Wessen sullen alle, zcu der bekontnisse dessir brif wirt komen, das wir bruder Conrad Sagkus homeister der brudere des ordins des spetals sendt Marien des Dutschen husis von Jerusalem mit rate und willen unsrer brudire vorlyen Eygayle¹ dem Littowen, der czu uns geflogin hat durch beschirmunge cristens gelouben, zcwen hoken im velde Prowenithen mit ackir, wisen, weyden, weldin und was dorczu gehort, ffry von zcendin und von rechte geburlicher arbeit ewiglich zcu besitzcen, also doch, dornach als das lant der Littowen mit den gnadin Gotis kristenem gelouben und unsern brudern wirdt undirthan, danne sal Eygayle ufgeben dysse zcwen hoken mit irer zcugehorunge und sal nemen sin erb, das er etzwan hatte im sime lande Oukaim, zcum selbin rechte, als wir em vorlyhen haben disse vorgeschreben zcwen hoken zcu besitzcen. Das verlye wir ouch sinen erben in dissen brefen. Durch dissis leens willen sal uns Eygayle [und] sin erben dinen mit pferdin, wapin nachs landis gewonheit in allin hervertin, lantwern, nu huser zcu buwin, alde zcu bessernd adir zcu brechind, wenne, widicke und wohen sy von uns adir von unsern brudern werdin geheisen.
      Gezcuyg desir dinge sint bruder Hans Saxo kompthur zcu Konig[sberg], bruder Johann Scrape huskompthur daselbist, brudir Ortolff voyt zcu Samlant, brudir Girhart sin kompan, brudir Volz kompthur zcu Rangnith und andir ersam luyte vil.
      Gegeben zcu Konig[sberg] undir unserm ingesigel anno Domini M^oCCC tercio in die Cinerum.

¹ В "Preussisches Urkundenbuch" здесь и далее: Gygayle.