[л. 206] М(е)с(я)ца маиѧ в 24 д(е)нь. Пѡвесть житиѧ и преставленїѧ с(вя)тыя и блаженныѧ и пр(е)п(о)д(о)бныѧ Еоуфросїньи, игоуменьи манастырѧ С(вя)т(а)го Сп(а)са и Пр(е)ч(и)стыѧ Ег(о) М(а)т(е)ре, ижи в Полотьсце граде. Благѡслови, Ѡ(т)ч(е).

      Бл(а)г(о)с(ло)венъ Г(оспод)ь Б(о)гъ І(зра)ильвъ, Б(о)гъ Авраамавъ, Б(о)гъ Исааковъ, Б(о)гъ Іаковъль, нес Б(о)гъ м(е)ртвых, но живых. Пр(а)в(е)днїи бо и по см(е)рти живи соуть, яко ж Соломонъ въ притьчах г(лаго)леть: "Пр(а)в(е)дници въ вѣки живить, и ѡт Г(оспод)а мзда их, и строенїе их ѡт Вышнего, сего рад(и) прїимут вѣнци из руки Г(оспод)нѧ", яко и быс. Еже на предпошедша скажемъ, ѡ сих же сице есть: "Снидетесѧ, сущїи в поустынѧх и в горах, житїа Агг(е)льскаа имоуще: старїи немощь [л. 206 об.] ѡтложьше, оунїи, яко елѣни, скачюще, всѣ снидетесѧ". Хощу бо вы представити трапезу ѡт брашенъ сих, да ядше възвеселитесѧ д(у)шами вашими. Се бѡ есть трапеза нѣтлѣющих брашенъ, не иже гортань оуслажаеть и чрево насыщает, но д(у)ша веселѧща и оумъ оукрѣплѧющи на подвиги добрых дѣлъ. Сеѧ бо яди, братїе, аще кто насытитсѧ, не вжадает паки, якож речено есть в Писаньи: "Не заморит Г(оспод)ь гладом д(у)ша пр(а)в(е)дных". Паки же на предлежащее наидемъ, ѡ нем же начахом повѣсть сїю. Вы же, ^1- блазїи ^-1 послушници, кн(я)зи и боляре, и ц(е)рковници, и ч(е)стнїи собори с(вя)тых, соущїи в манастырех, и простїи люди, снидетесѧ на новое се слышанїе и послушайте прилѣжно, ѡтвръзше оушаса своѧ и оумѧкчивши нивы [л. 207] с(е)рд(е)ць ваших, прїимѣте сѣмена многосп(а)сенаго житьѧ послушанїемъ жены сеѧ пр(е)п(о)д(о)бныѧ, с(вя)тыѧ подвиги еѧ и труд, и любовь, яже къ Б(о)гу. Яже предоидуще скажемъ, како родисѧ ^1- или ѡт коих родителей ^-1 и како въспитасѧ, или како възрастѣ, въ кою ли мѣру потече въ слѣд жениха своего Х(рист)а, о сих сице есть.

      Быс кн(я)зь въ градѣ Полотсцѣ именемъ Всеславъ, той имѣѧ с(ы)новы многы. И бѣше оу него меньшїй с(ы)нъ именемъ Геѡргий, ѡт него же родисѧ сїи бл(а)женнаа ѡтроковица. Рѡдителѧ же еѧ възрадовастасѧ ѡ рожествѣ еѧ со всѣми домашними своими. И по днех нѣколицѣх повелѣста кр(е)стити ю, и кр(е)стиста ю во имѧ Ѡтца и С(ы)на и С(вя)т(а)го Д(у)ха. И питома бѧше доилицею еѧ, дне ѡт дне растѧше ѡтроковица, тѣло млеком растѧше, а д(у)ша С(вя)т(а)го Д(у)ха наполнѧшесѧ. Лучи же сѧ девици деснаго [sic] [л. 208] ес(те)ства и м(о)л(и)твы плодъ, и толма быс любѧщи оученїе, якож чудитисѧ ѡтцу еѧ ѡ толицѣ любви оученїа еѧ. Вѣсти же разшедшейсѧ по всѣмъ градомъ ѡ мудрости еѧ и ѡ блазѣмъ оученїи еѧ и ѡ телесней оутвари, бѧше бо лѣпа лицем. Красота же еѧ многы славныа кн(я)зя на любленїе приведе ко ѡтцу еѧ, кождо их тщашесѧ, дабы поѧтї ю въ жену с(ы)ну своему, и всѣмъ часто присылающимсѧ къ ѡтцу еѧ. Ѡнь же ѡтвѣщеваше: "Волѧ Г(оспод)нѧ да будет".

      Един же, преѡдолѣваше славнымъ своимъ кнѧженїемъ и богатством, приславъ къ ѡтцу еѧ, испроси дщерь его за с(ы)нъ свой. И пришедши ей въ возрастъ 12 лѣт, и нача ѡ(те)цъ еѧ гла(гола)ти кнѧини своей: "Нама оуже лѣпо дати Предслава за кн(я)зь", – тако бо нарекоста ей имѧ преже кр(е)щенїа еа. Ѡна же г(лаго)ла ему: "Да како Б(о)гъ хощет [л. 208 об.] и твоѧ, кн(я)же, волѧ, тако да будет". Тогда слышавши Предслава, размышлѧше в собѣ, г(лаго)лющи, паче же, ^1- реку, ^-1 ѡт С(вя)т(а)го Д(у)ха наплънѧшесѧ мысль еѧ, и рече в собѣ: "Како се будет, ѡже ѡ(те)ц мой мыслить припрѧчи мѧ мужеви? То аще тако будет, то печали мира сего никакоже лзѣ гоньзьноути". Пакы в собѣ рече: "Что бѡ оуспѣша преже насъ бывшїи родове наши? Женишасѧ, посѧгаша и кнѧжиша, нъ не вѣчноваша. Житїе их мимо тече и слава их погибе, яко прах и хужее паоучины. А иж прежнїя жены, въземше моужскую крѣпость, поидоша въ слѣд Х(рист)а, жениха своего, предаша телеса своя на раны и главы своѧ мечеви, а другыѧ аще желѣзу выѧ своѧ не преклониша, нъ д(у)ховнымъ мечем ѡтсѣкоша ѡт себе плотскыѧ сласти, предавше телеса своѧ на постъ и на [л. 209] бдѣнїе и колѣнное покланѧнїе и на земли леганїе, то тїи соуть памѧтни на земли, и имена их написана на н(е)б(е)сех, и тамо съ Агг(е)лы безпрестани славѧть Б(о)га. А си слава ес(ть) прах и пепелъ, ^2-2 и яко дым разходитсѧ, и яко пара водная погыбает". И тако ей размышлѧющи въ с(е)рдци своемъ, а оумъ еѧ больма на Б(о)жїю любовь подвизашесѧ. И единою положисѧ на с(е)рдци еѧ таково помышьленїе, рече бо в собѣ: "Не се ли бы луче всего житїа сего было, да бых сѧ постригла въ чрьници, и была подо игуменьею, повинующисѧ се[с]трам и оучащисѧ, како страх Б(о)жїй оутвердити въ с(е)рдци своемъ и како течение скончати". Сиѧ на оумѣ си положивши, и оутаившисѧ ѡтца своег(о) и м(а)т(е)ри и всѣх домашних, и иде в монастырь.

