Innocentius episcopus etc. Venerabilibus fratribus Archiepiscopis et Episcopis, ad quos littere iste pervenerint, salutem etc.
      Cedit ad Dei gloriam et honorem, quod tales custodes in ipsius vinea preferantur, qui sibi per vite meritum et aliis proficiant per exemplum. Sane sicut accepimus, venerabilis frater noster ... Livonie ac Pruscie archiepiscopus, apostolice sedis legatus, prudenter attendens laudabilem conversationem et scientie merita dilecti filii fratris Henrici ordinis predicatorum, qui una cum eo pro negotio fidei et ecclesie diligenter et fideliter laboravit, considerans quoque, quod terra Iatwesonie per ipsius fratris industriam in spiritualibus et temporalibus, auctore Domino, laudabilia suscipere poterit incrementa, eundem fratrem predicte terre, prout auctoritate litterarum nostrarum ad dictum archiepiscopum spectabat, prefecit in Episcopum et pastorem.
      Cum autem idem archiepiscopus extra suam provinciam sit eiectus, nec in aliena permittatur dictum fratrem in Episcopum consecrare, fuit ex parte predicti fratris nobis humiliter supplicatum, ut sibi faceremus munus consecrationis impendi. Quocirca fraternitatem vestram rogamus, monemus et hortamur attente, mandantes, quatinus quicumque vestrum super hoc ab eodem archiepiscopo per ipsius litteras fuerit requisitus, memorato fratri, convocatis aliquibus de vicinis ep[iscop]is, munus consecrationis impendat.
      Datum Lugduni, III Idus Aprilis, pontificatus nostri anno sexto.