Мѣсяца того же авгоуста 21 день. Житие и терпѣние преподобнаго отца нашего Аврамья, просвѣтившагося въ терпѣньи мнозе, новаго чюдотворца въ святыхъ града Смоленьска. Господи, благослови.
      О пресвятый Царю, Отче и Сыне и Святыи Душе, Слово Божие, искони сыи вь вѣкы, сътворивыи небо и землю, видимая и невидимая, отъ небытья насъ въ бытие приведыи, и не въсхотѣ насъ презрѣти въ мнозѣи прелести мира сего, но посла на избавление наше Сынъ Свои единочадыи. Глаголеть бо пророкомъ Духъ Святыи: "Не ходатаи, ни Аггелъ осия ны, но Самъ сыи преклонь небеса и сниде, и родися отъ Святыя и Пречистыя и Неискусобрачныя Приснодѣвыя Мариа безъ сѣмени отъ Святаго Духа, и поживъ яко человѣкъ на земли, и страсть претерпѣ отъ твари Своея, и смерть вкуси на крестѣ, безстрастенъ сыи и бесмертенъ божествомъ, и въ гробѣ положенъ, и въскресе третии день, явися оученикомъ своимъ и оувѣривъ я, и многа знамениа и чюдеса показа предъ оученикы, и взыиде на небо къ Отцю и сѣде одесную, и посла Святыи Свои Духъ на святыя апостолы и тѣми вся языкы просвѣти и наоучи истиннѣ вѣровати и славити Бога и се заповѣдаа глаголаше: "Се Азъ с вами есмь по вся дни до скончания вѣка". И се, преже написаниа молю Ти ся: "Господи Исусе Христе, Сыне Божии, молитвами Пресвятыя и Пречистыа Дѣвы Матере и всѣхъ небесныхъ силъ, и всѣхъ святыхъ молбами, и даи же ми разумъ просвѣщенъ Божиею благодатью, подаждь мнѣ, худому и грѣшнѣишу паче всѣхъ свѣтлыи подвигъ житиа и терпѣниа начати, еже о житьи блаженаго Аврамиа, бывшаго игумена монастыря сего Святыя Владычица нашея Богородица, егоже день оуспениа нынѣ празднующи память чтемъ". Се же, братия, въспоминающоу житие преподобнаго и не сущу написану, печалью по вся дни обдержимъ быхъ и моляхся Богу: "Господи, сподоби мя вся по ряду писати о житьи богоноснаго отца нашего Авраамиа, да и по насъ сущии черноризци, приемше наказание и почитающе Ти, видѣша доблѣсть, въсхвалятъ Бога, и оугодника Его прославляющи, и на прочии подвигъ оукрѣпяться, паче же въ странѣ сеи, яко такъ мужь явися, оугодникъ Божии". О семъ бо рече Господь пророкомъ, яко "отъ утробы матерня възвахъ тя". Хотящоу же ми начати исповѣдати, преже молюся Богови, глаголя сице: "Владыко мои Вседержителю, благымъ подателю, Отче Господа нашего Исуса Христа, прииди на помощь мнѣ и просвѣти сердце мое на разумѣние заповѣдии Твоихъ, отвръзи оустнѣ мои на исповѣдание оустенъ Твоихъ и чюдесъ и на похваление святаго Твоего оугодника, и да прославиться имя Твое, яко Ты еси помощникъ всѣмъ оуповающимъ на Тя въ вѣкы".
      Бѣ бо сеи блаженыи Авраамеи отъ вѣрну родителю рождься [в одной из редакций добавлено: отъ отца имянемъ Семиона и матери Марьи], бѣста и та въ законѣ Господни добрѣ живуща благочестно. Бѣ же отець его всѣми чтимъ и любимъ, отъ князя честь приемля, бѣ бо воистинну отъ всѣх опознанъ, яко и правдою оукрашенъ, и многымъ въ бѣдахъ помагая, милостивъ и тихъ къ всѣмъ, къ молитвѣ и ко церквамъ прилежа. Такоже и мати его всѣмъ благочестиемъ оукрашена. Таже не яко неплоды бѣста: двѣманадесятъ дщеремъ отъ нею рождьшимся, и не бѣ има отрочате. И се бысть има отъ Божиа строениа. Многымъ желаниемъ моляста Бога подати има отроча, многы же обѣты и милостыня церквамъ и монастыремъ дающа. И послоуша ею Богъ и дасть има отроча. Еще бо емоу носимоу въ оутробѣ матрьни, обави и Христова благодать, и възва, освяти и яко преже Самоила Аннѣ подасть. Бысть бо она нѣкая дѣва и блаженая черноризица. Отъ Божиа промысла нѣкогда, недѣли соущи, бысть еи оу заоутрении год[ин]ѣ опочивающии. И оудариша въ двери и възваша ю: "Скоро въстани и поиди, яко Марья отроча роди, имаши е ты крещати". "И се бысть, – глаголаше, – ми, яко на явѣ. И вшедшу ми в домъ къ матери его, яко отроча мыяху, мнози же святители свещеннолѣпно, яко крещениемъ благодати освящающи, и нѣкая жена, вельми пресвѣтла сияющи, предстоящи и одежоу бѣлу, яко подобноу снѣгу бѣлѣиши, дръжащи, и слугамъ [во]прашающимъ: "Кому, Госпоже, дати отроча се?" И повелѣ имъ к собѣ принести. Она же свѣтлою оною ризою, яко свѣтомъ, одеже и, и дасть матери его. Се же сказающи ми матери его и она глаголаше: "В тотъ часъ отроча оживе въ утробе моеи".
      И свершившим же ся днемъ рождению, родиста блаженаго дѣтища, таче въ осмыи день принесоста къ святителю Божью, якоже обычаи есть христианомъ, имя дѣтищу нарещи. Прозвитеръ же, видѣвъ дѣтища, сердечныма очима и благодатью Божиею прозряше о немъ, яко хощеть Богоу измлада датися. Таче минуша 40 дни дѣтищу, крещениемъ освятиша и. Отрочя же ростяше и кормимо родителема своима, и благодать Божиа бѣ с нимъ, и Духъ Божии измлада в онь вселися. И егда же бѣ отрочатемъ [в одной из редакций добавлено: отроча Афонасии] Христовою благодатью въ возрастъ смысла пришедшоу, родителя же его даста и книгамъ оучити. Не бо оунывааше, яко и прочая дѣти, но скорымъ прилежаниемъ извыче, к сему же на игры съ инѣми не исхожааше, но на боже[с]твенное и на церковное пѣние и почитание преже инѣхъ притекая, яко о семъ родителема радоватися, а инѣмъ чюдитися таковому дѣтища разоумоу. Господня бо бѣ благодать на немъ, просвѣщающи разоумъ его и наставляющи на путь заповѣдеи Христовыхъ.
