О образех, о реликвях

До читателя.

Геретицы вси едных артыкулов вѣры запрелися, чытелнику ласкавый, а других дивными своими фалшыръствы вышпотили. Межы иншыми и тот: о поединковой ласце Божой ку местцу яковому с[вя]тому, о путнованю людей набожныхъ до них, о образех, о реликвах с[вя]тыхъ дивных блюзнерствъ ужывают чуда Бозские, през нихъ бывалые, розмаите щыплют, забобонами, гуслами, балвохвалством то называютъ, вѣрных Божих лифы, образками и иными розмаитыми словы титулуют против ясному писму Старого и Нового Тестаменту, зданю старожытныхъ отцовъ с[вя]тыхъ и захованю всее ц[е]ркве. А хотя ж и оный в писме то Божом (яко естъ Бог вшехмоцъный и нѣчого у него не ест трудно) чытают, яко през розмаитые речы створоные цуда чинил, добре то знают, такъ на то дбают, яко... [1 об.] на светлост слонечъную и так имъ то смакует, як наядовитшая трутизна, але не див, кгдыжъ и апостолове были едным вонностью жывота ку жывотови, а другимъ вонностью смерти на смерть. Если ест закрыта Евангелия наша, мовит Павел с[вя]тый, естъ закрыта в тых, которые гинут, што не зъ апостолов а нѣ з Х[ристо]са, леч з них самих естъ вина. Так тежъ и геретыцы, ижъ в многих артыкулах блудять... треба на их блуд и на выводы фалшывые... од килконасту сот лѣтъ (а жен... и ап[о]с[то]ловъ) образы с[вя]тыхъ и мощы... въ учстивости мет приняла и до... местцъ и образов ходити звыкла... [Жи]ровицкая церъков, цудами слынучы... Божое и образу Нас[вя]тъшое Девицы. [П]ротожъ такъ в посполитости всѣхъ... зов яко и того цудовнаго боронячы и розго... [2] шаючы таковые велможности Бозские, держыся науки ангелское, к тобе ясно выреченое: дѣла правѣ бозские розголошат, а таемницы кролевские таит слушно ест. Абы добродейства Божие в потомные часы слынучы и не заранялися, покажемъ, ижъ то не новая естъ реч, але старожытност местцамъ певнымъ Богу ласку свою дават, релѣквямъ розмаитымъ моц цудовъ чыненя уделят, образы в ц[е]ркви мѣть, месцъ с[вя]тыхъ набожне навежат, наостаток цуда которых есмы з полныхъ хвалы Божое людей могли досягнуть выпишу, абыс наймилшый и геретыком уста умел запират, правды кафолицкое боронит, и набоженствомъ ку тому мейсцу цудами вславеному палат, а в молитвах ку светой пречыстой помнажатся. Буд здоров и ласкав [2 об.] (образов поламане до болшого геретыцства вступ) если учъстивост релѣквей и месцъ с[вя]тыхъ болит геретыком, лечъ немней и образы, або и горей бо выкинувшы образы з ц[е]ркви снадней прити до погаржаня мощами святых, и набоженъства ку нимъ, а то бы был великий вступъ до геретыцства, которое явне свою потварь на кафолики кладет, якобы то было балвохвалство образы в ц[е]ркви мѣть, же пан Бог образов заказалъ мѣть: же то ест противко писму. Але то все фалшъ, што геретыцство малюеть а то естъ все правда, што кафолицство держит и вѣр... кгдыжъ сам Бог в старом законе росказал образы розмаитые мѣть, гафтованые, рысованые, битые (то ест неодливаные а нѣ дутые) зъ самого сребра и злота, абы ся тогды реч сама снадней могла понят, положу тут самое приказане [3] Божое. Не учынишъ правѣ собѣ рытынъ, а нѣ жадного подобенства Г[о]с[поду] и не будешъ его хвалити, а нѣ ся кланят, а нѣ служыт. Семдесят прекладачов преложыли рытыну идолом, то ест балванъ, абовем иншая реч естъ балванъ, а иншая реч образъ. А тая и великая межы ними естъ розность, образъ ест правдивое речы властное подобенство, яко кгды малюемо чловѣка, коня, Г[о]с[пода], так Ориген и Феодорит розумеет, а