Innocentius episcopus etc. archiepiscopo et episcopis ac dil. fil. decanis, archidiaconis, prepositis et aliis ecclesiarum prelatis per Livoniam, Estoniam et Prusciam constitutis, ad quos littere iste pervenerint.
      Attentione vigili debent omnia evitari, que casum dubium et discrimen continent manifestum. Sane non absque cordis anxietate percepimus, quod sevissimi Tartari, christiani nominis inimici, et ipsorum complices terras Livonie, Estonie, Pruscie ac alias, quas in partibus illis dil. fil. fratres hosp. s. Marie Theuton. non sine magnis laboribus et expensis ac proprii effusione sanguinis, divina potentia suffragante, reduxerunt ad culmen catholice veritatis, occupare ac destruere moliuntur. Cum autem dignum sit et congruum, ut per sedem apost., cui divinitus omnium cura fidelium commissa esse dinoscitur, super hoc salubre consilium apponatur, nos de vestra circumspectione confisi, universitati vestre per apostolica scripta mandamus, quatenus contra Tartaros et complices memoratos in dictis terris verbum crucis per vos et alios ad hoc ydoneos predicetis, eam auctoritate nostra peccatorum veniam et illas immunitates assumentibus crucem huiusmodi concessuri, que transfretantibus in terre sancte subsidium in generali concilio sint concesse.
      Datum Asisii decimo quarto Kalendas Junii anno undecimo.