      Егда же въ болшии възрастъ прииде, всею телесною красотою и добротою, яко свѣтъ, сияше; родителема же его къ бракоу приноужающимъ, но тъи самъ не въсхотѣ, но паче пооучивъ ею и наказавъ презрѣти и възненавидѣти житеискую сию славоу, прелесть мира сего и въсприяти мнишескыи чинъ. Тѣма же отшедшима житиа сего къ Богоу, онъ же повелику обрадовася и дасть Богоу славоу, тако изволшему, богатьство же, яже остависта родителя его, оубогымъ раздаде, вдовицамъ, и сиротамъ, и черноризцемъ все, бояся и како бы бес печали всѣхъ земныхъ отъити и наставити мысль свою къ Богу и оутвержая и оучася Господню словеси, глаголющемоу: "И аще кто не възметь креста своего, не поидеть въслѣдъ Мене, нѣсть Мнѣ подобенъ". Богодухновеныя же книгы и святыхъ житиа почитая, и како бы ихъ житиа и труды и подвигъ въсприяти, измѣнися свѣтлыхъ ризъ и в худыя ся облече, и хожааше, яко единъ отъ нищихъ, и на оуродство ся преложь и расмотряя, и прося, и моляся Богоу, како бы спастися и в кое мѣсто приити. И оутаився всѣхъ, Богу наставляющоу, отшедъ отъ града дале 5 [в одной из редакций: десять] поприщь, острижеся, якоже мнози вѣдятъ святые Богородици монастырь къ востоку, Селища [в одной из редакций: к высоку Седалищу] нарицають. И бысть оттолѣ по благодати Христовѣ болии на подвигъ и на вся троуды подвизаяся и мыслью въспоминая святаго града Иерусалима и гробъ Господень и вся честная мѣста, яже Избавитель Богъ и Спасъ всего мира идеже страсть приятъ нашего ради спасениа, и вся честная мѣста и преподобныхъ отець поустыня, идеже соуть подвигъ и троудъ свершивше: дивнаго началника всѣмъ и восиявшаго Ангеломъ равна великаго мню Антониа, бывшаго крѣпка, храбра и побѣдившаго силою крестною духы неприязненныя, Илариона, бывъшаго оученика его, по немъ свѣтлаго в постьницѣхъ чюдотворца Еоуфимьа, иже по нихъ Савоу и Феодосья архимандрита, и стареиша всѣх наставника черноризцемъ, соущимъ окрестъ Иерусалима. Изъ всѣхъ любя часто почитати оучение преподобнаго Ефрѣма и великаго вселеныя оучителя Иоанна Златоустаго и Феодосия Печерьскаго, бывшаго архимандрита всеа Руси, и вся святыхъ богодухновенныхъ книгъ житиа ихъ и словеса проходя и внимая, почиташе день и нощь, беспрестани Богоу моляся и поклоняяся и просвѣщая свою душю и помыслъ, и кормимъ словомъ Божиимъ, яко дѣлолюбивая пчела, вся цвѣты облѣтающи и сладкую собѣ пищоу приносящи и готовящи, такоже и вся отъ всѣхъ избирая и списая ово своею рукою, ово многыми писци, да якоже пастоухъ добрыи, вся свѣдыи паствы и когда на коеи пажити емоу пасти стадо, а не якоже невѣжа, не вѣдыи паствы, да овогда гладомъ, иногда же по горамъ разыдоуться блоудяще, а инии отъ звѣреи снѣдени будоуть. Тако всѣмъ есть вѣдомо невѣжамъ, взимающимъ санъ священьства. Такоже и корабленикъ и хитрии кормници, вѣдоуще поуть и пристанище ихъ, милости ожидающе отъ Бога и подобна вѣтра, а не противоу боури и волнамъ морьскымъ, но съ Божиею помощью како ити нареченнаго града бес пакости и потопления. Аще ли въ градъ далнии хотяще поити, тъ вѣдоущихъ просимъ, егда соуть поути различнии и мѣста соущихъ разбоиникъ, и того всего боимся и молимъ Бога, дабы безъ всякоя бѣды доити. Но на прежереченная възвратимся, отнележе начахомъ, о дарехъ слова Божия, данное отъ Бога преподобному Авраамию. Якоже кто хотя нареченъ быти воеводы отъ царя, то не вся ли събираетъ храбрыя оружникы и тако стати крѣпко, оурядившеся на противныя, съ Божиею помощию настоупити и побѣдити, тако и сеи такомоу дароу и трудоу божественыхъ писании и прилежа и почитая, и како бы свои корабль своея душа съ Божиею помощию съблюсти многыхъ боурь и волнъ, рекоу, напастеи отъ бѣсовъ и отъ человѣкъ, съ оупованиемъ не погруженну отъ сихъ бѣдъ онаго пристанища спасенаго доити и в тишину небеснаго Иерусалима Бога нашего приити. Пишетъ бо: "Смерть, искоушениа и брань, – по святым книгамъ, – наше же житие се есть, яко неоудобь есть без напасти прѣити никомоу же". Аще бо самъ Владыко Спасъ Господь и Творець всѣмъ, и създавыи вся, и пришедъ на спасение наше отъ Пречистыя Дѣвица Богородица, толикоу страсть приятъ отъ своея твари, кромѣ бывъ всякаго грѣха, всѣхъ святыхъ колко не то же ли претерпѣша и тако оулучиша Царство Небесное, егоже полоучити и мы молимся.
      Пребысть же блаженыи Авраамии въ прежереченнѣмъ монастыри въ трудѣ и въ бдѣнии и въ алкании день и нощь, якоже и самому игумену, зрящу добраго житья, радоватися и всеи братьи славити Бога, и мноземъ отъ мира притекати отъ него оутѣшение приимати отъ святыхъ книгъ. И бѣ въ всемъ повиноуяся игумену и послушание имѣа къ всеи братьи, и любовь и смирение имыи и Бога ради покоряяся всѣмъ. Искоусивъ же его игуменъ, яко въ всемъ повинуется емоу и послушаеть и, бѣ бо и самъ игоуменъ хитръ божественымъ книгамъ и вся свѣдыи и проходя, якоже мнози свѣдятъ, и никтоже смѣя предъ нимъ отъ книгъ глаголати, и принуди же блаженаго Авраамиа прияти священическыи санъ. И поставленоу ему бывшу дьякономъ и потомъ иерѣемъ при княженьи великого и христолюбиваго князя Мьстислава Смоленьскаго и всея Роускыа. Прием же блаженыи священныи санъ, болшее смирение приатъ, яко такоу благодать Христосъ ему дарова. Божественую же Литургию съ всяцѣмъ тщаниемъ, иже за всего мира Христосъ повелѣ приносити, не единого же дне не остави, якоже и мнози вѣдять его бывша и до самое смерти и не оставившаго церковная правила и Божественая Литоургиа и своего подвига. Нищетоу же, и наготоу, и оукорениа же отъ диявола, и тоугу и искушение отъ игоумена и отъ всее братьи и отъ рабъ кто можеть исповѣдати? Якоже ему самомоу глаголати: "Быхъ 5 лѣтъ искушениа терьпя, поносимъ, бесчествуемъ, яко злодѣи". Якоже не терпя его и видя себе диаволъ побежена отъ святаго, и воздвиже нань сию крамолу своими совѣты, хотя и оттоле прогнати, якоже и бысть. Видя бо диаволъ, яко мнози отъ града приходять и оучениемъ духовнымъ его множатся, отъ многыхъ грѣхъ на покаяние приходять, аще ли и сице рѣчемъ: Богоу хотящоу, яко нѣсть лѣпо свѣтилникоу во тмѣ сияти и оукрытися градоу, выше горы сущу. Пишетъ бо о великомъ свѣтитѣли и оучители всего мира, о Златаустѣмъ Иоанѣ, яко егда отъиде в пустыню и пребысть нѣколко врѣмя въ пустыни, яко многымъ трудомъ и въздержаниемъ и алканиемъ приятъ врѣдъ и ноужу отъ тѣла, якоже бысть и се ему отъ Божиа промысла, да не оучитель далече града будеть, оттолѣ выиде въ градъ, оуча и наказоуя на страхъ Господень. И сице же и семоу бысть отъ дияволя наоучениа, ибо нѣции отъ ерѣи, дроузии же отъ черноризець, како бы нань въстати, овии же отъ града потязати и оукорити исходяще, дроузии спироу творяще, яко ничтоже свѣдоуща противу насъ глаголааху, и тако посрамлени съ стоудомъ отхожаахоу. И пакы не преставааху крамолы нань въздвизающе въ градѣ и везде, глаголюще: "Се оуже весь градъ к собѣ обратилъ есть". Есть бо, о братие, о семь приложити слово на оутѣшение вамъ: тако бо бѣ благодатью Христовою оутѣшая приходящаа и плѣняя ихъ душа и смыслъ ихъ, дабы възможно и неотходящоу быти, якоже и семоу мнози соуть послуси, якоже и самомоу игоуменоу не стерпѣти, многыя к немоу видя протекающаа, и не хотя того, его отлоучи и глаголаше: "Азъ за тя отвѣщаю оу Бога, ты же престани оуча", и много озлоблениа нань возложи. И оттолѣ [в одной из редакций добавлено: изыде преподобныи Авраамии изъ монастыря своего изъ Высокоседалного и] вниде въ градъ и пребысть въ единомъ монастыри оу Честьнаго Креста. И тоу начаша болѣ приходити и оучение его множаишее быти, а врагъ сѣтоваашеся, а Господь Богъ раба Своего прославляаше и съблюдааше на всяко