балванъ естъ фалшывое подобенство то ест значачы то, чого правдиве немашъ, яко кгды погане выставяли слупы Венере, або Мѣнерве. Оные знаки балваном были ижъ значыли б[о]га або богинѣ таковые яковыхъ не было, нѣмашъ, ани быть могут. А так ани правдиве значыли. Але были фалшывые знаки, и протож негде писмо не зоветь правдивого образу балваномъ, але тылько рытины поганские такъ называеть [3 об.] ижъ фалшивыхъ богов значыли, протожъ писмо кгды мовит: не будешь мѣти богов чужых. придает: не будеш ся им кланял, а нѣ служилъ, то естъ не мей до них внутръное вѣры и хвалы которое кланяне найболшей залежит на умысле яким ся хто серцемъ кланяет, бо если ся хто кланяет створеню маючи его за бога, естъ балвохвалство. А если для яковое учстивости, которая естъ повинна створеню цнотливому, святому и значачого што святого, або зверхность яковую маючому. в тым немашъ жадного балвохвалства, але учъстивост пристойная и слушная. Балване же пакъ, вшелякого поклону заказует, ижъ балванъ естъ. Кгрецкие слова в тым сут значнейшые? посполите лятриа богу, дулис людем, и ангеломъ служит, (хвала Богу и людем может быт узычона умысломъ людскимъ) отож маешъ яковых образов и чого в нихъ бог заказуеть, бо ижъ тымъ, а не иншымъ концемъ заказалъ их, ясно естъ [4]. З другого приказаня, кгды херувимов казал по обоей стороне выротницы учынит, херувим правѣ, нехай будет на еднымъ боку, а другий на другом. Обадва боки ублагалне нехъ закрывають ростягаючы крыла, и нех один на другого смотрит, обернувшы тварь на ублагальню. Над нею была таблица, якобы венок в руках двох херувимов там ся пан Бог Мойсеови указывал и там бывалъ ублаганый, яко сам же о тымъ сведчит: буду праве мовит до тебе, над ублагалнею спосродъку двохъ херувимовъ.

В той скрини ховано тые реликвѣ (нотуй, заслепеный геретыку) о чымъ и Павел с[вя]тый сведчыть. кадилницу, ведро золотое маючое манну, леску Ааронову, таблицы тестаменту. Самъ тежъ Богъ ужа меденого (который был фикгурою Х[ри]с[то]вою) казалъ завесить, хоч ведалъ же его жыдове мѣли за бога хвалить. Саломон въ своей ц[е]ркви наробил херувимов [4 об.] розмаитых, лвовъ, воловъ, фруктов и иных речей дивныхъ на што в писме жадного росказаня не мѣлъ. А вжды того Богъ не зъганил и жаден его с того не штрофовал, а нѣ балвохвалцою, и балванъникомъ не звалъ. Наостаток самъ Богъ ремесла малярског, сницарског, тъкацкого и вшеляког научылъ Безеелема и товарыша его Оолѣаба, о тожъ правдивое кафолицъкое вырозумене о образехъ. Неяко геретыцы, которые жадное дыференцыей межы с[вя]тыми и проклятыми речами не хотят учынити, зачым сродзе блудят. Грешит тогды тот против приказаню Божому, который рытье або подобенства якие чинит, абы е за боги хвалил, або фалшывых боговъ знаками е удавал. Але тот не грешит, хто образы для чого пристойного чинит, бо в ц[е]ркви Божой маемо образы абы нам были яко книги евангелией, и жывотов с[вя]тыхъ. абысмы не препоминали тыхъ которых милуемо, а жебысмы [5] таковыми знаками цноты святых людей чтили, а до таковых же цнот и святобливостей заправялися. Колѣна (абовем) або голова пред образом схиляется што люди видят, леч мысль бежыт взгору, чого люди не видять. Прото не з видомыхъ речей, але внутръних мають геретыцы эксаменъ чынити, и науку брать, яковою ся интенъцыею што дееть. Кгды пред образом которого с[вя]того клянямыся и упадаемо так ся молим. Святый м[у]ч[е]н[и]ку, або еп[и]с[ко]пе, або пустыннику Г[о]с[поду] молися за нами, если