На герб зацного дому его м[илос]ти пана Лукаша Ивановича Мамонича, старосты дисненьского и скарбного Великого князства Литовского и прочая

Ни кое ино добро не величить тако
Мужа, благородству подобяща ся всяко.
Срам убо малити ся, в нихже побеждати,
Срамнее ж побеждати, в нихже ся малити.
Ниже в похваленiи ест ино любезнее,
Яко же егда имать что рещи полезнее.
Не преподобно убо о благих молчати,
Яко же и не таяжде воспоминати.
Стрела убо воздух пререзуе [так в публикации] высоко,
Туголучно испущена летит широко.
Крест же паче сея – небеси ся касает,
Сего носяй светлее паче всех бывает.
Ты же ми богомысльне взирай на обое,
Велико бо едино, много паче двое.
Силно почествовати мертвена чловека
Добродетелми сокровища оного века.

Впервые опубликовано в кн.: Псалмы Давида-пророка и царя... с возследованием. Вильно, 1593. Л. 1 об.

На герб его милости пана Симеона Войны

Яко досыт значне трубы нам оповедают,
Время брани и время победы людiе знают.
Паче же троегласно и троеполчно рядимо,
Послушно Строителю – воистинну непобедимо.
Происходища [так в публикации] же троеречна, быстро текущи,
Не тры есть кормчих, но единого имущи.
Что плаванiе, разве бо преподобiе всяко
В дому твоем? Дары дает Бог не всим единако.
Пентекерас – называют пять рог, ясна бывает
Над иншие звезды: ясност болшую в собе мает.
Лелива, вонно носяще, бела и красно зрачна –
В дому том благо де [так в публикации] изобилна, людем ест значна.
Что ж, паче мысленныя трубы, мысленныя реки,
В православии цветуще, не оскудеют навеки.

Впервые опубликовано в кн.: Евангелие толковое. Вильно, 1595. Л. 1 об.

На герб ясневелможного пана, его милости пана Лео Сапеги, канцлера найвышшого Великого князства Литовского, Пернавского, Могилевского и прочых старосты

Кгды в вышних набоженство станах местце мает
И рыцерская мужность к ней ся прилучает,
Где растропность в порадех, справедливость в судех,
Где статечность во всяких для отчызны трудех –
Там Бог благословляет, там слава значная
В тым доме зоставает на веки трвалая.
Тые все в тобе цноты видим знамените,
Которыми тя Пан Бог надарыл обфите.
Презацный сенаторе, знат, из веков давных
Тые ж ся найдовали и в продках твых славных.
Што з гербов познаваем? Крыж – знак побожности,
Рука з силным пострелом знаком ест мужности,
Три лелие – разных цнот образ указують,
Которые до неба простый путь справують
И у людей еднают славу безсмертную,
Век веком на потомстве пребывающую.

Впервые опубликовано в кн.: Треодь цветная. Вильно, 1609. Л. 1 об.

Епикграмма

[Судя по содержанию, также на гербы Льва Сапеги]

Смотры, як крыны, ездец и стрела з рукою
Звезалися, стрела с крестом, крест теж з луною.
Тыи суть зобранья цнот, великiй Леоне,
Которыми продков ушляхтили кролеве.
Умысл маеш вспанялы громить еретики,
Которым теж плениш все церкви противники.
Вера, меч креста держачы, цвите тобою,
Бо естесь з супостатами готов до бою.
Жiи во все лета, по смерти што ест дознаеш,
Же милуеш Бога и веру помнажаеш.

Впервые опубликовано в изд.: Книга служебник. Вильно, 1617. Л. 1 об.