время, благодать и силоу подавая рабу Своемоу. И пребысть мало время и отъ многъ приемля оутѣшение, подаваахоу емоу на потребоу и лише потребы, и потомъ скоро раздаваше вдовицамъ и нищимъ, а самъ еже [на] потрѣбоу собѣ приимаше. Оукраси же церковь иконами и завѣсами и свѣщами. И мнози начаша отъ града приходити и послоушати церковнаго пѣниа и почитаниа божественыхъ книгъ, бѣ бо блаженыи хитръ почитати, дасть бо ся емоу благодать Божиа не токмо почитати, но протолковати, яже мнозѣмъ несвѣдоущимъ и отъ него сказаная всѣмъ разоумети и слышащимъ и семоу изъ оустъ и памятью сказая, якоже ничтоже ся его не оутаить божественыхъ писании, якоже николи же оумлъкнуша оуста его къ всѣмъ, к малымъ же и к великымъ, рабомъ же и свободнымъ и рукодѣлнымъ, тѣмже ово на молитву, ово на церковное пѣние, ово на оутѣшение притекающимъ. Яко и в нощи мало сна приимати, но колѣнное покланяние и слезы многы отъ очью безъщоука [sic] излиявъ, и въ перси биа и кричаниемъ Богоу припадая помиловати люди Своя, отвратити гнѣвъ Свои и послати милость Свою и належащихъ бѣдъ избавити ны и миръ и тишиноу подати молитвами Пречистыя Дѣвы Богородица и всѣхъ святыхъ. Написа же двѣ иконѣ: единоу Страшныи судъ втораго пришествиа, а дроугоую испытание въздушныхъ мытарьствъ, ихже всѣмъ нѣсть избѣжати, якоже великыи Иоанъ Златаустъ оучитъ, чемеритъ [в других списках: лют] день поминаеть, и самъ Господь и вси святии Его се проповѣдають, егоже избѣжати нѣгде, ни скрытися, и рѣка огнена предъ соудищемъ течеть, и книгы разгыбаются, и соудии сѣде, и дѣла открыются всѣхъ, тогда слава и честь и радость всѣмъ праведнымъ, грѣшным же моука вѣчная, еяже и самъ сотона боится и трепещеть. Да аще страшно есть, братье, слышати, страшнѣе боудеть самомоу видети.
      Се же оставльше, на се пакы обратимся, яже о блаженѣмъ Аврамьи. И сего оубо не престааше страшнаго поминая соуда, испытаниа бояся и не прѣстая прилѣжно Бога моля и в нощь и въ день, и къ всѣмъ приходящимъ оного страшнаго дне не престая о томъ глаголя и почитая великаго оного и свѣтлаго оучителя вселеныя Иоана Златаустаго и преподобнаго Ефрѣма и всѣхъ богогласныхъ святых, Святаго Духа, глаголанаго ими, собѣ внимая и всѣмъ проповѣдая. И бѣ блаженыи съ въздерьжаниемъ отъ многаго пития, пьяньства же отиноудь ненавидя, ризы же по смирению любя, драгыхъ велми бѣгая и смирение присно имѣа, на трапезы же и на пиры отиноудь не исходя, многыхъ ради зазирании, яже бывають отъ мѣста избирающихъ, и инѣхъ ради многыхъ, яже бывають отъ многаго ради пьяньства и бѣды, и того ради сего оубѣгааше. Образъ же блаженаго и тѣло оудручено бяше, и кости его и състави, яко мощи, исщести, и свѣтлость лица его блѣдъ имоуще отъ великаго троуда и въздержания и бдѣния, от многъ глаголъ, яже тружаашеся, поя и почитая и молитву принося къ Богу. И къ божествномоу егда пристоупаше жертвенику, на божествное приношение отъ Господа прѣданую апостоломъ на вечери, и апостолы намъ оного завѣта въ оставление грѣховъ, съ благобоязньствомъ и съ вниманиемъ; отиноудь запрѣщаше же въ церкви не глаголати, паче же на Литургии, и заповѣдая и оуча, всю имѣти веля мысль и съ душею тогда къ Богу строино же, по чиноу, лѣпо. Егда оустраяшеся въ священчьскыи санъ, образъ же и подобье на Великого Василья: черноу брадоу такоу имѣя, плешиву развѣ имѣя главоу. Но не зазрите ми, братье, моеи гроубости, не лжа бо си глаголю или какою хытростью или мудростью, но многыхъ ради, иже его не видѣша и не слышаша, и въспоминаю Господа, глаголюща: "Рабе лѣнивыи и лоукавыи, подобааше ти дати сребро мое коупцемъ, да азъ быхъ на нихъ взялъ с лихвою"; тѣмъ, бояся сего осоуждениа, сия написаю, да сего послоушавше, прославимъ Бога, давшего сию благодать и помощъ градоу Смоленьскоу, блаженаго Авраамья.
      Хотящоу же ми и еще глаголати, помозѣте ми въ молитвахъ вашихъ, да ми подасть Господь и конець свершити положити хотящимъ почитати и поревновати житью преподобнаго или прѣписати и великоу отъ Бога милость прияти сде и въ боудоущии и страшныи день възданиа Христова. Но на прежереченая поминая възвратимся, отнюдоу же поидохомъ. Видя же себе сотона побѣжена Христовою силою отъ святаго, яко являашеся емоу овогда в нощи, овогда въ день, оустрашая и прѣтя, яко огнь освѣщаа и в нощи, яко мнозѣмъ еще не спящимъ с нимъ, да овогда стужая, ово являяся въ мнозехъ мечтаниихъ, яко и до стропа, и пакы яко левъ нападая, яко звѣрие лютии оустрашающе, дроугое яко воини нападающе и сѣкоуще, иногда и съ одра и смещоуще. А егда отъ сна въстаяше блаженыи, по малоу сна оукоусивъ отъ злыхъ окаянныхъ бѣсовьскыхъ мечтовъ, и въ день болѣ емоу о семь стужающе, тѣмже ово собою, ово въ жены бестоудныя прѣображающеся, то же, яко о Великомъ Антонии пишется. Видя Господь силоу неприязнину и его злобу на ны, не попоусти вся воли его, но якоже самъ вѣсть, тако и попоущаеть по силѣ и приимати его брань, якоже Господь въ Еоуангельи рече, яко ни на свиньяхъ имать власти без Божиа повелѣниа, да искусни Божии раби явятся. К семоу же оучитъ Златаоустъ, глаголя: "Господи, аще попоустиши единого врага, то ни весь миръ ему не удолѣеть, то како азъ възмогоу, калъ и берние". Оукрѣпивыи же Антониа и явлься емоу, дръзати повелѣвъ: "Не боися: Азъ ти помогоу". И то же и сему блаженому Свою благодать и силу подавааше и избавляше. И сими блаженаго всѣми искусивъ сатана и не оудолѣвъ, Богоу помагающоу. И тоу крамолоу нань въздвиже, якоже и при Господи бысть. И вшедъ сотона въ сердца июдеомъ, и съвѣтъ сътворше нань и много пороугавшеся и страсти предаша Господа славы; сице же и на сего бысть: якоже бо сотона отъ прѣжняго монастыря отгна, сице и нынѣ сътвори. Не могыи окаянныи терпѣти бывающая ради благодати и помощь вѣрнымъ и христолюбивымъ христианомъ и отъ всѣхъ побѣжаемъ силою Христовою. Но яко есть пасоущихъ душа приимати бѣды, и вшедъ сотона въ сердца бесчинныхъ, въздвиже нань: и начаша овии клеветати епископу, инии же хоулити и досажати, овии еретика нарицати, а инии глаголахоу нань: "Глубинныя книгы почитаеть", инии же къ женамъ прикладающе, попове же зиающе и глаголюще: "Оуже наши дѣти вся обратилъ есть", дроузии же пророкомъ нарицающе и ина же многа нань вѣщания глаголюще, ихже блаженыи чюжь. Истинною рекоу тако: никтоже аще бы не глаголя на блаженаго Авраамиа въ граде, но диаволъ о семъ радоваашася, а блаженыи все, радуяся, терпяше о Господи. Събраша же ся вси отъ мала и до велика весь градъ нань, инии глаголють заточити, а инии къ стѣнѣ тоу пригвоздити и зажещи, а дроузии потопити и, проведше въсквозѣ градъ. Всѣмъ же собравшимся на дворъ владычень, игоуменомъ же и попомъ и черньцемъ, княземъ и боляромъ, диакони и вси церьковници, внегда послаша по блаженаго, оуже всѣмъ собравшимся. Посланыя же слоугы, емше, яко злодѣа влачяхоу, овии роугахоуся емоу, инии же насмихаахоуся емоу и бесчинная словеса кыдающе, и весь градъ, и по торгоу, и по оулицамъ, вездѣ полна народа, и моужи же, глаголю, и жены, и дѣти, и бѣ позоръ тяжекъ видѣти. Блаженыи же бѣ, яко птица, ятъ роуками, не оумѣа, что глаголати или что отвѣщати, но едино оупование имѣа къ Богоу и къ Немоу моляся отъ такоя избавитися печали и в собѣ въспоминая страсть Господа нашего Исуса Христа, яко вся си претерпѣ нашего ради спасениа, и за нихъ моляся: "Господи, не постави имъ грѣха сего и не попусти на раба Твоего предатися в роуцѣ ихъ, но оукроти и запрѣти, якоже предъ оученикы на мори вѣтру повелѣ оумолкноути". Якоже и бысть. Князю бо и властелемъ оумягъчи Богъ сердце, игоуменомъ же и ереомъ, аще бы мощно, жива его пожрети.
