Gregorius episcopus, servus servorum Dei, Dilecto filio Nobili viro .. Duci Mazovie Salutem et apostolicam benediccionem.
      Gravis querela pro parte dilectorum filiorum .. Magistri et Fratrum Hospitalis sancte Marie theotonicorum Jerusalemitan. nobis nuper exposita continebat, quod licet ipsi ut est notorium contra infideles Lutwanos et nonnullos Ruthenos scismaticos subiectos eisdem, impugnantes ipsos Fratres et alios christianos bellum continuum prosequantur, tamen nonnulli subditi tui inter Terras eorumdem Magistri et Fratrum ac Lutwanorum et Ruthenorum consistentes, apparatus et progressus eorumdem Magistri et Fratrum ex vicinitate locorum sepius sentientes, illos eisdem Lutwanis notificant et ut se defendant, ac gentes dictorum Fratrum offendant et prepediant, reddunt premonitos et etiam premunitos, Et econtra cum iidem Lutwani contra ipsos Fratres et Terras eorum procedunt hostiliter, eos amicabiliter recipiunt et pertractant ipsis victualia et ducatum in locis inviis et solitudinibus exhibendo in magnum detrimentum eorumdem Magistri et Fratrum ac fidei christiane, super quibus fuit nostre provisionis remedium postulatum. Quare Nobilitatem tuam rogamus et hortamur attente, tibi nichilominus per apostolica scripta mandantes, quatinus dictos subditos tuos, ut desistant a predictis et aliis favoribus eisdem infidelibus impendendis, studeas pro reverentia Dei sueque fidei et honore tuo, sic fideliter et realiter coercere, quod non oporteat per sedem apostolicam super hoc aliter provideri.
      Datum Avinion. VIIII kalend. Decembr. Pontificatus nostri Anno Primo.