      В та же лѣта бѧше кнѧини Романоваа игуменьею. Прїиде [л. 209 об.] к той, просѧщи приѧти Аггельскаг(о) образа и причтатисѧ ту соущим инокинѧм, и быти подо игомъ Х(ристо)вым. Видѣвши же ѡна бл(а)женаѧ жена юность еѧ и возрастъ цветущїй ѡней, и смѧтесѧ, и нача тѣломъ оутерьпати и с(е)рдцемъ оужасатисѧ, и лицемъ на землю преклоньши, на длъгъ часъ ничущи, и восклоньшїсѧ, и возрѣвши на юность еѧ, воздохноу и прослезившисѧ, г(лаго)ла ей: "Чадо мое! Како могоу се сотворити? Ѡ(те)цъ твой, оуведѣвъ, со всѧким гнѣвомъ возложит вред на главу мою. И еще же юна еси возрастом, не можеши понести тѧготы мнишескаг(о) жытїа. И како можеши ѡставити кнѧженїе и славу мира сего?" Ѡтвещавши же бл(а)женнаа ѡтроковица: "Г(о)с(по)же и м(а)ти! Всѧ видимаа мира сего красна соуть и славна, но въскоре минують, яко сонъ или цвѣтъ [л. 210] оувѧдает. Вѣчнаа же и невидимаѧ в вѣки пребывают, якоже Писанїе г(лаго)леть: "Око не видѣ, ни оухо слыша, ни на с(е)рдце ч(е)л(о)в(е)ку взыде, иже оуготова Б(о)гъ любѧщимъ Его". Или ѡтца моего ради не хощеши мене ѡстрищи? Не бойсѧ, г(оспо)же моѧ. Оубойсѧ Г(оспод)а, владѣющаго всею тварию, и не ѡтлучи мене ѡт Агг(е)льскаго чина". Бл(а)женнаѧ же кнѧини оудивившесѧ разуму ѡтроковица и любве еа, яже к Б(о)гу, повелѣ воли еѧ быти. И ѡгласивъ ю їерѣй, и ѡстриже ю, и нарече имѧ ей Еоуфросинїя, и ѡблече ю в черьныѧ ризы, и бл(а)г(о)словї ю игуменїа бл(а)го(сло)венїемъ с(вя)тых ѡ(те)цъ, и рече ей: "Боуди чадо, послѣдствоующи преже тебе бывшимъ женамъ Февронїи и Еоупраѯїи и инѣх множество, иж Х(рист)а ради пострадаша, и Г(оспод)ь Б(о)гъ дасть ти побѣду и силу на супротивника нашего диѧвола". И тако ей [л. 210 об.] рекши, ѡтпустї ю в кѣлїю свою.

      Оувѣдѣв же сїа ѡ(те)цъ еѧ, скоро иде в манастырь, и жалостно тръзаше власы главы своеѧ, и любезно целоваше ю, г(лаго)лѧ: "Горе мнѣ, чадо мое! Почто ми сице сотворила еси, и печаль д(у)ши моей принесе? Почто ми преже сего мысли сеѧ не явила еси? Лютѣ мнѣ, чадо мое сладкое, жалости с(е)рдца моего! Ѡ горе мнѣ, чадо мое милое! Како гоньзнет доброта твоѧ вражые пронырьство? Уже достоить ми плакатисѧ ѡстроупленїю д(у)шею къ Г(оспод)у Б(о)гу моему, да внидеши въ чрътогъ Ц(а)рствїа Его". Жалость же быс всѣмъ въ дому его ѡ ней. Пр(е)п(о)д(о)бнаѧ же Еоуфросинїа сего всего небрежаша жалости ѡтца своего, но яко дѡблїй храборъ, въѡружившесѧ на супротивника своего дїѧвола, пребываше в манастыри, повинующисѧ [л. 211] игуменїи и се[с]трамъ всѣм, и всѣх преспѣвающи постомъ и м(о)л(и)твами и бдѣнїи нощными. И ѡттоле паче подвижнейши нача быти, собирающи мысли бл(а)гыа въ с(е)рдци своемъ яко пчела сотъ. И пребывши нѣколико времѧ в манастыри, и потомъ проси оу еп(и)ск(о)па суща тогда, нарицаемаго Илью, правѧщаго столъ с(вя)тое Софѣи в Полотьсце, дабы ей велѣлъ ту пребыти в церкви с(вя)тѣй Софѣи в голъбъци камене. И повелѣ ей, да пребываетъ ту. Вшедши же, начатъ подвижнеиши подвигъ постническїй восприимати, и начат книги писати своима рукама, и наем емлющи, требующимъ даѧше.

