Universis Christi fidelibus per Russiam constitutis salutem et apostolicam benedictionem Honorius Episcopus servus servorum Dei.
      Legistis, ut credimus, et memorie commendastis qualiter Apostolus fieri mandabat in Ecclesia primitiva collectas, per quas posset Sanctorum multitudinis, qui erant in Jerusalem, necessitatibus subveniri, suo secuturo post se docens exemplo, ut in similibus simili consilio uterentur. Cum igitur venerabiles fratres nostri Livoniensis, Seloniensis et Lealensis Episcopi et alii, qui in partibus Livonie evangelizant Dominum Jesum Christum et eos qui jam per baptismum induerunt eumdem defendere satagunt ab incursibus paganorum, qui velut alie Amalechite impugnant multipliciter Israelem, ut eum vel in deserto perimant vel revocent in Egiptum, non sufficiant ad onera expensorum, nisi eis ex liberali subveniantur fidelium pietate. Universitatem vestram monendam duximus, et hortandam in remissionem vobis peccaminum iniungendo, quatinus de bonis vobis a Deo collatis, pro tam laudabili opere pias eisdem elemosinas erogetis, obligaturi vobis exinde bonorum omnium largitorem.
      Datum Laterani, XVI Kalendas Decembris, anno nono.