Герасим Смотрицкий. Стихотворение из Острожской Библии (1580)
|
По изд.: Памятники русской старины в западных губерниях империи, издаваемые по высочайшему повелению П. Н. Батюшковым. Вып. VI. СПб., 1874. С. 158–159.
На обороте заглавного листа Острожской Библии 1580 года напечатаны петитом стихи в один и два столбца, окружающие герб князей Острожских, сходный с таким же в "Псалтыри и Новом Завете". В самом верху помещен следующий столбец стихов:
|
Зри сія знаменія княжате славнаго,
ихже съдръжитъ домъ его отъ вѣка давнаго.
И разумѣй яко не туне, и не без причины,
о чомъ властнѣй и ширѣи повѣсть ти кто иныи.
Но яко достоинъ дѣлатель своея заплаты,
не щадяще здравія, никоея утраты.
Крѣпко побѣждалъ различныхъ съпостатъ полки
и разгонялъ скороны драпѣжныя волки.
И еще можетъ,
аще Богъ поможетъ.
|
Затем стихи идут в два столбца. Столбец первый:
|
Въоруженъ воинъ змія поправъ мужественно,
копіемъ сего посредѣ проньзе явественно,
Яко древняго враждебника человѣческаго рода,
понеже злому зъ добрымъ не бываетъ згода.
Боди съ княземъ избранныи мысльнаго сопостата,
сего бо побѣждающимъ вѣчная заплата.
І инымъ подаваи сіе непобѣдимо оружіе,
острѣишее меча обоюдуостра слово Божіе.
Во время рати
потреба дбати.
|
Второй столбец:
|
Вторыи воинъ храбростію пръвому подобныи,
токмо оружіемъ отмѣненъ и то поселъ гробныи.
Мечь бо обнаженъ въ десницы имѣа острыи обоюду,
имже крѣпціи на враги пріемлютъ побѣду.
Отсѣкаи, Константине, мракъ идолскіа лести,
хощетъ бо Богъ всѣмъ человѣкомъ ся спасти.
И отгоняи еретиковъ полки умовредныя,
пріидоша бо въ миръ волки нещадныя.
Иже несвыше щепится,
сіе скоренится.
|
После этого в средине помещен герб, а под ним опять два столбца. Столбец первый:
|
Въсіяла звѣзда ясно от востока,
послѣдуя прьвои възвѣщенои отъ пророка.
И приводитъ отъ Прьсиды трехъ цареи съ дары,
поклонитися съ вѣрою цареви надъ цары.
Твоя звѣзда нынѣ томуже послѣдуе цареви,
хотя всѣхъ сътворити жителя раеви.
И убываетъ луна Ветхаго Завѣта,
сіяетъ бо солнце неприступнаго свѣта.
Въ немже ходя не поткнется,
но паче спасется.
|
Столбец второй:
|
Спасеніе Христосъ Богъ съдѣя посредѣ земля,
на крестѣ руцѣ простръ всѣхъ къ себѣ пріемля.
На немже рукописаніе грѣхъ нашихъ растерзавъ,
изъ ветхаго человѣка нетлѣнно новаго создавъ.
И ты крестное знаменіе не туне носиши,
великому Константину имъ ся подобиши.
Онъ бо на небеси сіе видевъ побѣдилъ съпостаты,
ты же побѣждаи еретикъ и бѣсовъ тристаты.
Крестъ бо похвала царемъ,
бѣсомъ же незносныи яремъ.
|
Наконец в заключение стихи идут в один столбец:
|
Великоя глубины богослова княже съименныи,
да сподобитъ тя Господь Богъ вѣнецъ пріяти нетленныи.
Въ здравіи же телеснѣмъ благообразно долгодньствовати,
и въ царствіи небесномъ съ избранными радостно ликоствовати.
Яко всѣмъ почину представилъ еси божественное писаніе,
истиннаго Бога и правды его въ похвалу и познаніе.
Да всякъ читаяй боголѣпно благодаритъ създателя,
и да забываетъ достоина мзды своея дѣлателя.
Иже благую часть избираетъ,
отъ него ся не отъимаетъ.
|
Эпитафия на могиле белорусского епископа Игнатия Оксеновича-Старушича, погребенного в Михайловской церкви Выдубицкого монастыря на Украине |
[Епископом был назначен 12 июня 1650 г. Эпитафию написал либо сам, либо его родной брат, игумен монастыря иеромонах Климент. Публикуется по изд.: Белоруссия и Литва. Исторические судьбы Северо-Западного края. С высочайшего соизволения издано при министерстве внутренних дел П.Н. Батюшковым. С одной хромолитографией, 99 гравюрами и картой. СПб., 1890.]
|
Жив сый, создах себе гроб, дабы мое тѣло,
Отдавши духа Богу, покой в нем имѣло.
Ты же не хощи мене мертва обидѣти,
Не обыкша живуща кого оскорбити.
Хощеши ли знати, кто бых живый в мирѣ?
Игнатий монах священ, православный в вѣрѣ,
Славы Божия в церкви бехъ аз проповедник
И на судах духовных судьям собеседник.
Ректор бех братства, иже [в] Киеве граде,
Тежъ в Выдубицкой игумен ограде.
Идеже безплотных сил церковь Воеводы,
Погружающа в каменѣ при Архипѣ воды,
На его же душею крылѣ возложихся,
А тѣлом в сем его храме положихся.
Се уже о мнѣ всякъ знати возможе,
Бѣх иногда, еже бѣхъ, нынѣ же – ничтоже.
Но аз тя знать не могу, обаче молюся:
Моли о мнѣ, да правый на суд явлюся.
|
|