Х[ри]с[то]въ (ведлуг выображеня фикгуры) мовим. Хр[и]сте которыйсь то поднял и учынил для насъ, который седиш на правицы (не матерѣо а нѣ фарбо) змилуйся над нами. Нехай же замолкнут незбожныхъ геретыковъ уста которые нас за балвохвалцовъ удають. Ото справилисмыся имъ, яко и яковых образов ужываем [5 об.] поневажъ довели и показалисмы, же Бог ласки своее узычаеть речом створоным, такъже и того же не балваны, але образы Х[ри]с[то]вы, Матки его Пре[чи]стое, херувимов и иных с[вя]тыхъ в церкви ставяемъ слушне ихъ чтѣмо, а пан Бог цуда при них, и през нихъ, яко и през иные речы створоные чинить, для тогож маемо оныхъ меть в учстивости и шанованю великом, бо яко з тамтыхъ речей, то ест релѣквей и иных с[вя]тыхъ жадная зъ себе ничого не мает, едно з Бога, так тежъ и образы маемо о тым под законом ласки, досыт сведецтва од годныхъ вѣры людей, которые близшы часов апостолскихъ жили: и гисториков церъковныхъ, яко образы розмаитыми цудами пан Богъ въславял. Напрод, о оном образе называемом нерукотворном, которог самъ Хр[и]стосъ выконтерфетовал, приложившы [6] хусту до твари, и Абагареви кролеви послалъ, который розмаитыми цудами слынул. О нем Ефремъ с[вя]тый диакон зацный церъковный доктор пишеть. Такъ тежъ Дамаскинъ ест не последний над с[вя]т[о]го Ефрема. Адриянъ папежъ, и Евагрий церковный гисторикъ, и Никифор, и иныхъ немало. Естъ такий другий в Риме, которог называють Веротка, и тотъ цудами слынеть. О образе в мѣсте Беритѣ повѣту Антиохийского Афанасий с[вя]тый пишет, яко его жыдове кололи и пакости ему яко самому Х[ри]с[т]у на крыжу висячому выражали. А яко много цудовное крови з него вытекло, так ижъ ся то от жыдов затоит не могло, ажъ наостаток незличоный почетъ з них до Хр[и]ста присталъ. То с[вя]тый Афанасий филяръ диаментовый церковный, потужный шлет на арияны, и дошли того же оный образъ был малеваный от Луки с[вя]того, и достался был святому Никодимови а потым ото тамъ сукъцессыве. Къ господареви християнинови [6 об.] о образе Х[ри]с[то]вомъ которог невѣста од кровотоку уздоровленая пред домом своимъ на высоком местцу в месте Пенеаде названом поставила была и о цудахъ которые ся при нем дѣяли, шыроко гисторикове церковные выписали, Евсевий и Никифоръ, и Феофилактъ. Под которым зелко выростало, которое кгды уросло, скоро досягло подолка шаты образа Христова, внет всѣ хоробы уздравяло. тот образъ Юлиян апостата, кгды скинути и столчы, а на местце его свой образъ поставити казал, внетъ онъ образ его перун з неба струтил, а образ Х[ри]с[то]въ от хр[и]стиян учъстиве зобраныи и в церъкви былъ схованый, о чымъ Созомен, в ц[е]рковной историей сведчить. Леонови цесареви въсходному образ Григория Назыанского тварь одверънулъ и мовы ведлуг звыклости не дал. Саватия цесара Влосское земли одорваньем и поветремъ моровымъ за псованье образов Бог карал, такъ иж в самом [7] Констанътынополю по килка крот сто тисячей люду нагле легло. То светчить Зонар. Павел диакон выписует: яко одному иконоклястѣ, псователеви образов, тварь каменем розбита была. ижъ он пред тымъ тварь образа с[вя]тое Пр[е]ч[и]стое розбил был, (книг 1 о речах на свете бывалыхъ). Естъ незличоныхъ писмъ о тымъ у докторов с[вя]тых. гисториков ц[е]рковныхъ и жывотахъ с[вя]тыхъ. Там тя яко до жродла отсылаю. Лечъ здаеть ми ся (еслис ест вѣръный або хочешъ быть вѣрным) же досит маешъ на тыхъ. Послушный на самом звычаю ц[е]рковномъ (не пытаючися и не шпыраючы много) переставаеть.

