Innocentius episcopus servus servorum Dei dilectis filiis prioribus et fratribus ordinis predicatorum predicantibus in subsidium Livonie ac Pruscie salutem et apostolicam benedictionem.
      Fidei negotium in Livonie ac Pruscie partibus a longis retro temporibus inchoatum, pro quo dil. fil. fratres hospitalis sancte Marie Theutonicorum sub intrepide¹ firmitate constantie noscuntur corpus et animam posuisse, per nostri favoris condecet promoveri subsidium, ut optatum, Deo propitio, consequatur effectum. Sane dicti fratres, sicut eorum insinuatione percepimus, iuxta flumen situm inter Livoniam et Prusciam, per quod (Memole vulgariter appellatum) arma, vestes et sal ac multa vite necessaria paganis illarum partium in discrimen christifidelium navigio ferebantur, quoddam castrum cum gravissimis laboribus et expensis de novo construere inceperunt. Cum autem castrum ipsum oporteat mente vigili et potenti brachio conservari², discretioni vestre per apostolica scripta mandamus, quatinus fideles terrarum, que ad predicandum in subsidium partium earundem sunt vobis ab apostolica sede commisse, vestris piis monitis, sicut efficacius poteritis, inducatis, ut ad tuitionem et conservationem ipsius castri, ne a paganis eisdem, quod avertat dominus, valeat occupari, procedant viriliter et potenter, eandem indulgentiam, quam accedentibus in succursum dictarum Livonie et Pruscie predicta sedes concessisse dinoscitur, habituri. Mandatum autem nostrum taliter vestra studeat adimplere sinceritas, quod fratribus et fidelibus supradictis per ministerium vestrum in hoc parte gaudentibus prosperari, vobis exinde gratie divine premium et ordini vestro producatur honoris augmentum.
      Datum Asisii, X Kal. Septembris, pontificatus nostri anno undecimo.

¹ Копия 1: intrepida. ² Копия 2: conservare.