Артыкулъ 1.

О записехъ именей отчизныхъ, матерыстых и всякимъ обычаемъ набытыхъ.

Уставуемъ, ижъ волно кождому именья свои отчизные, матерыстые, выслужоные, купленые и якимъ колвек обычаемъ набытые и названые, не смотречы третее и двухъ частей, але вси вздоймомъ, хто ихъ што маеть, будъ тежъ половицу або которую ихъ часть, або поособну одну, або люди, земли, што хотя от нихъ водле воли и мысли своее отдати, продати, даровати, записати, заставити, от детей и близъскихъ отдалити, подле баченья своего тымъ шафовати. И хотя бы перво которую часть або половицу именья своего албо што колвекъ людей и земль кому продалъ або записалъ, тогды остаткомъ тыхъ именей всихъ по тому ж воленъ будеть шафовати вечност[ь]ю заставою, яко воля его будеть, также отдаляючи от детей и близскихъ своихъ. А вед же кождый таковый продажу або даръ свой тотъ, хто продаеть або даруеть, справившы перъвей на то записъ под печатью своею и с подъписомъ руки, хто писати умеет, и под печатми людей добрыхъ трехъ албо чотырехъ особъ народу шляхетъского, веры годныхъ, въ великомъ князьстве литовском оселыхъ, очевисте от того, хто продаеть, на то упрошоныхъ. А где бы тотъ, хто продаеть албо записуеть, самъ писати не умелъ, тогды печатниковъ таковыхъ до запису своего упросити маеть, которые бы пры печатехъ своихъ и руками власътными тотъ листъ подъписали. А потом самъ очевисте перед нами, г[о]с[по]д[а]ремъ, або передъ врядомъ нашымъ земъскимъ, где в которомъ повете тое именье лежить або до которого суду прислухаеть, сознати маеть. А пакли бы до того повету было далеко, в которомъ тое именье лежить або до которого суду прислухаеть, тогды будеть волно ему на инъшомъ вряде судовомъ, где наближей будеть, таковый записъ свой оповедати и до книгъ записати. А тотъ, кому то продано або якимъ же кольвекъ обычаемъ записано, с тымъ листом, записомъ своимъ и тежъ з выписомъ врядовымъ маеть ехати або слати до того вряду земского поветового, где а в которомъ повете тое именье лежати будеть. А то оповедавъшы и оказавшы, маеть до книгъ земскихъ тотъ записъ свой увести, а врядъ вряду в томъ верыти маеть. А што передъ нами, г[о]с[по]д[а]ремъ, албо судомъ головнымъ будеть сознано, тое без переношенья до инъшых книгъ поветовыхъ важно быти маеть.

Артыкулъ 2.

Естли бы кому потреба записъ учинити, кромъ роковъ земъскихъ.

Тежъ уставуемъ: хто бы хотелъ оселость свою вечностью пустити межи роки судовыми, без которых судъ земъский не звыклъ заседати, тогды маеть прийти передъ врядъ кгродъский, где судъ от насъ, г[о]с[по]д[а]ра, засажоный, и тамъ записъ справъленый передъ воеводою, старостою, где суды кгродъские сут[ь], показати, вызнати и дати его до книгъ замковыхъ слово от слова вписати и выписъ взяти с печатью и с подписомъ руки его властное. Который записъ и выписъ такий будеть тръвати до роковъ двоихъ земъскихъ, судовъне отправуючых, а надалей на которыхъ с тыхъ рокохъ [!] земскихъ оный записъ маеть быти перенесенъ до книгъ земскихъ и в книги вписанъ, и выписъ с книгъ подъ печатьми их врядовыми взяти. А где бы таковый записъ до вряду земского на тые роки перенесенъ не былъ, тогды таковый записъ жадное моцы мети, а за нимъ тое речы, што кому записано, одеръжати не маеть. А в небытности воеводъ, старостъ судовыхъ на таких врядехъ и местъцах такие записы, за листы вызнаными, предсе очевисто особы, будучы сами (хто што записуеть) [в оригинале – квадратные скобки] вызнавъшы такие записы, сами жъ оказавши вряду тому, мают быти передъ врядомъ ихъ кгродскимъ зуполънымъ, подъстаростимъ, судьею и писаромъ оповеданы и сознаваны и выписы даваны подъ их печатми с подъписаньемъ рукъ их, а принамней двух [в оригинале: "днух"], естли бы третий писати не умелъ. А естли бы который записъ, на вечность кому даный, не водлугъ сего статуту былъ справленый, таковый записъ маеть быти никчемный. и речы, въ немъ описаное, нихто одеръжати не можеть, толко бы давности земъское ку збуренью того запису жалобникъ не омешкал.

