[Alexander episcopus servus servorum Dei. Venerabilibus fratribus] archiepiscopis et episcopis ac [dilectis filiis] abbatibus, prioribus, decanis, prepositis, archidiaconis, rectoribus et aliis ecclesiarum prelatis et clericis per Boemiam, Poloniam, Moraviam et Austriam, necnon et partes vicinas constitutis [salutem et apostolicam benedictionem].
      Cum dilecto filio fratri Bartholomeo de Boemia ordinis fratrum minorum, quem sue religionis et probitatis obtentu carum habemus admodum et acceptum, et in cuius ore non est verbum domini alligatum, contra Litwanos et alios infideles in partibus vestris predicare commiserimus verbum crucis: universitatem vestram rogamus et hortamur attente per apostolica vobis s[cripta] mandantes, quatenus ipsum ob reverentiam apostolice sedis et nostram honeste ac benigne tractantes eidem cum quatuor personis et totidem equis in securo conductu et aliis necessariis curetis taliter providere, quod vestra devotio inde possit merito commendari.
      Alioquin sententiam, quam ipse propter hoc rite tulerit in rebelles, ratam habebimus et faciemus auctore domino usque ad satisfactionem condignam appelatione remota inviolabiliter observari.
      Datum Laterani, IV Kalendas Februarii pontificatus nostri anno tertio.