Во имѧ С(вя)тыѧ Тро(и)ца станьсѧ.
      Се ѧ, кнѧзь Иванъ Семенович Кобрынскїй, будучи оу полном своемь розумѣ, | безь каждого припужѣньѧ чиню знакомито симь моимь листом каждому доброму нинѣшним и потом | будучим, кому будет потребь того видѣти алибо чтучи слышати.
      Записую и вѣную женѣ моеи | кнѧгини Федцѣ, дочьцѣ пана Ивана Рогатинского, а кнѧзѧ Андрѣѧ Володимировича внуцѣ, | на тых двух дѣлницах ѡтчизны моеѣ, которых же есми еи не записал, двѣ тисѧчи золотых оугорскихь. | А ѡна имаеть держати тыѣ двѣ дѣлници ѡтчизны моеѣ и поживати со всѣми доходы и приходы, | как я самь имѣлъ дотыхмѣстъ, доколь еи ѡтложит двѣ тисѧчи золотых кто будет ближшїи к тым двѣ|ма дѣлницам ѡтчизны моеѣ. А коли ближниѣ мои ѡтложат тыѣ двѣ тисѧчи золотых, и ѡна имаеть тых | двух дѣлниць ѡтчизны моеѣ поступити имь. А жона моѧ кнѧгини Федка, взѧвши тых двѣ тисѧчи | золотых, волна даровати и ѡтдати и на ц(е)рк(о)вь дати и куды хотѧ обернути кь своеи воли. |
      А при том моемь записном листу был ѡт(е)ць нашь Дамїанъ вл(а)д(ы)ка Володимирскїи, а кн(я)зь Михаило Сенгушко|вичь, а ловчїи королевь пан Янъ Мишкович, а дворѧнинь королевь пан Юрьи Кондратович, а дворѧнинь | королевь пан Богушь Боговитинович, а пан Завиша Романович, а пан Млѣчко Сачкович, а писарь королевь | ключникь Берестїискїи пан Левъ Боговитинович, а бояре наши Сугакь Бѣликович, Сенко Проступчичь, | Пронко а Мрочко.
      А про оутвержѣнье сего моего листа и печат есми свою приложил кь сему моему листу. | И тых добрых людїи есми просил, штобы и свои печати приложили кь сему моему листу. И ихь м(и)л(о)сть приложилї: | ѡ(т)ца вл(а)д(ы)ки Володимирского Дамїанова печат, кнѧзѧ Михаилова печат, пана Янова печат, пана Юрьева | печат, пана Богушева печат, пана Завишина печат, пана Млѣчкова печат, пана Лъвова печать. |
      Псан оу Добучинах, в лѣт 6995, м(е)с(я)ца ген[варя] 25, индикта 5.

На обороте записи: 1) 25 Januarii w Dobuczynach. № 54. 2) Lituania. 54. 3) Inscriptio [дальше буквы выцвели].