[Innocentius episcopus servus servorum Dei venerabili fratri] archiepiscopo Maguntino [salutem et apostolicam benedictionem].
      Dilectus filius Hezelo de Vilstorf, clericus in nostra proposuit presentia constitutus, quod cum nos olim tibi per nostras litteras duximus concedendum, ut posses duobus vel tribus clericis in Coloniensi et Treverensi provinciis in eclesiasticis beneficiis eorum cuilibet usque ad summam triginta marcarum argenti in una vel pluribus ecclesiis providere, dilectus filius ... scolasticus Maguntinus, cui commiseras in huiusmodi negotio totaliter vices tuas, ... decano et capitulo sancti Theobaldi Metensis, ut eundem clericum recipientes in canonicum et in fratrem, prebendam, si qua in eorum ecclesia tunc vacabat vel quamcito se ad id offeret oportunitas, liberaliter assignarent, ac ... abbatisse et conventui sancti Petri, loci eiusdem, ut dicto clerico in aliqua ecclesiarum ad donationem suam spectantium, cuius redditus decem marcarum valorem attingerent annuatim, providerent, mandavit.
      Quod, quia tam decanus et capitulum, quam abbatissa et conventus predicti facere contumaciter denegarunt, idem scolasticus in eos primo suspensionis ac demum excommunicationis sententias promulgavit. Verum, cum postmodum per eundem scolasticum processum huiusmodi sine iudiciali strepitu ac tandem, eo id efficere non curante, per ... decanum sancti Salvatoris Metensis mandaverimus revocari, ac dictus decanus per ... officialem Metensem prefatas sententias fecerit relaxari, nobis prefatus clericus humiliter supplicavit, ut sibi super hoc providere paterna clementia curaremus. Dilectorum itaque filiorum Gr[egorii] abbatis de Monte Sancti Danielis, et fratrum H[enrici] et A[lexii] de ordine fratrum Predicatorum, carissimi in Christo filii nostri Danielis, regis Ruscie, nuntiorum, cum quibus idem clericus pro Sedis apostolice negotiis fideliter, ut accepimus, laboravit, precibus inclinati ac eius, cum pauper sit, volendo parcere laboribus et expensis, mandamus, quatenus, si est ita, revocatione huiusmodi vel qualibet apostolice Sedis indulgentia non obstante, tam a decano et capitulo, quam ab abbatissa et conventu predictis iuxta prefati scolastici directarum ad ipsos continentiam litterarum auctoritate facias apostolica provideri. Contradictores etc.
      Datum Lugduni, Idus Septembris, anno quinto.