      Ведомоу же ему на снемъ, явися Господь в то время преподобномоу Лоуцѣ Проусиноу оу церькви Честнаго Архангела Михаила. Стоящоу емоу на молитвѣ въ 9 часъ, и гласъ бысть емоу, глаголющь, яко: "Се возводять блаженнаго Моего оугодника на снемъ съ двѣма оученикома, истязати хотять, ты же о немь никакоже съблазнися". И глаголаше блаженыи Лоука на снимающихся на блаженаго Аврамия и на оуничижающихъ его: "Много бо бес правды хулящеи и оуничижають; но да быша грѣси его на мнѣ были! И вы слышасте, яко хотѣша сътворити преже сего, не имуще страха Божия, и тации же безоумнии, и епископъ, и како хотѣша бес правды оубити и. Иже и еще порокъ золъ и хоула и клятва зла и гнѣвъ Божии и за 30 лѣтъ пребысть и еще вы пребоудеть, аще ся того не покаете". [В одной из редакций добавлено: Сие же имъ глагола Лука Просинъ, они же глаголомъ его ни внимающе.] Понеже възвратимся, о немже начахъ глаголати. Приведеноу же бывшоу блаженному на соудъ, ничьсоже нань вины не обрѣтающимъ, но бещиноу попомъ, яко воломъ, рыкающимъ, такоже и игоуменомъ, князю же и велможамъ не обрѣтающимъ такыя вины, но изискавше все, нѣсть неправды никоея же, но все лжоуть. Тогда яко единѣми оусты: "Не повинны да боудемъ, владыко, – рекоуще, – къ всѣмъ, еже такоу нань крамолоу въздвигнули есте, и не повинни есмы, иже нань глаголетѣ или что съвѣщаете, како любо безаконно оубииство". И глаголюще: "Благослови, отче, и прости, Аврамие". И тако отъидоша въсвояси. Видѣвше же сия тако отъидоша и яко нѣсть имъ конца, в чемъ осоудити и, и рѣша отъ епископа на се приготованнымъ крѣпко стрѣщи и и блюсти и и ина два отъ оученикъ его, иже преподобному служаща добрѣ. Наоутрия же събравшимся, игумени и ереи, и вины, яже преже глаголаахоу, оукоривше, озлобивше, възложиша нань. [В одной из редакций добавлено: Епископъ же виде велию крамолу на Аврамия в людехъ и запрети ему, крамолы ради, да не приемлеть приходящих человѣкъ к нему и не бесѣдуетъ с ними отнюдъ, к тому же и заповѣда ему Божественныя Литоргии не служити и у Честнаго Креста въ монастыре да не пребудетъ, но идетъ въ монастырь на обещание свое в Высокоседалныи.] И отъ того времене пакы вниде в монастырь, идѣже бѣ преже остриглъся блаженыи. Яко не приемшу емоу никоего зла, се же отъ сего времене многа зла пребысть. Елико бяше блаженнымъ наоучено, вси ти обратишася на своя дѣла злыхъ грѣхъ. И слава Богоу, терпящему сихъ всѣхъ! И еще тогда блаженомоу Лазарю иерѣемъ соущоу и по Игнатьи епископоу бывшу, истинною рещи, яко поборникъ и пастоухъ Христовы церкве словесныхъ овець. Сьи бо бѣаше Бога ради оставилъ епискупью свою и за многое обидѣние святыхъ церквеи, иже обидятъ и властели, отъимающе чюжая бес правды и обидящихъ вдовица и сироты. Сьи бо видѣ и слыша, яко вся бес правды, яже на блаженаго Авраамиа оноу крамолоу въздвигноули, Богоу убо о семь възложившоу, сьи пришедъ глагола къ епископу Игнатию: "Великои есть быти опитемьи градоу сему, аще ся добрѣ не опечалиши"; якоже и бысть. Блаженыи Игнатии сего послоуша, скоро посла по всѣмъ игоуменомъ и къ всѣмъ попомъ, заповѣдая и запрѣщая всѣмъ отъ всякого речениа зла прѣстати, яже на блаженаго Авраамия: "Се бо, послушавъ васъ, на ся отъ Бога въсприяхъ въ вѣкы опитемью. А вы, чада, покаитеся, а сами вѣсте, что прияша отъ Бога въставшеи на великого Иоана Златаустаго; аще же не покаетеся, то то же и вы подъимете". Сего же ради блаженыи имя нареклъ себѣ, своего святьца подражая, якоже бо Иоанъ подражая много пострадалъ от оноя веси и за ня моляся Богоу, обращая вся къ Богу и спасая, блаженыи же терпя ихъ запрещение. Тако же бѣ и семоу ихъ запрещение, яко и никомуже не приходити к нему, мнози же мечници на всѣхъ путехъ стрѣжааху, а нѣции разграблени быша.
