Albertus miseracione divina sancte Rigensis ecclesie archiepiscopus et tocius Liuonie, Estonie et Pruscie metropolitanus omnibus hoc scriptum uisuris salutem et benediccionem a domino Ihesu Christo.
      Ut ea, que in tempore fiunt, per lapsum temporis in obliuionem minime dilabantur, patrocinio litterarum in memoria conservantur. Ea propter tam presentibus pateat quam futuris, quod Suxe siue Nicholaus nobilis de Lettowia de prouincia Nalsen gratia sibi inspirante diuina gentilitatis errore relicto ad regenerationis lauacrum omni fictione postposita conuolauit. Vt autem de ipsius fidei firmitate et erga ecclesiam Dei de cordis ipsius puritate plenius eliqueret, omnem hereditatem suam in terris, nemoribus et in aquis, cultis et incultis, quam in prouincia Nalsen a progenitoribus suis noscitur possedisse, ad manus nostras et ad honorem Beate Uirginis in ecclesia nostra coram summo altari presentibus G. comite Zwerinensi et H. domino Mangnopolensi cum multa numerositate fidelium libere resignauit et postmodum tam pro se, quam pro fratre suo absente recepit a nobis in feudum, prestito nobis et ecclesie nostre fidelitatis publice sacramento. Nos autem sue deuocioni grato concurrentes assensu ac ipsum fauore beniuolo prosequentes ipsum cum omnibus ad se pertinentibus in protectionem sedis apostolice suscepimus et in nostram.
      Huius rei testes sunt: dominus G. illustris comes Zwerinensis, dominus H. Mangnopolensis cum ipsorum militibus, Johannes prepositus Rigensis cum toto capitulo nostro, fratres predicatores et minores, de consulibus et burgensibus ciuitatis Rigensis multi, quorum omnium sigilla inferius sunt appensa.
      Actum anno domini M. CC. LXVIII in cena domini.