Артыкулъ 3.

Варунокъ на перенесенье з кгроду до земъства.

Где бы хто купли, даровизны и иншыхъ записовъ своихъ водълугъ сего статуту с книгъ замковых до книгъ земъскихъ водлугъ арътыкулу второго, вышей в семъ же розделе описаного, на рокохъ земскихъ перенести не могъ за войною або поветреемъ моровымъ, тогды то варуемъ, же таковые неперенесенья куплей и инших записовъ з кгроду до земъства за служъбою земъскою военъною и поветреемъ моровымъ ничого праву того, хто купилъ або яким инымъ правомъ деръжалъ, шкодити не маеть. Ведъ же по зъеханью з службы нашое земское военъное або по ускроменью поветрея на першыхъ рокохъ земскихъ, судовне отправуючихъ, маеть быть таковый записъ и выписъ вряду кгродъского перенесенъ и до книгъ записанъ.

Артыкулъ 4.

Не маеть нихто никому жадного спадку записовати, чого в рукахъ не маеть.

Тежъ естли бы хто хотелъ кому записати який спадокъ, который бы мелъ на него прийти по блискости якимъ кольвекъ правомъ, а тотъ бы еще былъ жывъ, по которомъ бы се мело ему што достать, тогды такового спадку нихто не можеть никому записати, ани продати и сумы никоторое на томъ взносити, олиж бы по змерлой руце право се ему отворыло. А естли бы хто кому таковый спадокъ за живота того, по ком се его сподеваеть, записалъ або продалъ, албо тежъ на томъ которую суму п[е]н[е]зей възнесъ, таковый записъ передъ правомъ не маеть держан быти. А вед же естли бы який спадокъ на кого по змерълой руце правом прирожоным припал, а оный кому бы ся до такого спадку право прырожоное отворыло, а тое имен[ь]е, хотя бы было волное або в суме от продковъ его заведеное, а онъ бы про недостатокъ або недовъстипъ свой самъ того доходити не могучы, албо тежъ з доброе воли своее на кого иного право свое влилъ и то кому урядовне записалъ або злетилъ, то ему волно будеть учинити. А тотъ, кому то записано, моцонъ будеть того, яко бы тот самъ истецъ, на кого то спало правомъ, оного на держачомъ доходити, а дошедши, водле права своего того уживати маеть. Такъже и такое именье, которы [!] бы самъ заставилъ або доживотьемъ кому пустилъ, волно ему мимо того, хто в заставе або дожывотнымъ правомъ держати будеть, инъшому кому вечъностью пустити и право свое вечное на кого хотелъ възнести и влити.

Артыкулъ 5.

Хто бы кому записалъ именье або землю по своемъ жывоте, а тотъ, кому записано, того смеръти не дождалъ и перъвей умеръ.

Тежъ уставуемъ: естли бы кому хто записалъ урядовне имен[ь]е або люди по своемъ жывоте, а тотъ, которому тая речъ будет записана, того смеръти не дождалъ, который то ему будеть записалъ, и самъ наперед умеръ, тогды тотъ можеть тую речъ иншому записати, кому воля его будеть. Нижли естли бы тотъ живъ былъ, а он, ему записавшы, и потомъ иншому другимъ записомъ тое жъ записалъ, тогды тотъ першый записъ маеть пры моцы зостати, а последний маеть ни въ во што оберъненъ быти. Такъ тежъ хто бы кому именье, або люди, або земли продалъ, а потомъ бы тотъ же и тое жъ кому иншому продалъ, тогды тотъ, хто первей купилъ, маеть то одеръжати, а тотъ, который опосле купилъ, маеть п[е]н[е]зей своихъ на истъцу смотрети.