      Богоу же хотящу всѣмъ спастися, овогда же человѣколюбие Свое и милость являеть, овогда же казня, бѣды дая: глады, смерть, бездождье, соушу, тоуча тяжкыя, поганыхъ нахождениа, градъ плѣнение и вся, яже на ны отъ Бога приходятъ, и тѣми обращая и приводя к Собѣ, да не бо есмы безъ грѣха, а терпяще сихъ, рассудимъ, помянемъ, колико злыхъ, яже сътворихомъ и забытью предахомъ, в нощи же и въ день съгрѣшающе. Овии осоужаютъ и хоулятъ святителя и ереа и черноризца, а сами яко безъ грѣха суще. А слышасте Господа, глаголюща: "Святителя Моя и черноризца и ерѣа честьно имѣите и не осужаите ихъ", да не сами отъ Господа приимете горкыи соудъ, да не забоудете Господа, заповѣдающа, рече бо Господь: "За весь празднъ глаголъ въздати есть слово въ день соудныи». А Павелъ апостол, вселеныя оучитель, глаголеть: "Что осоужаете чюжаго раба, своемоу господиноу или стоить, или падаеть, или въстанеть? Силенъ же Господь поставити и". И пакы ихъ ради приходить гнѣвъ Божии на сыны непокоривыя. Тѣмже внимаи мы кождо себе: кождо за ся въздати имать слово въ день соуда. Достоино же есть и сде помянути слово, яже отъ житья преподобнаго Савы и о патриарсѣ Ерусалимьстѣмъ Ильи, егоже Анастасьи царь бес правды повелѣ изгнати отъ престола, иного в него мѣсто възведе. Якоже се оуслышаша въ Иерусалимѣ гражане, яко изгнанъ бысть патриархъ, и зело порадовашася семоу, яко за то прииде на ня гнѣвъ Божии и бысть на ня 5 лѣтъ глада, да накажоуться не радоватися о злѣ ни о коемъ же. Якоже приити икономоу къ преподобному Савѣ и глаголати: "Оуже суть братья не ядше всю недѣлю, да оуже есть намъ не оударити въ трапезѣ било". И преподобныи же Сава, оутѣшая, глаголаше, яко не имать Богъ презрѣти рабъ Своихъ. По глаголоу же преподобнаго бысть: нѣкто христолюбецъ, 30 велблоудъ имѣа, яже къ блаженому посла въ лавру, всякого брашна наполнивъ до изъобилья. Якоже призва иконома Сава и глагола к нему: "Есть ли оударити въ било?" Икономъ же повеликоу похули себе. А и еже о цари Анастасьи рекохомъ, иже патриарха Илью съ престола отгна, и гнѣвъ за то постиже Божии, яко сказають смерть его, яви бо ся облакъ и молниа развѣ о полатѣ царевѣ, тако гонимъ, оубьенъ бысть гнѣвомъ. Достоино же есть помянути зде о великомъ свѣтилѣ всего мира, яже на святаго Иоана Златаустаго въставше злии, погнаша и, явистася емоу великая апостола Петръ и Павелъ, глаголюща: "Дръзаи, страстотерпче Божии, Господь с тобою, миръ [ти] буди, моужаися и крѣпися, прияти бо имаши въздание – Небесное Царство и вѣнець свѣтелъ отъ Бога. А въставшеи на тебе лютою смертью отъ Бога казнь приимоуть, яже и наскорѣ прияти имоутъ и сде и въ боудоущии соудъ". Скончавъшоу же ся блаженомоу [в одной из редакций добавлено: Иванну в заточении в Команахъ Арменскихъ], сбысться проповѣдь святую апостолоу на крамольствовавшихъ и на отгнавшихъ святаго, да ови отъ епископъ напрасноую смерть приимахоу, инымъ же прыщые синиа по ногамъ бываахоу просѣдающеся, иномоу напрасенъ огнь, свыше сшедъ, роуцѣ и нозѣ оусоуши, иномоу же нога обѣтрися и нача гнити и претираемѣи еи, яко отъ тоя и другои тотъ же врѣдъ прияти, и въ три лѣта едва душю испусти, иномоу же языкъ яко затыка въ оустѣхъ бяше и в доскоу вписавъ, глаголаше свои грѣхъ, яко на святаго Иоана Златаустаго хулоу глаголахъ. Евдоксию же лютыи недоугъ порази, лономъ бо еи кровь грядяше, и потомъ бысть смрадъ и черви породи, и тако горкою смертию животъ свои злѣ сконча. Ибо видѣти гнѣвъ Божии, напрасно на нихъ находяи и многымъ мукамъ и смертемъ предая тяжко.
      Но на иже глаголанная възвратимся, да оуже о блаженѣмъ Авраамии помянемъ. Скоро на сихъ бысть, да овии отъ игуменъ, инии же отъ поповъ напрасную смерть приимахоу, яко вѣдущеи бывше въ сонмѣ на блаженнаго тоужаахоу и припадаахоу емоу на ногоу, прощениа просяще, а не бывше на сонмѣ радоваахоуся. Пишеть бо въ Златыхъ Чепехъ всея вселеныя святыхъ отець, яко бысть нѣкыи отецъ отъ преподобныхъ, многымъ ползу творя словомъ и житиемъ. Нѣции же отъ дѣиства дияволя завидѣвше и оклеветаша, много отсѣкоша отъ него и яже к немоу ползы лишиша, послѣди же оуразоумѣвше диаволю лесть и покаявъшеся к нему и прощение отъ него прияша, послѣди овии възбеснѣша, ови въ различныя впадоша бѣды грѣха ради. Рече бо Спас: "Смоущая васъ, тъи прииметь соудъ", кто любо буди. И не есть подобно помяноути повѣсть нѣкоего отца духовна къ сыноу духовноу: корабль есмы мы, кормникъ же – Богъ, всего мира направляя и спасая своими присными рабы, реку же, пророкы и апостолы, святителя и вся оучителя Божиа, дажде и до скончаниа вѣкоу семоу. Да аще мы на ся възмемъ инѣхъ осоужати, изгонити въ правду или бес правды, то оуже отняли есмы отъ Бога и отдали есмы ономоу противномоу, рекше, диаволоу, Божии корабль. Нынѣ же не вѣмы ся, в чемъ есмы, понеже ны взяла есть противная буря, а егда ны принесеть къ истоплению, тогда ся помянемъ безгода, яко никтоже насъ о своихъ грѣсѣхъ ноудится и плачеть, но ины осоужаемъ и хоулимъ. Якоже рече Господь: "Человѣци взяша соудъ Мои, оуже бо ихъ соудиша, Азъ имъ не соуждоу", того ради да не осоужени боудете отъ Бога. Аще бо кто прииметь благодать отъ Бога и даръ поучениа, то ни весь миръ таковаго можетъ оскорбити, имать бо надо всѣми Бога помощника. Якоже рече Господь: "Азъ есмь с вами, никтоже на вы".
      Се же оставльше, на ся възвратимся. Бывшоу же бездождью великоу въ градѣ, яко иссыхати земли и садомъ и нивамъ и всему плодоу земленомоу, яко нѣ за колко [в других списках: незаконно] бысть время всѣмъ тоужащимъ и молящимъ Бога, и самъ епископъ блаженыи Игнатии съ честнымъ крилосомъ и съ богобоязнивыми игоумены и ереи и дьяконы и черноризци и съ всѣмъ градомъ, моужи и женами и весь младыи възрастъ, вкупѣ весь градъ, окрестъ ходяше съ честнымъ крестомъ, и съ иконою дръжащею Господа, и съ честными святыхъ мощьми, и с великымъ оумилениемъ и съ слезами помиловати люди Своя и послати милость Свою на землю и отвратити гнѣвъ Свои: "Пусти, Господи, дождь, одожди лице земли, молимся, Святыи". И кончавшимъ постъ, крестомъ и святыхъ мощьми водоу освятивше и отъидоша кождо въсвояси. И не бысть дождя на землю, и быша в печали велицѣ. Се же все бысть отъ Божия промышления. И хотя Богъ блаженаго Авраамиа обьявити, нѣкоему помяноути възложи на сердце Богъ, соущоу иерею, яко шедъ помяноу христолюбивомоу епископоу Игнатию яже о блаженѣмъ Аврамии, глаголя сице: "Вси молихомся, не послоуша насъ Богъ. Кая вина така, яже на преподобнаго Авраамиа, яко лишенъ бысть Божественыя Литургиа? Егда и того ради бысть отъ Бога казнь си?" Тогда блаженныи Игнатии въскорѣ посла по блаженнаго Аврамия, и призвавъ и испытавъ, яко все лжа и оглаголание по зависти и злобѣ дияволи бысть, и прости и, глаголя: "И благослови, честныи отче, за невѣдѣние мое се ти сътворихъ, и весь градъ благослови и прости послоушавшихъ лживыхъ клеветникъ и оглагольникъ". И благослови пакы пречистоую и честноую Литоургию съвершати: "И моли Бога о градѣ и о всѣхъ людехъ, да помилоуеть Господь и подасть богатно дождь Свои на земьлю". И глагола блаженыи къ святителю: "Кто есмь азъ, грѣшныи, да сице повелѣвае[ш]и выше силы моея?" "Но, – глагола, – воля Божиа да будет о всѣхъ насъ. И ты преже о насъ помолися, честныи о святителю, о своемъ ти богопорученѣмъ избраннѣмъ святемъ стадѣ словесныхъ овець". Отшедшу же блаженомоу и молящоуся Богоу и глаголющю: "Оуслыши, Боже, и спаси, Владыко Вседръжателю, молитвами Твоего святителя и всѣхъ иереи Твоихъ и всѣхъ людии Твоихъ, и отврати гнѣвъ Твои отъ рабъ Твоихъ и помилуи градъ сьи и вся люди Твоя, и приими, Милостиве, всѣхъ въздыхание и съ слезами молящих Ти ся, и поусти и одожди, напои лице земли, человѣкы и скоты възъвесели. Господи, оуслыши и помилоуи". Еще преподобномоу не дошедшу своея кѣлия, одожди Богъ на землю дождь, яко славити Бога всѣмъ и глаголати: «Слава Тебѣ, Господи, яко скоро послоуша Своего раба!" И бысть многа радость въ градѣ. И оттолѣ начаша притѣкати въ градѣ и вси глаголати, яко помилова Богъ, избави ны отъ всѣхъ бѣдъ твоими, господи отче, молитвами. И отселѣ болѣ просвѣтися по благодати Христовѣ.
