Чюдо 11 святого отца Николы

      А се чюдеса новая створилася святого Николы в Литовьской земле при князе Витовте Кестутьевиче в лето 6000 и девятьсотное.
      Явися святыи Николае Парфенью в Лукомвле, вестуа ему тако: Маловер¹, спши ли. Он же рече: Нет, господине, не сплю. И рече ему святыи Николае: Знаеше ли мене? Он же рече: Не знаю. И рече: Аз святыи Никола Жидиченскии, и пришел есмь семо в Лукомль, тамо не могу жити погани деля, зане умножися безаконие. И ты повестуй игуменом и попом и всем христианом лукомляном, чтобы поставили церковь в имя мое на том месте у ледника на горке, и хощу зде быти, а то им скажи. А еще иду в Полтеско, умножилась безакониа, целуют крест и изменяють, хощу показнити того. Парфенеи не сказал неделю да почал болети и не ясти, сказал людем, и бысть здрав. И они церковь поставили в том месте да в том часе знамение учинилося.

¹ В рукописи: ниловер примечание М. Н. Тихомирова.

      Чюдо 12 святого отца Николая

      А се чюдо святого Николы Лукомльскаго, иже сътвори чюдеса на принесение честных мощей.
      Тимофеа простил Бог и святый Николае, боляща ногою 7 лет, из Дорогобужа пришедша.
      Дементия прости Бог и святыи Николае, от рождества рукою не владеюща, ис Серпьска пришедша.
      Кондрата черньца простил Бог и святыи Николае, болевша очима 6 лет, с Москвы пришедша.
      Исака простил Бог и святыи Николае, болевша очима и ногама, ис Чавникова пришедша.
      Озарью простил Бог и святыи Николае, болевша очима 4 лета, из Борисова пришедша.
      Дементиа Бог простил и святыи Николае, болевше рукою и ногою от рождества своего, пришедша от Смоленска.
      Феодора простил Бог и святыи Николае, болевше всем телом 8 лет, пришедша из Гливна.
      Греча простил Бог и святыи Николае, болевша очима 7 лет, пришедша с Лвягза [sic].
      Матфеи простил Бог и святыи Николае, из Словенска пришедша.
      Стефана прости Бог и святый Николае, болевша очима 30 лет, из Менска.
      Ермолу пришедша прости Бог и святыи Николае, болевша очима 3 лета, пришедша ис Когана.
      Федора простил [Бог] и святый Николае, мучима от беса 17 лет, пришедша из Маркова.
      Ивана простил Бог и святый Николае, рукою и ногою не владеюща 8 лет, пришедша из Дрючска.
      Сидора простил Бог и святый Николае, болевша очима, пришедша из Орши.
      Ульяну простил Бог и святый Нико[ла]е, болевша очима 10 лет.