Артыкулъ 6.

Хто бы на которую речъ далъ записъ, передъ урядомъ зезнаный, тотъ записъ маеть пры моцы зостати у кождого права.

Тежъ уставуемъ: хто бы хотелъ записъ справовати на которую речъ рухомую, тогды маеть кождый на себе давати листъ записный подъ печатью своею и подъ печатми людей народу шляхетъского, веры годныхъ, принамней трех албо двухъ особъ, и с подъписью руки своее, естли хто писать умееть. А печати до листовъ не на заочную прозбу, ани тежъ за писаньемъ листовънымъ прыкладаны быти мають, але за очевистою устною прозбою. Ведъ же записы таковые кождые, а то естъ меновите, коли бы хто кому именье, люди або кгрунты заставою пустилъ або позычывшы сумы на рокъ, оную суму на именью, людех або кгрунтехъ записалъ, позволившы за неотданьемъ на рокъ сумы увъ именье, люди або кгрунты добровольного увезанья, таковая застава и записы кождый на себе даючы маеть, ставъшы очевисто передъ нами, г[о]с[по]д[а]ремъ, або передъ врядомъ земъскимъ або кгродъскимъ судовымъ где наближъшомъ, сознати и то до книгъ вписати дати. А тотъ, хто закупуеть, тежъ мает листъ свой, противъный тому, у кого закупует, дати подъ печатью своею и с подъписью руки своее, и тежъ под трема або двема печатми люде[й] сторонъныхъ, сознаваючи то, у кого што в чомъ закупилъ. А хто писати не умееть, ино тотъ листъ свой и на вряде сознати маеть. А потомъ, кгды хто засе заставу свою у кого выкуповати будеть, маеть и повиненъ будеть тотъ, хто п[е]н[е]зи свои береть, того квитовати и оный листъ его записный верънути и такъже на томъ вряде и то до книгъ уписати, ижъ ему досыть на тотъ описъ учинено. А естли бы хто, беручи п[е]н[е]зи свои, того листомъ своимъ квитовати и до книгъ так же, яко ему то впередъ было учинено, досыть учыненья его сознати не хотелъ, тогды за припозванымъ [!] на рокъ завитый повиненъ будеть, листъ его записный вернувшы, с того его квитовати и на вряде сознати, и надъ то ещо стороне своей поводовой повиненъ будеть за доводомъ его шкоды и наклады, што бы, позываючи о тое, наложилъ, заплатити. А тотъ тежъ, хто свою властность выкупить, оный противъный листъ ему вернути. А будетъ ли до книгъ записанъ, и в книгахъ то скасовати маеть таковымъ способомъ, то естъ кгды тотъ, который будетъ закупил, сознаеть передъ врядомъ, ижъ се ему во всемъ томъ водлугъ запису досыт[ь] стало, а писаръ у книгахъ подле тое справы на стороне рукою своею власною тое сознан[ь]е и уморенье того запису коли напишетъ, тогды вжо тотъ записъ, хотя и в книгахъ зостанетъ, жадное моцы мети не будетъ.

Артыкулъ 7.

О записохъ, которые мають бытъ у права прыймованы кромъ зезнанья урядового, и о позычкахъ купецкихъ.