      Лепо же есть помянути и о житьи преподобнаго отца Феодосья Печерьскаго всеа Руси. Хотя Богъ вѣроу раба своего явити и отъ того мѣста на другое преселити, и пресвѣтлѣишу и пространнѣишу церковь възградити, и оуже оумножившися братьи, и показа Богъ чюдо в нощи, яко сказають, рекоуще: бысть яко дуга въ образъ отъ верха церковна, а дроугыи холмъ конець еа, и преподобнаго отца Феодосия идоуща съ иконою Пречистыя Богородица и братьи въслѣдъ идоуща и поюща, якоже и бысть потомъ. Такоже и нынѣ помянемъ о преподобнѣмъ Авраамии и о молитвѣ Пресвятыя Богородица и братьи въслѣдъ идоущи и поюща, якоже и бысть потомъ, и хотящимъ показати мѣсто, на немже блаженыи о Бозѣ хощетъ жити и инѣмъ мнозѣмъ, иже имуть с нимъ спастися. Преподобныи и богочестивыи Игнатии епископъ мышляше создати церковь камену въ имя святаго Игнатья в память собѣ, и есть вънѣ града и таково соуще мѣсто близь и равьно, оугодно на поставьление церкве и вся могоуще въсприяти рядъ монастырескъ, и скоупи ограды овощныя окрестъ его и постави церквицю во имя [святаго Игнатия] Богоносца, и потомъ тоу раздроушивъ и на ино мѣсто пресели, и основа болшу, и нарече во имя святое Владычица нашеа Богородица Положение честные ризы и пояса. И быша в немъ нѣколико братье, блаженымъ питаеми епископомъ Игнатиемъ. Некотории же боуяци несмыслении оунииждаахоу [в других списках: оуничижаху], глаголюще: "Аще хощетъ кто, да идеть на игоуменьство, имя нарицающе". Преподобныи же епископъ къ мнозѣмъ глаголаше, и благодатию же Божию прозря духовныма очима, яко имать прославити Богъ мѣсто се и молитва[ми] Пресвятыя Богородица, и мнози имоутъ в немъ спастися о Христовѣ благодати о Бозѣ пребывающе и в немъ притекающе христолюбивии людие. По мнозѣ же времени, Богоу о семъ промысляющоу, стоужаише же бо в себѣ блаженыи Авраамии, яко далече соущоу града приходящимъ, такоже блаженыи помянувъ епископъ Божию волею тогда, призва единого отъ своего честнаго крилоса перьваго отъ старѣишихъ протопопоу именемъ Георгии, глагола к нему о блаженѣмъ Авраамии, помяноувъ, яко далече емоу соущу града, скорбь емоу велья, да призоветь и скоро. Скоро же блаженныи прииде по повелѣнию епископа и вшедъ сътвори поклонение, глаголя: "Благослови, владыко святыи, раба твоего". Призва блаженаго Авраамиа епископъ, оутѣшая, глаголаше: "Како, отче, о Господи пребываеши?" Ономоу же рекшу: "Еи, владыко святыи, истинною молитвами твоими добрѣ". И рече к нему епископъ: "Хощу дати ти благословение, аще е приимеши". Отвѣщавъ блаженыи, глаголаше: "Честно есть благословение, яже нъ и даръ". И глагола к немоу епископъ: "Се благословение: поручаю ти и даю Пресвятые Богородици домъ; поиди, похваля Бога и славя, и моли о всѣхъ". Блаженыи же радоваашеся и хваляше Бога, такоу даровавшаго благодать рабоу Своемоу молитвами Святыя Богородица. И входящоу ему въ врата монастырьская, но како свѣтъ восия емоу въ сердци отъ Бога и с радостью просвѣщая душю его и помыслъ, якоже се всѣм повѣдааше, якоже сице, яко во снѣ видѣ лѣствицю, досязающоу до небеси, и глаголаше, яко есть Господь на семь мѣстѣ. То же то и семоу открываашеся, оуже бо Господь искоусна и яви. И събысться псаломъ Давидовъ: "Възведе человѣкы на главы наша и проидохомъ сквозѣ огнь и водоу и изведе ны в покои". Якоже бо царь по многыхъ побѣдахъ и троудѣхъ на болшии санъ и честь възводить своего воина, да оуже и семоу Господь Богъ самъ подаеть рабоу Своемоу оутѣшение, яко трудившоуся, и всѣхъ сердца обращая Своею благостью, далнимъ же и ближнимъ, и просвѣщая всѣхъ душа.
      И оттолѣ нача пребывати въ первѣм подвизѣ, и всѣмъ же притекающимъ с радостью великою, ибо велиа благодать Божиа на градѣ, вся просвѣщающи и веселящи и хранящи, избавляющи, тишиноу же и миръ и всѣхъ благыхъ на многа лѣта подающи, и еще не оскоудѣти имать молитвами Святыя Богородица и преподобнаго ради Авраамия и всѣхъ святыхъ Его. И оттолѣ прослави и Господь болѣ, занеже злѣ блаженаго оскорбивше обращатися начаша и припадати на ногу, просяще прощениа. Иже всѣми ненавидимъ бывъ, всѣми любимъ бысть, да иже преже бояхоуся приити, то оубо не боящеся, но радующеся приходяхоу, не точью гражане едини приходяхоу, но съ женами и съ дѣтьми, но и отъ князь и отъ вельможь, работнии же и свободнии притекаахоу, вси своя грѣхы к немоу исповѣдающи, и тако отхожааху в домы своа радующеся. Приемь же блаженыи домъ Святыя Богородица и оукраси ю, яко невѣстоу красноу же, якоже и преже и болѣ, рцѣмъ, иконами и завѣсами и свѣщами, якоже и нынѣ есть видѣти и всѣмъ притекающимъ в домъ ея милости и застоуплению, въ хвалу Богоу и оугодника его. Мнози же хотяхоу быти черноризцы, но не тоу абие постризааше, вѣдыи троудъ, искоушение велико отъ общаго всего врага. И се братьи числомъ 17. Сице же блаженыи искоушааше отъ Христовы благости, вся бо емоу Господь откровленая даяше разоумѣти, жити хотящимъ и к немоу притекающимъ тако отвѣщавая, глаголаше къ послоушливымъ и смѣренымъ, веля имъ часто притекати к собѣ, елико бо ихъ отъ златолюбьства и злобы, тѣхъ оудаляшеся, сице бо и отъ своихъ напастии много и отъ черноризець приимаше искоушение. Да того ради скоро не приимаше и. Искушаше же сице, вѣдыи по книгамъ, но слыша нѣкоего игоумена сице бывша, точью до 12 числомъ имяше мнихъ, два же въ искоусе. А егда кто хотяше отъ него пострищися, то знаменаше преже, къ коему братоу внидеть: да аще поидяше къ подвижну братоу, то стоя славяше Бога, роуцѣ въздѣвъ и о немъ моляся къ Господоу, аще ли не къ такомоу, то печаленъ бываше. Тоже но собѣ блаженыи помышляше, вѣдыи, яко ноудьно есть лѣнящимся сии подвигъ черноризьцѣмъ, а подвизающимся рече Господь: "Възмѣте иго Мое на ся и наоучитеся отъ Мене, яко кротокъ есмь и смиренъ сердцемъ, и обрящете покои душамъ вашимъ и оутѣшение, ибо яремъ Мои благъ и брѣмя Мое легко есть", всѣмъ притекающимъ к тобѣ истиннымъ сердцемъ. Великоу же любовь потомъ стяжаста блаженая: епископъ радоваашеся, яко таковаго дарова емоу Богъ свята и блаженна моужа, Авраамии же радоваашеся, яко тако дарова емоу Богъ свята и блажена епископа; Авраамии же пакы радовашеся, яко такъ даръ благодати приемъ отъ него. Мало же по такои любви поживъ епископъ, и преставися къ Богоу, по правдѣ рещи, воистинноу святоу и преподобноу и къ Богоу тако подвизася, отъ оуности потроудився и до самоя сѣдины великаго священичьства. И тако преставися къ Богоу святитель великыи Игнатии града Смоленьска, якоже въ преставленьи его мнози повѣдають о немъ, глаголюще, яко великъ свѣтъ сниде нань съ небесе, яко и страхъ нападе на вся, и тако взиде, радуяся, на небеса, свершивъ течение добрѣ о Господѣ Бозѣ. И вси въспросимъ милости отъ Бога, да помилоует ны по милости Своеи, яко дарова святителя таковаго градоу семоу.