      Пребывающи же ей ту нѣколико времѧ, въ едину нощъ возлеже, ѡпочивати хотѧщи ѡт многаго стоѧнїа въ м(о)л(и)твах, яже к Б(о)гу, [л. 211 об.] видѣ видѣнїе: поим ю Агг(е)лъ, и веде ю, идѣже бѣ ц(е)рквьца С(вя)т(а)го Сп(а)са, метохїѧ с(вя)тыѧ Софїи, яже зоветсѧ ѡт людей Селце. И тоу показа ей Агг(е)лъ Г(осподе)нь, г(лаго)лѧ: "Еоуфросинїе! Здѣ ти подобаеть быти". Она же, оубуждьшисѧ, дивлѧшесѧ в собѣ, г(лаго)лющи: "Что хощеть ми се быти?" Тоѧ же нощи видѣ трищи. И възбудившисѧ ѡт сна, со страхомъ вста, славословяще Б(о)га и г(лаго)лющи: "Слава Тобѣ, Б(о)же, слава Тобѣ, як(о) сподоби мѧ в нынешнюю нощъ видѣти с(вя)тое лице Агг(е)льское!" И по семъ нача ѱалѡм глаголати: "Готово с(е)рдце мое, Боже, готово с(е)рдце мое! И пакы к Тобѣ привергохсѧ ѡт ютробы м(а)т(е)ре моеѧ. Б(о)гъ мой еси Ты, яко восхотѣ, тако и сотвори на мнѣ, рабѣ Твоей!" И кончеваше оутренюю.

      Тоѧ же нощи явисѧ еп(и)ск(о)пу Ілїи тъй же Агг(е)лъ, г(лаго)лѧ: [л. 212] "Въведи ю, рабу Б(о)жїю Ефросинью, въ ц(е)рквьцоу С(вя)т(а)го Сп(а)са, на рекомое Сельце мѣсто, бо то с(вя)то есть, як(о) достойна есть Ц(а)рству Н(е)бесному, яко миро бл(а)говонно, въсходить м(о)л(и)тва еѧ к Г(оспод)оу, и яко вѣнець на главѣ ц(а)ревѣ, тако почивает Д(у)хъ С(вя)тый на ней, и яко с(о)лнце сїѧетъ по всей земли, тако житїе еѧ просиѧетъ предо Агг(е)лы Б(о)жїи". Еп(и)ск(о)пъ же въста въскоре со страхомъ и трепетомъ, прїиде к ней. Еоуфросинїа же, видѣвши его, поклонисѧ ему и рече: "Бл(а)г(о)слови, вл(а)д(ы)кѡ с(вя)тый!" Ѡнь же г(лаго)ла: "Б(о)гъ да бл(а)г(о)словить тѧ, чадо, и дасть ти терпѣнїе и силоу на всѣх вразѣх видимых и невидимых". Ѡна же, поклонившисѧ, рече: "Аминь. Буди мнѣ по г(лаго)лу твоему, вл(а)д(ы)ко с(вя)тый". И седѡста. Ѡтвръз же бл(а)женый еп(и)ск(о)пъ оуста своѧ, начат бесѣдовати [л. 212 об.] ѡ спасенїи д(у)ши. Бл(а)женаѧ же Еоуфросинїа прїимаше словеса его, яко сѣмена в житницу д(у)ша своеѧ, и плодѧщи ѡво 30, ѡво 60 или 100. Много же побесѣдовавъ с нею, и се прирече ей, г(лаго)лѧ: "Дщи! Хощу ти рещи слово, ты же с любовию прїими е". Ѡна же рече: "Рада, ѡтче пр(е)п(о)д(о)бный, прїиму слово твое, яко даръ многоцѣненъ". И г(лаго)ла ей еп(и)ск(о)пъ: "Веси ли, чадо, се ц(е)рк(о)вь есть соборънаѧ, идѣже седиши, ту вси ч(е)л(о)в(е)ци собираютсѧ, и тобѣ не лѣпо здѣ пребывати. То се есть ц(е)рквьца С(вя)т(а)го Сп(а)са в Селци, идѣже братьѧ наша лежать, преже нас бывшїи еп(и)ск(о)пи. Негли Б(о)гъ поспешит м(о)л(и)твами их и трудомъ твоимъ, и возградит мѣсто то велико". Еуфросиниѧ же, слышавши ѡт еп(и)ск(о)па, яко тако изг(лаго)ла ей, и возрадовасѧ д(у)шею, и возвеселисѧ [л. 213] с(е)рдцемъ, и, ѧвленїю Агг(е)лову вѣру имши, еже видѣ и слыша ѡт Него, г(лаго)ла еп(и)ск(о)пу: "Б(о)гъ да поспешить ми, ѡтче, м(о)л(и)твами твоими с(вя)тыми".

      Призвав же еп(и)ск(о)пъ кн(я)зѧ Бориса, стрыѧ еѧ, и ѡтца еа Геѡрьгиѧ, и пр(е)п(о)д(о)бную Еоуфросинїю, и ч(е)стныа мужа, и постави ѧ самъ послухы, рекъ: "Се ѡтдаваю Еоуфросїнїи мѣсто С(вя)т(а)го Сп(а)са при васъ, да по моемъ животѣ никтоже не посудит моего данїа". Се слышавше кн(я)зи ѡба и боѧре всѣ ѡт еп(и)ск(о)па, поклонистасѧ емоу, г(лаго)люще тако: "Ей, вл(а)д(ы)ко с(вя)тый, се ти есть Б(о)гъ положилъ на с(е)рдци твоемъ, еже сице еси оумыслилъ ѡтроковици сей попеченїе ѡ ней". Еоуфросинїи же рѣша: "Ты же иди и послушай еп(и)ск(о)па, еже ти велит, тако створи, то ес(ть) ѡ(те)цъ всѣмъ намъ, того подобает слушати". [л. 213 об.] Еоуфросинїа же, возрѣвши на нѧ ѡсклабленымъ лицемъ, и рече имъ: "Рада иду, яко Б(о)гъ повелит ми, тако и будет; волѧ Г(оспод)нѧ да будет ѡ мнѣ". Кн(я)зи же и боѧре всѣ, слышавше ѡт пр(е)п(о)д(о)бныѧ Еоуфросинїи глаголъ сїй, возрадовашасѧ и, прїемше бл(а)г(о)словенїе ѡт еп(и)ск(о)па и поклонившесѧ пр(е)п(о)д(о)бьной Еоуфросинїи и целовавъше ю любезнымъ целованїемъ, ѣхаша в домы своѧ. Еоуфросинїа же, поклонившисѧ въ с(вя)тѣй Софѣи и бл(а)г(о)с(ло)вившисѧ ѡт еп(и)ск(о)па, и тоѧ нощи въставши, поимъши с собою едину черноризицоу, прїиде на мѣсто, зовомое Селце, идѣже есть ц(е)рквьца С(вя)т(а)го Сп(а)са. И вшедши в ц(е)рк(о)вь, и, поклонившисѧ, возгласи сице: "Ты, Г(оспод)и, заповѣда с(вя)тымъ Своимъ ап(о)с(то)ломъ, рек: "Не носите с собою ничесоже, токмо [л. 214] жезлъ". Се азъ, Твоему словеси послѣдствоующи, изыдох на мѣсто сие, ничтоже носѧщи, но точию Твое слово в собѣ имущи, еж(е) рещи: "Г(оспод)и, помилуй". Еще же се за все имѣнїе имѣю книги сїа, имиже оутѣшаетъ ми сѧ д(у)ша и с(е)рдце веселит. Лише же сих трїех хлѣбъ не имам ничтоже, но токмо Тебе помощника и кръмителѧ. Ты бо еси ѡ(те)цъ оубогимъ, нагимъ ѡдѣнїе, ѡбидимымъ помощьникъ, ненадѣющимъсѧ надѣѧнїе, и буди имѧ Твое бл(а)г(о)с(ло)вено на рабѣ Твоей Еоуфросинїи ѡтселе и до вѣка. Аминь". Сице рекши, и изшедши изъ ц(е)ркви, нача подвижьнѣши быти на м(о)л(и)тву, яже къ Б(о)гу.

