Въсе можемъ своимъ окомъ лацно обачити,
Долъжыни и шырокость шнуромъ позначити
И чоловека можемъ познати по твары,
Если въ собе не маеть лишнее привары.
Але где цнота собе обрала оселость,
Тамъ ростропъ естъ до всего и мужьская смелост[ь],
Которая зацные завжды домы буди
I клейноты розъдаеть, тыми слынуть люди,
Бо такие николи зъ света не изъходеть,
Але один по другомъ вовеки славу плодеть.
Хочешъ же ся присмотрет[ь] – гербомъ праве значнымъ
Заразъ можешъ познати, иж суть в дому зацнымъ
Зъдавна славных Сапегов. Тые з предковъ своихъ
Заквитывали въ цнотахъ – знат[ь], во лилияхъ троихъ,
При которих зъ оружъемъ конъный воинъ стоить
Знакомъ того, иж ся з нихъ ни одинъ не боить,
Служить своимъ сподаремъ ку кождой потребе,
Не литуючи скарбов, ни самого себе.
Къ тому видишъ, якъ въ локоть пострелена рука -
Видишъ, ижъ въскрозь из туга, з пострелного лука.
Такий пострелъ никого дома не потъкаеть,
Одно хто поганьские полъки розрываеть.
Въ тыхъ же геръбехъ посредку есть стрела зъ крестами
Двема, а третий блиско осажономъ [!] лунами.
Тые знакомъ, ижъ они болшъ для хрестиянства
Клали здорове свое, несмотречы паньства.
Смотри жъ вышей – узришъ тамъ над гельмомъ коруну,
Которая даеть знать, иж тамъ Богъ фортуну
И цноту зъ силънымъ мужъствомъ сполне коронует[ь],
Чого у нихъ ани моль, ни ржа не попсует[ь].
Живете жъ, Сапегове вси, въ многие лета,
Ваша слава слыт[ь] будеть, покуль станеть света.
Подавайте жъ потомъкомъ, што маете зъ предъковъ,
Вед же и ваших цных справ въвесь светъ полонъ светъковъ.

Анъдрей Рымъша.

Впервые опубликовано в изд.: Статут Великого князства Литовского. Вильно, типография Мамоничей, 1588. Оборот 5-го ненумерованного листа.