      И оттолѣ болѣ начатъ подвизатися блаженыи Авраамии о таковѣмъ разлучении преподобнаго, въ смѣрении мнозѣ и въ плачи отъ сердца съ воздыханиемъ и съ стенаньми, поминааше бо о собѣ часто о разлучении души отъ тѣла. Блаженыи Авраамии часто собѣ поминая, како истяжоуть душу пришедшеи Аггели и како испытание на въздусѣ отъ бѣсовьскыхъ мытаревъ, како есть стати прѣдъ Богомъ и отвѣтъ о всемъ въздати, и в кое мѣсто поведоутъ и како въ второе пришествие предстати предъ соудищемъ страшнаго Бога, и какъ будеть отъ соудья отвѣтъ, и како огньная рѣка потечетъ, пожагающи вся, и кто помагая боудеть, развѣи покаяниа и милостыня и беспрестанныя молитвы и ко всѣмъ любы и прочая иная дѣла благая, яже обрѣтаются помагающия душа. Мы же сего ни на памяти имамъ, но ово о семь, а другое о иномъ станемъ, не имуще не единого слова отвѣщати предъ Богомъ. Пребысть же блаженыи в таковѣмъ подвизании вся дни лѣтъ живота своего, о семь бдя и моляся съ въздыханиемъ. Многы же наоучивъ и наказавъ пребывати въ добрѣмъ троудѣ, въ бдѣнии же и въ молитвѣ, въ терпѣнии же и смирении, въ милостыни же и въ любви, и сице оутверди вся съ слезами многами сихъ не забывати николиже и глаголаше: "И мене, смиренаго, не забываите въ молитвахъ вашихъ, молящися Владыцѣ и Богоу и Пресвятѣи Его Матери съ всѣми святыми Его". И потомъ болѣзни на блаженаго нашедши, и тако преставися, предавъ блаженую и святоую свою душю Господеви, Егоже желааше, и получи Царьство Небесное [в одной из редакций добавлено: мѣсяца августа въ 21 день в лѣто 6000.... году]. И пребысть блаженыи Авраамии подвизаяся лѣтъ 50, подвизаяся отъ оуности до конца живота своего о Христѣ Исусѣ, Господѣ нашемъ, Емоуже слава и дръжава съ Отцемъ [и Святымъ Духомь нынѣ и присно въ вся бесконечныя вѣкы. Аминь].

А се конець блаженаго и преподобнаго отца нашего Авраамиа и похвала граду сему и заступление, и Пречистѣи Богородици Приснодѣвѣи похвала.

      Азъ же, грѣшныи и недостоиныи Ефрѣмъ и в лѣности мнозѣ пребывая и в послѣднии всѣхъ и празденъ и поустъ бывъ всѣхъ благыхъ дѣлъ, развѣ въ праздно имя облекохся, въ аггельскыи сии санъ, именемъ черноризець нарицаюся, дѣлы же злыми далече его отстою. А како нарекуся, абы послѣднии нарѣщися не могоу, дѣла бо злая, яже сдѣяхъ, обличають мя и стужають, тѣмже послѣднии въ житии и блаженому, рцѣмъ, быхъ оученикъ, иже ни по малу быхъ послѣдуя житию, терпѣнию, смирению, любви и молитвѣ и всѣхъ его благыхъ нравовъ и обычаи, но по вся дни пианъ и веселяся и глумляся в неподобныхъ дѣлехъ, иже въ правдоу быхъ празденъ. Онъ оумиленыи плачася, азъ же веселяся и глумляся, онъ иже на молитву и почитаниа божественыхъ книгъ, на славословие въ Божию церковь тщася, азъ же на дремание и на сонъ многъ, онъ еже трудитися и бдѣти, азъ празденъ ходити и в лѣности мнозѣ, онъ еже непразденъ ходити, аз же в лѣности мнозѣ, онъ еже не празднословити и не осоужати, азъ же осоуждати и празднословити, онъ же страшныи соудныи день Божии поминая, азъ же трапезы велиа и пиры, онъ паметь смертную и разлоучение души отъ телеси, испытание въздоушныхъ мытаревъ, азъ же боубны и сопѣли и плясаниа, онъ еже подражати житие святыхъ отець и подобитися благому житью ихъ и почитая святая жития ихъ и словеса, азъ же быхъ подражая и любя пустотная и соуетная злыхъ обычая, онъ еже оусмерти [в других списках: умалити] себе и оуничижити, азъ же веселитися и гордѣти, онъ нищетоу любя и безъимѣньство и вся раздавая требоующимъ и сиротамъ, азъ еже събрати и не подати, побѣженъ отъ многыя скупости и немилосердия, онъ по смѣрению ризы любя, азъ же красны и многоцѣнны, онъ рогоже положи и постелю жестокоу, азъ же постелю мяхъку и теплоу и не могыи терпѣти студени и мраза, [онъ студень и мразъ] стерпяше, азъ же баню имѣа оутѣшену и [теплоу], онъ о нищихъ тоужа, изволя самъ алченъ быти и не вкоуся, азъ же отиноудь ихъ ненавидя и презря, онъ нагыхъ видѣвъ плещоу и неодѣныхъ, мразомъ изъмерзъшихъ, одѣ, азъ же не вѣмъ, яко ти такоже отъ тоя же оутробы произыдоша, и еще же мнози оутаившися страньствоують Господа ради, якоже рече Павелъ апостолъ, вселеныя оучитель: "Ихже ни весь миръ имать, яко ходиша въ овчинахъ и в козьяхъ кожахъ, заблоужающе и скрывающеся по вселеннѣи, не имоуще ни домоу, заблоуждающе въ верьтепѣхъ и в пещерахъ земныхъ".
