиру.
      А по сеи намъ грамотѣ | правити.
      А псан  у Вилни в лѣт 6989 ген(варя) 26 д(е)нь, индик  14.
      А при том  были бояре наши  Степан  Борисович, а Иван  Матфѣевич, | а Михаило Ѡлександрович, а Федоръ Иванович, а [Григор]еи² Иванович, а Григореи Иванович, а Данило Ст[епанович].³

¹ В оригинале: наместком. ² Закладкой для печати заслонены 4-5 букв (восстанавливается по публикации А. В. Казакова). ³ Закладкой для печати заслонены несколько букв. Степанович (по публикации А. В. Казакова).