Знай же яко панъ Богъ чтит тыхъ которые его и иныхъ святых образы чтят, а яко сродзе ся гневает на тых которые их не шануют и пристойное учъстивости им не выражають. Тых праве которые мя велбять велбити буду, а хто мною горъдить без чести будеть, якъ бовем ушановане образу (кого выражает маловане [7 об.] люб рысоване) на самую ся особу стягаеть, (чест образов на того ся стегаеть, чый ест образ) так же неушановане на оногожъ преступает если кролеве свецкие (яко мовит с[вя]тый Стефан за образы мученик) кгды бы образъ их пред очима ихъ повергъшы хто допталъ и розмаите лжил гневаются, яко далеко болшъ Хр[и]стосъ за свои и за с[вя]тыхъ образы слушне ся гневати маеть... же пред образами с[вя]тыхъ упадаемъ, и молимся, маем того приклад въ патриарху Иякове, который поклонился верхови лески Иосифовое, а не грешыл яко и мы не грѣшымо, бо не дереву ся кланял, але сцептрови его, и не материю чтил, але Иосифа и зверхност его, ижъ он былъ первшымъ по фараоне паном всего Египту. И кролевая Гестеръ целовала верхъ лески короля Асвера. Также и мы кгды упадаем на ймя Исусъ, слышачы слово тое не голсу ани слову тому, але самому Х[ри]с[то]ви учстивость [8] чынимъ, яко и в фикгуре образов не матерыю, не фарбы, не малеване чтимо, лечъ того ж Хр[и]ста, которог оный образъ выставует и значыт. Штож за зыску з того маемъ, тот о котором Василий написал. Хто ся прави, ко чти которого мученика (або образу с[вя]того) дотыкаеть, тот берет неякую частку ласки и моцы, которая в ним естъ, якожъ тут до реликвий с[вя]тыхъ (всем вобецъ) не быт набожным, кгды ся участниками ласки Божое стаемъ, и неяко посвяцаемся.

Великое и незносное шаленъство, и тяжкий упор и затверделость геретыцкая не хотет межи посполитыми а приватными домами розделеня учинит, которое на чест и хвалу пану Богу, а святымъ на честь и на пометку будуем, што самъ прирожоныи розумъ (бы на то жадного [8 об.] писма, росказаня Божого и прикладов розмаитых не было) указуе, же иншые местца до посполитог людского обцованя, а иншые для хвалы Божое, чыненя оферъ, слуханя слова Божог и науки збавенное быть мусят. А причына того естъ тая, поневажъ люде местца и начиня не посвецоные, и Богу неотданые, инакшею церемониею нѣжли посвяцоные, и Богу отделеные звыкли шановат и ест заказъ стародавный собору Халкидонского, абы ц[е]ркви Богу посвещоные не были на посполитое мешкане оборочаны, и начиня церковного до службы Божой обраного, и одделеного, тыкати жаден ся не важил, опроч належных особъ дияконов и презвитеров.

Срокго ся п[а]нъ Бог гневал в старомъ законе на тыхъ, которые не шановали дому Б[о]ж[о]го, яко на Валтасара кроля Вавилонского, на Иосию кроля жыдовского, же обадва кролевство [9] стратили. Ты Осии, Златоуст мовить, вшол правѣ абы св[я]щ[е]нъство одержалъ алижъ и кролевство стратил. Противне зась Давыд чынилъ всѣмъ тымъ, которые домов Божыхъ и оздобностей ихъ не шануют и не милуют, же ся с того префалят мовячы, Пане умиловалемъ оздобу дому твоего и местце прибытку хвалы твоеи. Даниил такъ собе дом Божый Ер[у]с[а]л[и]мъский поважал, же будучы в Вавилоне, окна своего мешканя отворившы молился. Въвойду, мовит Д[а]в[ы]дъ с[вя]т, в мнозьствѣ м[и]л[о]с[е]ръдия твоего до дому твоег, и буду ся кланяти ку ц[е]ркви с[вя]теи твоей. Оставил намъ прикладъ побожный чъченя домов Божых зацный у Бога и у людей Ияков патриарха мѣсца с[вя]тые и притомностю ласки Божое посвещоные и обраные, кгды з оного сну в Харране оцкнувшыся мовит, не естъ то ничого едно дом Божий и ворота небесные и назвал местце оное Бежъил, то ест дом божий [9 об.]