Уставуемъ, ижъ таковые листы записные под печатью и с подписомъ руки и под печатми людей, веры годныхъ, яко се вышей поменило, а хто писати не умееть, тогды под печатью его и подъ печатми намней трехъ шляхтичовъ, на суму п[е]н[е]зей або якую речъ рухомую, позычоную на рокъ певный, кромъ позволенья за нимъ увезанья в ыменья або люди и без зезнанья урядового дан[ь]е у права, за моцные прыймованы быти мають. Вед же естли бы былъ тотъ, хто се запишеть, позванъ о невыполненье запису, а хотел ли бы што противъ запису своему мовити або его не прызнавати, тогды тотъ не через прокуратора у права усправедливятися маеть, але самъ повиненъ будеть перед судомъ стати и о то усправедливити. И где бы сторона жалобливая слушне того на него довела и то показала, ижъ то естъ записъ его властъный и от него даный, тогды судъ все водлугъ того запису и обовязъков его на немъ сказати и отправу уделати маеть. А за то, ижъ се запису своего власного запрелъ, виненъ будетъ тотъ вместо вины на том же уряде в замку або дворе нашомъ судовомъ заразъ по выроку урадовомъ сести и шесть недель выседети. А естли бы се то трафило, ижъбы противко запису своему мовилъ, звлаща признавъшися ку печати або подписи руки, менуючи, ижбы мембрам ему не на тую, але на иншую речъ далъ, а въ праве бы былъ листъ написаный, а не мемъбрамъ показалъ, тогды то ему ку помочы ити не маеть и тымъ оного запису бурити не можеть. Тежъ купцы, мещане и жыдове на шляхте рейстрами долговъ никоторыхъ доходити не мають, ани будуть мочы, кромъ за записами певными, яко о томъ наука вышей поменена.

Артыкулъ 8.

О записехъ людей простыхъ волныхъ похожыхъ и на аренъды даныхъ.

Уставуемъ, ижъ естли бы который чоловекъ волный, похожый задалъся за которого пана, а тотъ бы панъ маетностью своею запоможенье якое ему учинилъ, а оный бы чоловекъ на тую маетъность, от пана взятую, листъ, записъ [в оригинале: "зиписъ"] свой доброволный з обовязки, в немъ описаными, под печатми трехъ шляхтичовъ, веры годъныхъ, далъ, таковый записъ у права за моцный и слушный прыймован быти маеть. Вед же люди отчизные, отшедши от пановъ своих и за инъшыхъ пановъ задавшися, хотя бы таковыми описы, вышей меноваными, обовезалися, тогды такие записы у права приймованы быти не мають, и за ними тотъ, кому се опишуть, одержати ничого не можеть. По тому жъ и на оренды мытъ, коръчомъ, млыновъ, роботъ лесныхъ и иныхъ пожитковъ записы даные, яко се у верху того артыкулу описало, у права за слушъные приймованы быти мають.

Артыкулъ 9.

Хто бы под кимъ искалъ близьскости, а тотъ бы деръжалъ именье за записомъ слушънымъ.

Коли бы хто под кимъ искалъ именья, близькости своее и позвалъ бы его до права, а тотъ, под кимъ ищеть, деръжалъ бы тое именье за записомъ слушнымъ, а поведилъ, ижъ не одному мне тое именье належить, але иншымъ участъникомъ моимъ тымъ же записомъ тое именье записано, и показалъ бы то у права речъю самою на ономъ же записе, тогды тотъ, хто именья ищеть, маеть оныхъ всихъ участниковъ припозвати, которымъ записъ служыть.

Артыкулъ 10.

О именье долъжоное и о давность земъскую.

Тежъ уставуемъ: коли бы хто купилъ якое дедицъство и деръжалъ спокойне, заплативъшы, а на томъ же бы именью хто иншый долгъ мелъ, первей врядовне записаный, поки ещо было не продано, а молъчал бы по продажы о тотъ долгъ три лета и правомъ его не доходилъ, таковый хотя бы и листы упоминалные мелъ, тотъ не маеть на томъ именью того долъгу смотрети, але маеть истъцо[в] въ своихъ пенезяхъ искати. А естли бы тотъ истецъ не мелъ чымъ платити, тогды в том долъгу маеть судъ его самого выдати. Нижли естли бы о тотъ долъгъ, такъже врядовне записаный, до права позвалъ того, который именье тое деръжыть, давности таковой не омешкавъшы, тому подлугъ запису его перъшого тотъ долъгъ на томъ же именью маеть быти прысужонъ. А тотъ, который в деръжаньи будеть того дедичъства, оный долъгъ маеть заплатити тому, хто перъшый записъ маеть, а самъ маеть тыхъ пенезей и кождого иного накладу дойскиватися на истъцу. А естли бы тот истецъ, не заплатившы, умеръ, тогды на маетности его лежачой и рухомой, естли которую заставить, того смотрети маеть. По тому жъ и о презыскахъ, з уряду сказаныхъ, на томъ именьи маеть ся розумети, яко и о долъгохъ, естли бы хто давность таковую от сказанья урядового омешъкалъ.