      И тоу ей пребывающей нѣколико времѧ. И тако посла ко ѡтцу своему, гл(аголю)щи: "Поусти ко мнѣ сестру мою [л. 214 об.] Городиславоу", – тако ей бѣста имѧ нарекла родителѧ. "Да наоучитсѧ, – рече, – грамоте". Ѡнъ же поусти ю к ней. Ѡна же съ прилежанїемъ оучаше еѧ сп(а)сенїю д(у)ши. Сиѧ же со прилежанїемъ прїимаше, яко нива плодовита, оумягчнивши с(е)рдце свое, и г(лаго)лаше: "Г(оспод)ь Б(о)гъ да оустроит ми на сп(а)сенїе д(у)ши моей твоими с(вя)тыми, г(о)с(по)же, м(о)л(и)твами". Сие рекши ей. Пр(е)п(о)д(о)бная же Еоуфросинїя, введши ю в ц(е)рк(о)вь, и повелѣ иерѣеви, ѡгласивши, ѡблещи в черьнеческиѧ ризы, и нарече имѧ ей Евдокиѧ. И по малех днех присла ѡ(те)цъ к ней, г(лаго)лѧ: "Пусти оуже сестроу свою ко мнѣ!" Ѡна же ѡтвеща: "Еще не извыче всей грамоте". Уведѣвъ же ѡ(те)цъ еѧ, яко утаивши его, постриже ю, и възьѧрисѧ на пр(е)п(о)д(о)бную Еоуфросинїю, с(е)рдцемъ горѧ, приѣхавъ к манастыреви, [л. 215] и г(лаго)ла: "Чадо мое, что створи? Приложи ми сѣтованїе к сѣтованїю и д(у)ши моей печаль к печали". И сиѧ ему г(лаго)лющу ѡт горести с(е)рдца своего, реками слезъ часто изливаше ѡт ѡчию своею, любезно дръжа Евдокѣю и г(лаго)лѧ: "Чада моѧ, на се ли васъ родих, или на се васъ м(а)ти воспита? Оужели ваю бракъ оуготовах? Оужели чертогъ и брачныѧ ризы ваю на сѣтованїе положих собѣ? Чада моѧ милаѧ, что ми воздаста, в радости мѣсто горькїа печали с(е)рдце мое наполниста!" Вси же боѧре его, слышавше жалость кнѧзѧ своего, горко плакахусѧ ѡ напрасней печали кн(я)зѧ своего. Блаженаѧ же Еоуфросинїя ѡтвещеваше ко ѡтцу своемоу: "Что ради печалуешися на мѧ? Имѣеве печальника и помощника единого Б(о)га". Ѡ(те)цъ же еѧ малу оутѣху прїимъ ѡт словеси [л. 215 об.] пр(е)п(о)д(о)бныѧ Еоуфросинїи, ѣха в дом свой. И Евдокиѧ же пребываше в манастыри, повинующисѧ сестрѣ своей. Бл(а)женая же Еоуфросїнїа трудомъ многим молѧшесѧ к Б(о)гу ѡ мѣстѣ томъ, дабы е оустроиль Б(о)гъ.

      Бѧше же во граде кнѧжна Борисовна именемъ Звенислава. Та во единъ ѡт днїй прїиде в манастырь и принесе всю свою оутварь златую и ризы многоцѣнны ко Еоуфросинїи, и рече ей: "Г(о)с(по)же и се[с]тро! Всѧ краснаѧ мира сего ни во чтоже ми сѧ мнить. Сиѧ всѧ даю с(вя)т(о)му Сп(а)су, а сама хощу поклонити главу свою поидо³ иго Х(ристо)во". Ѡна же приѧтъ ю с радостїю, и повелѣ їерѣеви пострищи ю, и нарече имѧ ей Еоупраксиѧ. И тако начаста пребывати в манастыри въ едину мысль въ м(о)л(и)твах, яже к Б(о)гу. И тако бѧше [л. 216] видѣти, яко едина д(у)ша в дву телесу. И по семъ бл(а)женнаѧ Еоуфросинїа заложи ц(е)рк(о)вь камену С(вя)т(а)го Сп(а)са, и ѡт начатка доспѣ за 30 нед(е)ль.

