.. Cracoviensi et .. Wratislaviensi episcopis et .. abbati de Suleioy Gnesnensis diocesis.
      Cum sicut ex parte dilectorum filiorum nobilium virorum Kasmiri Lansici et Cuiavie ducis ac aliorum ducum, baronum et universorum crucesignatorum per Poloniam, Boemiam, Moraviam et Austriam constitutorum fuit propositum coram nobis, ipsi zelo fidei et devotionis accensi ad exhortationem venerabilium fratrum nostrorum .. archiepiscopi Gneznensis et suffraganeorum eius ac dilecti filii fratris Bartholomei etc., ut in alia verbis competenter mutatis usque accedentes [de ordine fratrum minorum contra Litwanos, Jacintiones et alios paganos et scismaticos, qui terris christianorum confines existunt, de mandato nostro predicantium verbum Dei vivifice crucis assumpto signaculo contra eosdem perfidos velint viriliter cum Dei adiutorio proficisci, nos propter hoc eos benigno favore prosequi delectantes eorum supplicationibus inclinati personas ipsorum cum familia et omnibus bonis, que impresentiarum rationabiliter possident, sub beati Petri et nostra protectione suscipimus ipsis auctoritate presentium nichilominus concedentes, ut eisdem indulgentiis et immunitatibus gaudeant, quibus gaudent crucesignati in terre sancte subsidium accedentes].
      Quocirca discretioni vestre per apostolica scripta mandamus, quatenus non permittatis eos super his contra protectionis et concessionis nostre tenorem ab aliquibus indebite molestari molestatores huiusmodi etc. Quod si non omnes etc.
      Datum Laterani, Nonis Januarii pontificatus nostri anno tertio.