      Сего ради, господье и отци и братья, не могоу дивнаго и божественаго и преподобьнаго образъ и подобие похвалити, гроубъ и неразоуменъ сыи, оного бо образъ свѣтелъ и радостенъ и похваленъ, образъ же мои теменъ и лоукавъ и мерзокъ и безстоуденъ, аще хощоу, не достигноу, како имамъ похвалити. Прошоу милости, помощи отъ Господа и все оупование имѣа, надежу и помощь възлагаю на Пресвятоую и Пречистоую Дѣвоу Богородицю Марию, та бо имать болѣ всѣхъ дръзновение къ Сыноу и Богоу нашемоу Исусоу Христу, молящися съ всѣми бесплотными силами и съ всѣми святыми, могущи мя спасти и избавити отъ всѣхъ бѣдъ, и та ми есть помощница и поручница животу и спасению, но зде и въ будоущии день, та бо вѣсть избавити и подати помощь своимъ рабомъ, елико и когда требуемъ ея на помощь, в домоу и на поути и на мори, въ боуряхъ и волнахъ, и на бранехъ и въ всѣхъ бѣдахъ скорое моление обрѣтающися на помощь, в нощь же и во день и на всякъ часъ изъбавляющи и хранящи отъ всѣхъ съвѣтъ сотонинъ, глаголю, и всѣхъ его дѣмонъ, и отъ всякоя крамолы и поганыхъ нашествия, и всѣхъ съвѣтъ и съвѣщаниа испроверьзи святителя и черньца и всего церковнаго чина и сонма, князя же и вся христианы въ молитвѣ, Госпоже, испроси, Пресвятая и Приснодѣво Богородице Марие, Сына своего и Бога нашего, молящи прилежно за порученное тебѣ стадо новыхъ людии, яже избра Сынъ твои и Богъ нашь Исусъ Христосъ, Иже прииде на землю, родися отъ пречистыя ти оутробы и бысть Богъ и Человѣкъ, и страсть и смерть приятъ, якоже изволи, тако и бысть, и отъ гроба въскресъ и царьство адово испровергъ, и на небеса къ Отцю възыде, и раздроуши всю неприязниноу силоу и тако раздроуши нынѣ измаилтескыя языкы, разсыпли и расточи, яко прахъ отъ гумна вѣтра, молитвами Пречистыя Ти Матере, и възвесели новыя люди избранное стадо, гнѣвъ Свои оустави, избавление и милость подати, да и еще пребоуде[м], Твоею храними милостью, Вседръжителю Господи, да не ркуть языци: "Гдѣ есть Богъ ихъ?" Но оуслыши и приими молитву всѣхъ молящих Ти ся, иного бо оупованиа и помощи не имамъ, развѣ Тебе. И мое же хоудое грѣшнаго и недостоинаго раба Твоего Ефрема моление оумаленое: "Господи Исусѣ Христѣ, приими и помилоуи, и не отлоучи мене лика преподобныхъ, аще Ти много съгрѣшихъ и Тя прогнѣвахъ паче всѣхъ, но не вѣмъ иного Бога развѣ Тебе. Иже словомъ всяческая яко въсхотѣ и быша, Ты бо повелѣ и създашася, всяко дыхание хвалить Тебе, Владыкоу и Господа, сътворшемоу и създавшемоу всяческая. Направи же и наоучи мя, Господи, творити волю Твою, и посли благодать в помощь рабу Твоемоу, да всегда Тобою съхраняемъ, избавляюся отъ всѣхъ нападении вражьихъ. И подаждь всемоу градоу и рабоу Твоемоу роукоу Твоея помощи всегда ми падающоу и лютѣ съгрѣшающу, и не повели взяти, о Владыко, отъ мене душа моея непокаянны отъ тѣла грѣшна, но малое покаяние мое приими, яко блуднаго сына и блоудницю и разбоиника, и въскреси мя и оживи, въ мнозѣхъ грѣсѣхъ соуща, молитвами Святыя и Пречистыя Ти Матере Дѣвы и всѣхъ небесныхъ силъ и всѣхъ отъ вѣка святыхъ, послоужившихъ и много потроужьшихся по Тобѣ, иже и нынѣ преподобнаго и блаженнаго отца Аврамиа оуспениа память праздноуемъ и радующеся ликоствоуемъ".
      Радуися, граде твердъ, набдимъ и хранимъ десницею Бога Вседръжителя. Радуися, Пречистая Дѣво Мати Божия, иже градъ Смоленескъ [всегда свѣтло радуется о тебѣ, хвалится тобою, избавляемъ от всякыя бѣды. Радуися, граде Смоленескъ,] отъ всѣхъ находящихъ золъ избавляемъ молитвами Пресвятыя Богородица и всѣхъ небесныхъ силъ и всѣхъ святыхъ Его. Радуитеся, апостоли и пророци, мученици и святители, преподобнии, праведнии и вси святии, въ день и в память святаго оуспениа преподобнаго Авраамиа. Радуитеся, пастоуси и наставници Христова стада, патриарси, епископи, архимандрити, игумени, иереи и дьякони и весь черноризьческыи чинъ и честьныхъ черноризець и преставльшихся о Христѣ и еже и еще о Бозѣ и о Господи живоущеи въ христоименитои вѣрѣ, свѣтло радуитеся, ликоствующе, въ память оуспѣниа преподобнаго Авраамия. Радуитеся, о христолюбимии и богохранимии цари и князи и соудьи, богатии и славнии, и нищии о Бозѣ, оуже преставльшиися о Христѣ и еще о Господѣ здравьствующе и всякъ, реку, възрастъ моужескъ и женескъ, оуноша и старци, въ честное оуспѣние богоноснаго отца Авраамиа. Радуитеся о Господи, множество вездѣ нищии, оубозии, слѣпии же и хромии, троудоватии и вси просители, не имуть же гдѣ главы подъклонити, иже претерпѣша гладъ, наготоу, зиму, иже претерпѣша, рцѣмъ, многыя соугоубыя напасти и скорби и на мори и на соуши, озлоблении и прогнани и разграблени бес правды отъ велможь и отъ соудьи неправедьныхъ, иже си вся приаша и претерпѣша с похвалениемъ и благодарениемъ о Христѣ Исусѣ, Господѣ нашемъ. И нынѣ радуитеся и вы, отшедшии и преставльшеися отъ сего свѣта и пакы и еще живущеи съ трьпѣниемъ о Бозѣ, веселитеся и радуитеся и ликоствуите въ святое оуспение богоноснаго отца Авраамиа. Радуитеся, граде Сионъ и Ерусалимѣ и Христова Господа нашего Исуса Христа Церкви, ты мати Господи всѣмъ церквамъ, в немже Господь волное распятие приятъ и претерпѣ крестъ и смерть и въскресе за наше спасение и избавление. Радуитеся, святая и честная соущая вся мѣста окрестъ Иерусалима и преподобныхъ поустыня. Се бо соуть святыхъ домове, и в нихъ добрѣ поживше, нынѣ веселятся о Господѣ. Радуитеся, по всемоу миру Церквы Христовы и домове святыхъ, иже отъ всѣхъ святитель и игоуменъ, иерѣи и дияконъ и черноризець и отъ всѣхъ благовѣрныхъ и христолюбивыхъ христианъ, иже молитвы и молениа и приношениа приносяще на святыи жрътвеникъ за оставление грѣховъ новаго завѣта, и да призрить вся съдержаи Владыка Господь Саваофъ и прииметь и посѣтить, яко благъ и всѣхъ иерѣи, молящихся и приношение приносящихъ Емоу и стоящихъ съ страхомъ и с великымъ вниманиемъ послоушающихъ святаго Еоуангелиа и святыхъ всѣхъ оучениа сладкаго и всѣхъ любовь и смѣрение имуще, не въздающе зла и противоу злу, троужающеся в долзѣмъ [в других списках: блазем] дѣлѣ день паче отъ дне и злыхъ всѣхъ отбѣгающе, а къ добродѣтели правымъ дѣломъ и троудомъ понужающеся, радующеся и веселящеся о Господи Боже помощи по милости Его, и дасть благостыню Свою и благодать, избавление отъ всѣхъ золъ, и бесконечнаго мучение избавит ны. То бо есть благыи и великыи даръ милости Его – входъ въ бесконечное Царство Господа Бога нашего Исуса Христа съ всѣми избранными Его, послоушающихъ и творящихъ волю Его. Тѣмже поимъ и молимся славимомоу отъ всѣхъ небесныхъ силъ и отъ человѣкъ, яко въ векы милость Его на всѣхъ творящихъ волю Его, яко Томоу [слава и] честь и дръжава и покланяние, Отцю и Сыноу и Святому Духоу и нынѣ и присно и в вѣкы вѣкомъ. Аминь.