      И се хощу вам, братие, чюдо сказати. Бѣ моуж именемъ Иванъ, приставникъ над дѣлатели ц(е)рк(о)вными. К нему же прихожаше многажды глас свитающу дни, г(лаго)ла: "Ѡ Иване! Востани и пойди на дѣло Вседръжїтелѧ Сп(а)са!" И во единъ ѡт днїй въставъ, прїиде ко бл(а)женной Еоуфросинїи и рече ей: "Ты ли, г(о)с(по)же, присылаешъ понужати мене на дѣло?" Ѡна же рече: "Ни". И паки расмотривши, премудраѧ жена рече емоу: "Аще и не азъ тѧ возбужаю, а кто тѧ ни позываетъ на таковое дѣло, того послушай прилѣжно с потщанїемъ". И паки другое чудо скажоу вам, добрїи [л. 216 об.] послушници: оуже сконьчаней бывши ц(е)ркви, и мало не доставшимъ плитамъ, нѣчимъ бѧше верха скончати. И поискавъше, не ѡбретоша ничтоже. И печаловашесѧ ѡ томъ Еоуфросинїа, и, воздохнувши, рече: "Слава Тебѣ, Вл(а)д(ы)ко Вседръжителю и Ч(е)л(ове)колюбьче, даровавый си нам болшаѧ, то дай намъ и меньшьѧ, имже свершитсѧ ц(е)рковь Твоа!" И тако ей помольшисѧ, заоутра по оустроенїю Б(о)жїю ѡбретошасѧ в пещи плиты, и того дни свершиша ц(е)рк(о)вь, и кр(е)стъ возставиша.

      Пр(е)п(о)д(о)бная же Еоуфросинїа, видивше совръшену ц(е)рк(о)вь, возрадовасѧ д(у)шею. И быс с(вя)щенїе и велиѧ радость всѣмъ хр(и)стьѧномъ. И собрашасѧ кн(я)зи и сильнїи мужие, и иноки, и инокинѧ, и простїи людїе, и быс тръжство [л. 217] велїе, и празноваша дни многи, и разыдошасѧ кождо въсвоѧси. Видѣвши же бл(а)женнаѧ, яко исполнилъ есть Б(о)гъ желанїе с(е)рдца еа, и вшедши в ц(е)рк(о)вь, паде ницъ на земли, и въздохнувши ѡт глубины д(у)ша, лице свое мочащи слезами, и нача гла(гола)ти: "Ты, Г(оспод)и, С(е)рдцевидьче, Бл(а)г(о)д(а)телю, Б(о)же Б(о)гомъ, м(и)л(о)ст(и)вый Г(оспод)и, призри на храмъ Свой, яже создахъ во имѧ Твое, якоже рече Соломонъ: "Вышнїй не в рукотворенах ц(е)рквах живеть". Ты, Г(оспод)и, призри на мѧ, на рабу Твою Еоуфросинїю, и на рабынѧ Твоѧ сиѧ, яже собрах во имѧ Твое, да приимше иго Твое легкое на выѧ своѧ, поидуть въ слѣд Тебе, и сътвори ѧ овца двора Твоего, и боуди имъ пастоухь и дверникъ, да ни едино ѡт них не будеть въсхыщено волкомъ – губителемъ диѧволом. [л. 217 об.] Боуди имъ, Г(оспод)и, ѡружїе и забрала, да не приидеть нань зло, ни рана не подвижитсѧ к телесем нашимъ, и не погуби нас со безаконїи нашими, на Тѧ бо оупованїе наше положихомъ, яко Ты еси Б(о)гъ знающимъ Тѧ, и Тобѣ хвалу воспущаю до послѣдняго моего издыханїа. В вѣки, аминь". Се[с]тры же сице оучаше, г(лаго)лющи: "Се собрах вы, яко кокошь птенца под крѣлѣ свои, и в паствину, яко ѡвца, да пасетесѧ в заповѣдех Б(о)жїих, да и аз веселымъ с(е)рдцемъ подвизаюсѧ оучити васъ, видѧщи плоды ваша трудовныѧ, и толикъ дождь проливаю к вам оученїемъ. А нивы ваша во едину мѣроу стоѧт, не растуще, ни поступающе горѣ, а год приспѣвает во свершенїе, и лопата на гоумнѣ лежїть. Но боюсѧ, егда боудет плевелъ [л. 218] в васъ и предани будете ѡгню негасимому. Потщитесѧ, чада моѧ, оубежати сих всѣх, и створїтесѧ пшеница чиста, и смелитесѧ в жръновах смиренїемъ и м(о)л(и)твами и постомъ, да хлѣбъ ч(и)ст прїнесетесѧ на трапезу Х(ри)стову". Сице же ей всегда оучаще и безпрестани, яко м(а)ти чадолюбиваѧ г дѣтемъ своимъ любовь показующи.

      Мы же на предлежащаѧ возвратимсѧ. Видѣвши же пр(е)п(о)д(о)бнаѧ Еоуфросинїа манастырь свой оукрашенъ и всего ^1- бл(а)га ^-1 исплъненъ, оумысли создати вторую ц(е)рк(о)вь камену С(вя)тѣй Б(огороди)ци. И тоу свершивши и иконами оукраси, и ѡс(вя)тивъши, предасть ю мнихом, и бысть манастырь велїй. Видѣвши же бл(а)женнаѧ манастырѧ два оустроена превелика зѣло и пребогата, и рече [л. 218 об.] в собѣ: "Слава Тобѣ, Вл(а)д(ы)ко, бл(а)гѡдарю Тѧ, С(вя)тый! Что есмь восхотѣла, то далъ ми еси, и скончалъ еси, Г(оспод)и, желанїе с(е)рдца моего". И паки рече: "Помилуй мѧ, Г(оспод)и, и скончай прошенїе мое, да бых видѣла прес(вя)тую Б(огороди)цю Ѡдигитрию в сей с(вя)тѣй ц(е)ркви". И посла слугу своег(о) Михаила въ Ц(а)рьград къ ц(а)реви, нарицаемому именемъ Мануилу и к патриѧ[р]ху Лоуцѣ з дары многоцѣнными, просѧщи ѡт нею иконы с(вя)тыѧ Б(огороди)ца, еже бѣ еоуаг(е)листъ Лука написа 3 иконы еще при жывотѣ с(вя)тыѧ Б(огороди)ца и постави едину во Ер(у)с(а)л(и)ме, а другоую во Ц(а)риграде, а третью въ Ефесе. Ѡна же съ прилежанием прошаше Ефескиѧ иконы с(вя)тыѧ Б(огороди)ца. Видѣв же ц(а)рь любовь еѧ, и посла въ Ефесъ седмь сот ѡружникъ своих, и шедше, принесоша [л. 219] икону с(вя)тыѧ Б(огороди)ца въ Ц(а)рьград. Патриѧрхъ же Лоука собра еп(и)ск(о)пы и соборъ весь во С(вя)тую Софию, и, благословивъ, дасть ю слоузѣ преподобныя Еоуфросинїа. Онъ же [с] радостїю приѧтъ и принесе г(о)с(по)жи своей Еоуфросинїи. Ѡна же, внесьши въ ц(е)рк(о)вь С(вя)тыѧ Б(огороди)ца, поставї ю, и, въздѣвши руцѣ, и рече: "Слава Тебѣ, Г(оспод)и, слава Тобѣ, и еще реку: слава Тебѣ, Вл(а)д(ы)ко, сподобивый мѧ видѣти въ днешнїй ѡбраз м(а)т(е)ре Своеѧ!" И се рекши, оукраси ю златомъ и каменїемъ многоцѣннымъ, и оустави по всѧ вторникы носити ю по с(вя)тымъ ц(е)рквамъ, оукраси же всю землю Полотскоую своима б(о)голѣпьныма манастырема.