. Сын Божий велце ся образил на цкуючих и продаючих в ц[е]ркви Ерусалимской и столки имъ спроворочал и повыметовал. А не допустил, абы хто мел нести начыне посполитое през ц[е]рковъ и слова зъ пророка мовил: писано естъ: домъ мой дом молитвы названыи естъ, а высте его учинили лотромъ яскинею. Если то о оной старозаконной ц[е]ркви, где быдло оферовано, мовил, а штож о нашой церкви, где ся жывый баранок сынъ Б[о]жий въ особе хлѣба и вина штод[е]нь оферуеть, розумети маемъ? Где не олтарь посвещаеть дары, але дары посвещают олтар, и естъ наша церков яко другое небо для притомности и обецности Х[ри]с[то]вое, бо по посвещеню истность хлѣба устает. А зостает Хр[и]стосъ з душею, з бозством, в тѣле, в особе хлѣба и вина, яко вси церковные научытели розумеют. Прото тежъ и въ веръшах набожныхъ церков так мавяет, в церкви правѣ стоячы, на небе стояти здаешся [10]. Если Мойсеови, и Исусу Наввину зъзути обуве казано, абы не дрзко до речей с[вя]тыхъ приступовали и научылися местца с[вя]тые чтить, яко далеко болшъ церкви кафолицъкие мают быть у болшомъ ушанованю. Яковъ патриарха посох Иосифов въ поваженю мел и кланялся ему, так тежъ кролевая Естеръ посох кроля Асвера цаловала, зверхность и преложенство его чтячы, яко над то церъквей кафолицъких начыня посвещоные и образы мают быт чъчоны. Про учътивост тых особ кого выражають, кгдыж учтивост тому чый ест образ. Слушне тогды чынят кафоликове, же местца святые навежають до оных ся купять, и дороги далекие подыймують, зъвлаща где естъ особная и поединъковая ласка Божыя, што наша Жировицъкая церъков, з обецности чудовнаго образа маеть. Не новый але старый то звычай в ц[е]ркви Божой, и з прикладу набожных людей утверъжоный, навежат местца с[вя]тые, и ласки Б[о]жое [10 об.] в них дознавати. Великую похвалу въ Еванъгелии светой оные три кролеве зъ своего пелкгрымованя мают шукаючы Хр[и]ста, в чом и намъ приклад сличный оставили, абысмы и мы не литуючы кошту и працы, долгости и трудности дороги не уважаючы, небеспеченства жадног предъ себе не беручы, шли на местца светые з набоженством поганъ оныхъ што до Филиппа мовили, хочем Исуса видети: так еу[а]г[е]листъ залецает. Пришли, правѣ были до Ер[у]с[а]л[и]му на свято абы ся поклонили. Такъ же и подскарбего королевое муринское Сабы, Лука еу[а]г[е]листъ, набоженство рочное въ Ерусалиме отправуючое шыроко описуеть. Приехалъ мовить былъ поклонитися до Ер[у]с[а]л[и]му не надаремне, а не по яковои посполитой потребе, але жебыс поклонит, набоженства зажыл. А кгдыжъ погане так были набожны, же на одпусты здалека приеждчали, а штож хр[и]стияне набожные не мають чынить, маючы и самого збавителя [11]. В тым взор, бо и онъ з Начыстшою Маткою своею, и з Иосифом часто до Ерусалимское ц[е]ркви, не омешкива(ю)чы жадныхъ законныхъ свят, хажалъ, и путноване отправовалъ. Але геретыцы чынят на то окрикъ. не потреба мовят Б[о]га по розныхъ местцахъ шукат, въвезде ест. А тые чому не чынили такъ, але ото (вѣрячы иж естъ Богъ везде) на певные местца пелкгрымовали, и сам Збавител мог бы Иосифови, старушкови оному фолкгуючы, и бл[аго]с[ло]веной матце своей, мовить, не ходете, тутъ и ввезде ест Богъ. Але и сам им товарыства допомагал. Правда же ест Б[о]гъ везде, взглядом истности бозства, але не взглядомъ ласки. Кгдыжъ на иншомъ местцу естъ особливым способом яко при сажавце Ерусалимской, надобне о тымъ Августынъ с[вя]тый мовит, яко, правѣ, не вси с[вя]тые мають дарь уздравяня, так тежъ не во всѣхъ ц[е]рквахъ або местцах с[вя]тых чуда панъ Богъ хочеть мѣти, который даровъ своихъ узычает каждому якъ хочеть [11 об.]. Бо не везде чуда чынит, але обирает на то певные местца и персоны на которых и през которых чуда чынить и людем добродейства даеть. Ачъбы моглъ гдежъ колвекъ чынити, кгды бы ся такъ подобало воли и мудрости его то все Августын с[вя]тый. Над то не потреба ничого писати, досыт тот с[вя]тый замкнулъ уста всем геретыкомъ, и ненабожникомъ ку местцамъ с[вя]тым, и ленивцомъ ку горачшему набоженству. Тыхъ ся слов того светог и стародавности церковное, кафолику милыи, деръжы и наследуй. А помнажайся, рости и палай ку местцомъ с[вя]тымъ. Велбъ ихъ и ты, кгды их Богъ увелбилъ, яко тежъ и Жыровицъкая церковъ ест, чудами з ласки Божое увелбена, уччона, и надана. Которые тобѣ тут южъ заразъ кластися починають.

