Nobilibus viris Kasimiro Cracovie et Cuiavie duci ac aliis ducibus, baronibus et universis crucesignatis per Poloniam, Moraviam et Austriam constitutis.
      Dignum est, ut celestis regis obsequiis inherentes speciali debeant prerogativa gaudere. Cum igitur, sicut ex parte vestra fuit propositum coram nobis, vos zelo fidei et devotionis accensi ad exhortationem venerabilium fratrum nostrorum .. archiepiscopi Gneznensis et suffraganeorum eius ac dilecti filii fratris Bartholomei de ordine fratrum minorum contra Licwan[enses], Jacintiones et alios paganos et scismaticos, qui terris christianorum confines existunt, de mandato nostro predicantium verbum Dei vivifice crucis assumpto signaculo contra eosdem perfidos velitis viriliter cum Dei adiutorio proficisci, nos propter hoc vos benigno favore prosequi delectantes vestris supplicationibus inclinati personas vestras cum familia et omnibus bonis, que impresentiarum rationabiliter possidetis, sub beati Petri et nostra protectione suscipimus vobis auctoritate presentium nichilominus concedentes, ut eisdem indulgentiis et immunitatibus gaudeatis, quibus gaudent crucesignati in terre sancte subsidium accedentes.
      Nulli ergo etc. nostre protectionis et concessionis etc.
      Datum Laterani, Nonis Januarii pontificatus nostri anno tertio.