      И видѣвши, яко просвѣти Б(о)гъ манастырѧ еѧ, и въжелѣ, г(лаго)лющи: "Абы ми дойти с(вя)таго града Iер(у)с(а)л(и)ма и [л. 219 об.] поклонитисѧ Гробу Г(оспод)ню и всѣм с(вя)тым мѣстомъ, видѣти и цѣловати, и тамо животъ свой скончати". Видѣвши же стадо Б(о)ж(е)ственых ѡвець совокуплено множество, и радовашесѧ имъ, яко своему спасенїю, и на всѧкъ д(е)нь оучаше сестры своѧ: старыѧ оучаше терпѣнїю и въздержанїю, оуныѧ же оучаше д(у)шевней ч(и)стоте и безстр(а)стїю телесному, говѣѧнїю ѡбразну, стоупанїю кроткоу, гласоу смиренноу, словоу бл(а)гочинну, ѧденїю и питью безмолъвну, при старѣишеи молчати, моудрѣйших послоушати, къ старѣйшим покоренїе, к точьнымъ и меньшим любовь без лицемѣрїа, мало вещати, а множае разумѣти. Тако бо бѧше данъ даръ сей бл(а)женной Еоуфросинїи ѡт Б(о)га, аще кто еѧ въпрошаше ѡ коей вещи, ѡна [л. 220] емоу разрѣшаше, чему быти, и кто еѧ послоушаше, той добро получаше, н[е] бо хотѧше видѣти кого которающасѧ: ни кн(я)зѧ со кн(я)земъ, ни болѧрина з болѧриномъ, ни ѡт простых кого со своимъ другомъ, но всѣх хотѧше имѣти, яко едину д(у)шоу.

      Посла же по всей братьи своей, повѣдающи имъ мысль свою, ѡже восхотѣ ити во Iер(у)с(а)л(и)мъ. Ѡни же, слышавше вѣсть сїю, с жалостїю многою съѣхашасѧ ѡтвсюду ко бл(а)женней Еоуфросинїи и молѧхоут еѧ со слезами, дабы их не ѡставила сїрых. Ѡна же их тѣшаше бл(а)гымъ смысломъ своимъ, яко м(а)ти, дѣти своѧ любѧщи. И бѣ любимъ еи брат Вѧчеславъ. Приѣха и тои к сестрѣ своеи Еоуфросинїи со кнѧинею и з дѣтьми своими. И пришед, поклонисѧ ей и рече: "Г(оспо)же моѧ, м(а)ти и сестро! Что ѡставьлѧеши мѧ, правителю д(у)ши моей [л. 220 об.] и свете ѡчию моею!" И горко ему плачющоусѧ. Бл(а)женнаа же Еоуфросинїа повелѣ ему ити к домови. Дѣти же его повелѣ ѡставити оу сестры своеѧ Евдокѣи. Данъ же быс даръ бл(а)женней Еоуфросинїи ѡт Б(о)га: аще кого зрѧше ѡчима своима, то разумѣѧше, в коемъ ч(е)л(о)в(е)цѣ сосоуд боудеть избранъ Б(о)гови. Тогда же пребл(а)женьнаа Еоуфросинїа, видѣвши братаине свои, и рече има: "Хощу ваю ѡбручити Жениху безсм(е)ртному и ввестї в чертогъ Ц(а)рства Его". Ѡнѣма же послоушающема, оусладисѧ д(у)ша ею паче сота медвена словесемъ пребл(а)женныѧ Еоуфрасинїи. И, падше на ногоу ея, г(лаго)ласта к ней: "Волѧ Г(оспод)нѧ да будеть и твоѧ с(вя)таѧ м(о)л(и)тва! Якѡже хощеши, створи нама, г(оспо)же!" Пр(е)п(о)д(о)бнаѧ же Еоуфросинїа с радостию и с пѡспѣшенїемъ празвавши [sic] брата своего и рече емоу: "Азъ хощоу пострищи [л. 221] Кироанну и Ѡльгоу", – тако бо и бѧста нарекла родителѧ ею. Смѧте же сѧ ѡ(те)цъ ею ѡ словеси семъ и рече: "Г(о)с(по)же моѧ, что ми хощеши створити? Два плача прилагаеши д(у)ши моей: да плачоусѧ ѡтхода твоего ради и сѣтую чадоу дѣлѧ своею". М(а)ти же ею жалостно тръзашесѧ. Бл(а)женаѧ же Еоуфрасинїа, пославши, призва еп(и)ск(о)па, тогда стол правѧща с(вя)тое Софѣи, нарицаемаго Диѡнисиѧ, и введши ею въ ц(е)рк(о)вь, и повелѣ ѡстрищи ею, и нарече имѧ Кироанне Агафиѧ, а Ѡльзе Еоуфимиѧ, и бл(а)г(о)с(ло)вивши и бл(аго)с(ло)венїемъ с(вя)тых ѡ(те)цъ. Сама же бл(а)женнаа Еоуфросинїа, пѡложивши великое оустроенїе ѡбѣма манастырема, братїи и сестрамъ, и дасть дръжати и рѧдити сестрѣ своей Евдокѣи ѡба манастырѧ. Сама же, поклонившисѧ въ ц(е)ркви С(вя)т(а)го Сп(а)са и оу С(вя)тое Б(огороди)ци [л. 221 об.] и рече: "Г(оспод)и С(е)рдцевидче! Се ѡставлѧю дѡм Твой незатворенъ никомуже; Ты же, Г(оспод)и, не затвори ѡт нас Н(е)б(е)снаго Ти Ц(а)рствїѧ".

