Alexander episcopus etc. Dilecto filio fratri Bartholomeo de Boemia ordinis fratrum minorum salutem etc.
      Nuper ad audientiam nostram pervenit, quod Lithuani et Jentuesones ac nonnulli alii etnici, qui Romanam ecclesiam nunquam matrem sue professione fidei agnoverunt, vires exacuunt contra ipsam, dum iidem christianorum finitimas videlicet Poloniam et quasdam alias vicinas provincias hostiliter invadentes, multos ex populo christiano morti et infinitos captivitati dederunt non parcendo sexui vel etati; et nec adhuc fidelium saturati cruore ad impugnandum cum aliis paganis et infidelibus Poloniam et regiones finitimas, conflatis in unum viribus, se accingunt: propter quod nos gravi dolore confodimur et super tanta strage fidelium paterno compatientes affectu remedia, per que tantis obvietur periculis, sollicite cogitamus. Nos igitur de circumspectione tua nobis a pluribus et in pluribus commendata plenam in domino fiduciam obtinentes mandamus, quatenus tam per te quam per fratres tui ordinis, quos idoneos ad hoc esse cognoveris, in Polonia, Boemia, Moravia et Austria contra predictos paganos predices et predicari facias verbum crucis, concessa per vos auctoritate nostra illis christianis earundem partium, qui contra infideles eosdem crucis assumpto signaculo se duxerint accingendos, suorum venia peccatorum, que dari consuevit euntibus in subsidium terre sancte.
      Datum Anagnie, VIII Idus Augusti, pontificatus nostri anno primo.