Wir brudir Konrad Saccus homeister des ordins der brudre des spetals sendte Marien des Dutschen husis von Jerusalem mit rate und willen unsir brudere verlien und geben Byeuken dem Littowen, der zcu uns geflogin hat von Litton durch kristensgelouben willen, [und] sinen rechten erben zcwen hokin im veld Pruwenithen und sinem bruder und sinen erben verlien wir einen hoken doselbis mit wisen, weiden, weldin und allis, das dorzcu gehort zcu den dren hokin von aldir, fry von zcendin und von geburlicher arbeit ewiglich zcu besitzcen, also doch, das dornach, als Littowir lant mit der gnad Gotis cristenlichem gelouben und uns wurd undirthan, danne so sullen si uffgeben disse dry hokin und sullen nemen ir erbe, das disse vorgeschrebin Byeuke und sin brudir hattin in irm lande Oukaym, zcu dem rechte, als wir en disse vorgeschreben dry hokin haben vorlygen zcu besiczende. Das vorlin wir ouch en und irn erben mit urchund desir schrifft. Und vor dis leen sullen si uns Bieuke, sin brudir, ir erben dinen in hervertin und zcu unser landis beschirmunge, huser und lantwern nuh zcu buwen mit pferdin und wopin nach des landis gewonheit, als dicke si werdin geheisen.
      Gegeben anno Domini MCCC tercio im aschtag.
      Gezcuyg desir dinge sint unsir brudre bruder Johan kompthur zcu Konig[sberg] und Johan Scrape huskompthur daselbist, brudir Ortolf voyt zcu Samlant und andir erbar luythe veel.