      И тако поиде во Iер(у)с(а)л(и)мъ, поимъши с собою брата своего Д(а)в(и)да и сестроу свою Еоупраксию. Всѧ же братиѧ горко плакахоусѧ ѡтхода ради г(о)с(по)жа своеѧ, и всѧ гражане выидоша проводити еѧ. Старїи плакахоу, яко дщере, ркоуще: "Оувы намъ, вожу старости нашеѧ, просвѣщенїе д(у)ши нашей, подпоре немощи нашей". Юнїи же г(лаго)лаху: "Камо заходиши, свѣте ѡчїю нашею! Кто нашу юность оукрепит, воздръжанїе юности нашеѧ? Не ѡставлѧй нас сиры, но въ м(о)л(и)твах своих не забывай нас". Ѡна же, цѣловавши всѣх, бл(а)гословивши и, возрѣвши на н(е)бо, рече: "Ты, Г(оспод)и, С(е)рдцевидче, ходивый со Аврамомъ, иди и с нами, рабы Твоими, – съ Еоуфросинїю и съ Д(а)выдом и съ Еоупраксиею!" И тако поидоша [л. 222] всѣ, еже соуще с нею. Ѡ дивное чудо! Не бывавши ни в коей странѣ, ни во граде, ни в селѣ, н(ы)не же, вземши мужескоую крѣпость, премину всѧ грады и власти и прїимаше ѡт всѣх кн(я)зей ч(е)сть великоу.

      И тако пришедши въ страны, и срѣте ю ц(а)рь, идый на Оугры, с великою ч(е)стїю посла ю въ Ц(а)рьград. Ѡна же, пришедши, и вшедши в великую ц(е)рк(о)вь С(вя)тыѧ Софиѧ, и поклонисѧ та же и всѣм Б(о)жїимъ ц(е)рквамъ, и бл(а)гословисѧ ѡт патриѧрха, и покупивши разноличныѧ фимиѧны и кадильницу златоу, и иде во Іер(у)с(а)л(и)мъ.

      И пришедши во Іер(у)с(а)л(и)мъ, посла слоугу своего Михаила тогда соущему патриѧрхоу, г(лаго)лющи: "Вл(а)д(ы)ко с(вя)тый! Створи м(и)л(о)сть на мнѣ, повели, да ѡтворѧт ми сѧ врата Х(ристо)ва". Ѡн же повелѣ прошенїю еѧ быти. Пришедших [sic] ко вратомъ, паде на земли, г(лаго)л(ю)щи: "Г(оспод)и І(ису)се Х(рист)е! Не вмени ми сего [л. 222 об.] въ грѣхъ, занеже изволих по стопам Твоимъ ходити и внидох въ с(вя)тый град сїй!" И целовавши врата и соущїи с нею, и вниде во град, и иде ко Гробу Г(оспод)ню. И пришедши, поклонисѧ, и целова Гробъ Г(о)с(поде)нь и сущїи с нею. И покади Гробъ Г(о)с(поде)нь златою кадильницею и многоразли[ч]ными фимиѧны, и изыде, и ѡбита оу С(вя)тое Б(огороди)ци в Руском манастыри. И во вторый д(е)нь иде второе ко Гробу Г(о)с(под)ню, и такоже сътвори: поклонисѧ и целова, и покадивши, изыде. Въ третїй же д(е)нь тѡ же створи, и давши злата много, и поставивши кадилницу злату на Гробе и многоразличьныѧ фимиѧны, возрѣвши ѡчима своима, и руцѣ воздѣвши на н(е)бо, и, со слезами воздохнувши из глубины с(е)рдца, г(лаго)лаше: "Г(оспод)и І(ису)се Х(рист)е, С(ы)не Б(о)жїй, рожейсѧ ѡт Пр(и)снод(е)вы М(а)рїа сп(а)сенїа ради нашего! Реклъ есї: "Просите и прїимете". Аз же, [л. 223] грѣшнаа, егоже просих, получих ѡт Тебе, Вл(а)д(ы)ко. Се же и еще прошу оу Тебе, милистиве [sic], да сконьчаю мѣсто прошенїа моего: прїими д(у)хъ мой ѡт мене во с(вя)тѣмъ граде Твоемъ Іер(у)с(а)л(и)ме и пресели мѧ в вышнїй град Твой Іер(у)с(а)л(и)мъ, и покой мѧ на лонѣ патриѧрха Авраама со всѣми оугожьшими. Аминь".