Гисториа або повѣсть людеи розных, вѣры годныхъ, о образѣ чудовномъ Пренас[вя]теишое Д[е]вы Марiи Жировицкомъ в повѣте Слонимскомъ

Гисториа або повѣсть людеи розных, вѣры годныхъ, о образѣ чудовномъ Пренас[вя]теишое Д[е]вы Марiи Жировицкомъ в повѣте Слонимскомъ, во всемъ згодливая, коротко выписаная и з немалою працою и старанемъ собраная презъ многогрешного отца Феодосия: з. н. с. ст. в. молит усердно всякаг[о] прочитающаг[о] сия; да прогл[аго]леть за нь Отче н[а]шъ.

[с. 16] Всему повѣту Слонимскому не ест тайно, же около року г[оспо]днего 501 на том местцу, на котором тепер сут церкви, манастыр и роли, была великая пуща, маючая в собе немало звѣру, якож розумею же для жыру барзо способног[о], который был в той пущы бестиямъ, то местце од продковъ Жировом або Жировичами ест названо, або теж од хлопка тогож назвиска Жыръ, который неколис по части уживал тое пущы, до которое пастухом славное памети его м[и]л[о]сти п[а]на Александра Солтана рыцера гробу Б[о]жог[о] и подскарбег[о] надворного В[е]л[икого] кн[язства] Л[и]т[овского] (который собе у Казимера третег[о] Якгеловича корол[я] полского тые Жыровичы выслужил) трафилосе з быдлом загнати, по которой прехажаючися обачил один з них на древе грушковом лесномъ якобы во огню яком образ стоячы, чым престрашоным будучы зволал товариство, которое пришедши тоѣ видели, и нерыхло осмелившися, кгды вже огонь тот гаснул (якос имъ на он час видело) образ взели и п[а]ну своему занесли, которог[о] он взявши до шкатулы сховал. Але Г[оспо]дъ Б[о]гъ, который звыкль прославлят прославляющих его, не допустил наяснейшое десницы оболокати неведомостю людемъ засланят, и так знаменитого скарбу в землю закопат, але рачей жебы всим требующимъ был выставленый, и для того без вотпеня з шкатулы зникнул. [с. 17] Хотечы его бовемъ раз указат гостем, ничог[о] не знашол, чомус побожный пан велце удивовать не могль, повторе кгды тыеж пастухове способом вышей писаным на том же местцу тот же образ знашедши п[а]ну оддавали здумевалсе не ведаючы, што мел з ним чинит. Спустившис еднак на волю Б[о]жию, ехал сам до тое пущы с пастухами, видеть хотечы местце, на котором им образ показовал. Там приехавшы долго з великим подывенем мыслил, што бы то было же ся так на незвычайном местцу знайдовал. По таких мыслях был през килка годин в захвиценю, гдес досконале о воли Б[о]жой доведал. В часе потом коротким казал розрубиват оную пущу, а потом церковъ спанялую будовати, которая кгды докончоная была уберами ее вшелякими надал и тотъ образ чудовный в сребро оправивши в ней поставил и не мало презвитеров ховал для одправованя порадного и уставичног[о] набоженства. Тая помененая церковь в колкодесят лѣтъ по збудованю от свечи с припадку не добре загашоное вся немал в попел се обернула. Образъ еднак с[вя]т[ый] и таблички приносные при ним вцале найдено, ачъ врихле потом сам образ зникнул и перенеслъся был невидоме (без вонтпеня справою ангелскою) на камен великий, который и тепер ест на том же местцу под горою [с. 18] идучы до церкви мурованое. А в тым кгдыс вси о том образе с[вя]том пытали, фрасовали, смутилис, не ведаючы, где быс подел, детки (по немалом часе), которыес на он час в школе