      И сице ей г(лаго)лавши, изыде въ прежереченый манастырь С(вя)тыѧ Б(огороди)ца, идѣже бѣ ѡбитала. Тоу же посещенїемъ Б(о)жїимъ впаде в недугъ и нача болѣти. И лежащи на ложи своем, г(лаго)лаше: "Слава Тебѣ, Вл(а)д(ы)ко, яко восхотѣ и створи на мнѣ, рабѣ Твоей". И тоѧ же ради болѣзни не може ити на Иерданъ. Иде братъ еѧ Д(а)в(ы)дъ и сестра еѧ Еоупраксиѧ и соущїи с ними. Ѡна же, лежащи на ложи своимъ, хвалѧше Б(о)га, г(лаго)лющи: "Г(оспод)и, призри на рабу Твою Еоуфросинїю, и помилоуй мѧ!" И прїидоша бывше на [л. 223 об.] Іердане, и принесоша ей воды ѡт Иѡрдана. Ѡна же с радостию воставши и прїемши и пивши, и ѡблиѧсѧ по всему тѣлу своему, и возлегши на ложи, и рече: "Бл(а)г(о)словенъ Б(о)гъ, просвѣщаѧ всѧкого ч(е)л(о)в(е)ка, грѧдущаго в миръ. В вѣкы молюсѧ ч(е)л(о)в(е)колюбивому Б(о)гоу, ревнующи Петровоу покаанїю, еже въ ѡтвръженїи не ѡтчаѧша себе, но плакасѧ горкѡ. Г(оспод)и, прїимый того покаѧнїе, прїимї и мене, недостойную рабу Твою Еоуфросїнїю, молѧщусѧ на супротивника своего дїавола, да не възг(лаго)леть ми на Страшнемъ Судѣ ничтоже пред Тобою, Г(оспод)и, ѡнъ злый рабъ, въстоупих бо ногама своима на змїевую его главу и супротивихсѧ дръзости его ѡка[я]нной, надѣющисѧ на Твое ч(е)л(о)в(е)колюбие, Г(оспод)и". И оуслыша Б(о)гъ м(о)л(и)тву еѧ, и посла Аггела Своего к ней, г(лаго)лющя: "Бл(а)жена [л. 224] ты еси в женах, бл(аго)с(ло)венъ трудъ твой! Се оуже ѡтвръзоша ти сѧ двери порѡдныѧ, и всѣ Агг(е)ли собрашасѧ, дръжаще свеща, чающе твоего срѣтенїа. А даръ, егоже просиши оу Б(о)га, дасть ти сѧ". И се рекъ Агг(е)лъ, ѡтиде ѡт неѧ.

      Бл(а)женнаа же Еоуфросинїа возрадовасѧ д(у)шею, и въскоре посла в лавроу С(вя)т(а)го Савы, г(лаго)лющи: "Се оуже приспѣ времѧ, да же мѧ Б(о)гъ покоить. І прїимете мѧ, абых легла въ ц(е)ркви С(вя)т(а)го Савы?" Ѡтвещаша же ту с[у]щїи иноци, г(лаго)люще: "Имѣемъ запрещенїе ѡт с(вя)т(а)го Савы, ѡже жены не приимати никоеѧже. Но се ти есть манастырь С(вя)тыѧ Б(огороди)ца Феѡдосиевъ ѡпщїи, в немже лежат с(вя)тыѧ жены: м(а)ти с(вя)т(а)го Савы, и м(а)ти с(вя)т(а)го Феѡдосїа, и м(а)ти с(вя)тую безмѣзднику Козмы и Дамиѧна именемъ Феѡдотиѧ, и инїи мнози с(вя)тїи; ту ти подобаетъ лещи". Пришедшу же посланному ѡт неѧ [л. 224 об.] и возвести Еоуфросинїи. Ѡна же ѡ всемъ похвали Б(о)га и, пославши, купи гробъ в комаре с(вя)тыѧ Б(огороди)ца. Лежаше же в болѣзни своей 24 дни, и познасѧ при сконьчанїи, и рече: "Призовите ми прозвитера, да ми дасть причащенїе с(вя)тых таинъ, оуже бо зватай близъ предстоит, ждый повелѣнїа Вл(а)д(ы)чнѧ". И прїиде прозвитеръ, несый причащенїе. Ѡна же, въставши, поклонисѧ трижды, и приемши Пр(е)ч(и)стое Тѣло и Ч(е)стную Кровь Х(ри)с(то)ву, и возлеже на ѡдрѣ своемъ, и предасть д(у)шу свою в руцѣ Б(о)га жива м(е)с(я)ца маѧ в 24, иде въ покой н(е)б(е)сный. Д(а)в(и)дъ же и Еоупраксиѧ и с прочимї спрѧташа тѣло еѧ ч(е)стно.

      Кыимъ оубо языкомъ, братїе, достоить ми похвалити свѣтозаръную памѧть пребл(а)женныѧ невѣсты Х(ристо)вы Еоуфросинїе! Бѧшет бо помощьница [л. 225] ѡбидимымъ, скорбѧщим оутѣшенїе, нагимъ ѡдѣнїе, больнымъ посещенїе, и спроста рещи, всѣмъ всѧка быс. Еоуфросинїа оубо с(е)рдце свое напаѧше Б(о)жїа прем(у)дрѡсти. Еоуфросинїа – неоувѧдающїй цвѣт райскаго сада. Еоуфросинїа – н(е)бопарный ѡрелъ, попарившиѧ ѡт запада до въстока, яко луча с(о)лн(е)чьнаа, просвѣтившиѧ землю Полотьскоую. Тѣм же, братїе, хвалитсѧ Селунь ѡ с(вя)т(о)мь Димитрїи, а Вышегород м(у)ч(е)н(и)кома Борисомъ и Глѣбомъ. Азъ же хвалюсѧ: бл(а)женъ сей ты, граде Полоцкый, таковоу лѣторасль возрастивый – пр(е)п(о)д(о)бную Еоуфросинїю. Бл(а)женїи людїе, жывущеи во граде томъ. Бл(а)жени родители твои, бл(а)жена оутроба, ѡт неѧже изыде пр(е)п(о)д(о)бнаа г(оспо)жа Еоуфросинїа. Бл(а)жено р(о)ж(е)ство еѧ, бл(а)жено воспитанїе еѧ, бл(а)женъ [л. 225 об.] и возрастъ еѧ, Еоуфросинїи достохвалныѧ. Бл(а)женъ троудъ твой и подвизи, ѧже къ Б(о)гоу. Бл(а)женъ и манастырь твой, бл(а)женї и живущїи в манастыри С(вя)т(а)го Сп(а)са и С(вя)тыѧ Б(огороди)ца. Бл(а)женї и людїе, послоужившеи тебѣ. Но, ѡ пребл(а)ж(е)наѧ невѣста Х(рист)а Б(о)га нашего, молисѧ к Б(о)гоу ѡ стаде своемъ, еже еси совокупила ѡ Х(рист)е, яко Тому подобаетъ всѧка слава, ч(е)сть и покланѧнїе съ Ѡтц(е)мъ и со С(вя)тымъ Д(у)хѡм н(ы)не и пр(и)сно и в вѣки вѣкомъ. Амин.

^1-1 Написано на поле. ^2-2 Зачеркнуто: и яко пара. ³ Поидо – так в рукописи.