учили, играючы вдень коло погорелиска видели на око панну якус барзо сличную в коле пломенистом на оном камени седячую, чим престрашившисе розбеглисе и презвитором ознаймили. Они засе повести детинной не довераючи, сами пошли смотрит, если бы так было, идучи там особы вже не видели, але свечу якуюс горащую здалека обачили (которая потом, кгды по тот образъ с[вя]т[ый] со крестами приходили, зникнула) и образ о своей моцы стоячы, которог[о] з набоженством взявши, первей до домку одног[о] а потом до церковки врихле зготованое з веселем невымовным внесли, где през немалый час стоял, и чуда великие там же бывали: але з ыншими веспол оздобами и тая книжка в которую все писан[о] з оною церковю вышей помененою згорела. А иж мнозство людей з розных сторон и далеких в потребах своихъ на то местце ест приеждзало, так се зместит в оной церковѣце не могло, збудовано потом троха болшую церковъ з древа до часу и образ чудовный до нее перенесено. А о тым его м[и]л[ость] п[а]нъ Иван Александрович Солтан, маршалок надворный В[еликого] к[нязства] Л[итовского], материю на муроване церкви кгрунтовное готовал, которое не докончивши с тым се светом пожекгнал. До тог[о] [с. 19] и то поведают же по взятю образа с[вя]т[ого] з оног[о] каменя з[ъ]явилас барзо добре выражоная рука правая и седзене которые знаки для частого толченя от розных людей (поведают бовем, же от фебры помочным ест) загладили; образ сам ест каменный светлошаровый рытый кгруглодолгий накшталтъ яйца, постат на ним Пречистое Д[е]вы Марии, од головы по бедра вырыта, а на правой руце младенец I[су]с целый вырытый для частог[о] цалованя людей побожных трохас выгладил: бо ажъ до н[а]ших часов без шкла его ховано. Запах мевает сам през се барзо пенкный и приемный. Наостаток и то треба ведать, же в очах людей дворных и в герезий або в греху смертелным будучи отменяется, часом бовем чорнымъ, а часом якобы чим заслоненым показуется, што килка особь на собе доброволне дознали. Великости ег[о] хто хочет может се з учстивостю присмотритъ. Ласки барзо значное от Г[оспо]да Б[о]га за причиною Царицы Н[е]б[е]сное тые дознавают, которие на то местце с[вя]тое з вѣрою щирою и з уфностю великою оферують. Тог[о] всег[о] поведачем и сведками сут тые которыхъ имена нижей видиш:

Феодосий иеромонах з[а]кону с[вя]т[ого] Василия сознаваю тым писанем руки моее власное, жем власне так от многих людей о тым образѣ с[вя]томъ слышал яко се тут гистория писала.

Я, Исидор Иванович свещенник Люшневъский, будучи прошоный от чесного отца Андрея Офанасовича Бегуновског[о], который през старост свою великую не могучи свои руки подписат при памети еднак еще будучи вызнавал предо мною и пред чесным отцем Феодосием иеромонахом зак[о]ну с[вя]того Василия, которий его о всем выпытовал, же все так власне было, яко се тут гистория о образе Жировицком Пречест[н]ой Б[огоро]д[и]ци выписана. Для чого то все и я зознаваю пишучи рукою моею власною року 1622 м[е]с[я]ца ген[вара] 18 дня.

Я, Варфоломей Поликарпович, предъ тым будучи свещеником Жировицким лит 50, а тепер Ополским, сознаваю тым писанем, жем так власне от продковъ моих слышал о [о]брази светом Жировицком, яко ся тут гистория писала.