Артыкулъ 11.

О долъги двухъ албо колько на одномъ именью.

Коли бы хто именье закупное в которой суме деръжалъ, а другий бы ся з долъгомъ своимъ ку тому жъ именью приповедалъ, менуючы, ижъ тежъ ему на томъ же именью сума естъ описана або с права была бы сказана, а онъ бы от року, в записе описаного, або от сказанья врядового давности земское десет летъ не замолъчал, а тое бы именье обое сумы стояло, тогды тотъ, который маеть болшую суму, такъ деръжачый, яко и зыскуючый, будеть повиненъ другому меньшую суму заплатити. А пакъли бы платити не хотелъ, тогды тотъ, хто меньшую суму маеть, тому большую суму повиненъ заплатити, або обадва тое именье иньшому в обоей суме заставити и тые пенези межы себе водле записовъ розъделити. А пакъли бы колько долъжниковъ зъ розъными долъги до одного именья збеглися, а именье бы вже за тые долъги не стояло, тогды хто будет мети первъшый слушный и правный записъ и в деръжанью того именья за тым перъшымъ записомъ былъ, а тое бы именье большое сумы не стояло, тогды тотъ за перъшымъ записомъ своимъ при таковомъ именью зостати маеть, а тые з остатъними записы мають пенезей своихъ на истъцу доходить. А где бы истецъ умеръ, тогды на иньшой маетности его.

Артыкулъ 12.

Каждая застава и долъгъ позычоный давности мети не мають.

Хочемъ тежъ мети и уставуемъ, абы каждая застава и долъгъ позычоный давности земъское не мели. И вольно будеть всякому дедичу, отъложывшы суму пенезей, передъ правомъ за заставу дедичъства своего дойти, такъ за правомъ своимъ прирожонымъ и яко кольвекъ набытымъ. Тым же способомъ всякому стану долъговъ своихъ позычоныхъ за описами водле сего статуту справеными на истъцу и потомъкохъ его доходити вольно будеть, хотя бы и черезъ давность земъскую не упоминалъся.

Артыкулъ 13.

О способе доводу заставы именья лежачого, кгды бы хто кого ку бранью пенезей позвалъ.

Тежъ уставуемъ: если бы хто позвалъ кого о именье албо о люди и о кгрунъты, менуючы, ижъбы от продъка его албо и от него самого было заставлено, а позваный бы до заставы не зналъся, ино если жалоба будеть о таковую заставу, которая бы се стала по выданью к утверъженью сее теперешнее поправы статутовое, тогды врядъ промежъку сторонъ в той речы узнан[ь]е и розъсудокъ свой учынити маеть водлугъ сего статуту, яко о томъ вышей доложоно. Лечъ ижъ многие люди звыкли о речы давные застаралые, менуючы заставу, одинъ другого ку праву потегати и тымъ затрудненье сторонамъ и вряду непотребное задавати, прото и о такихъ давныхъ а прошлыхъ заставах такъ объясняемъ и уставуемъ: ижъ кгды бы хто кого о заставу именья лежачого, людей и кгрунътовъ ку бранью пенезей позвалъ, которую бы заставу менилъ быти вчыненою по выданью тому паньству, великому князьству литовъскому статуту одъ продъка нашого славное памети короля его м[и]л[о]сти Жикгимонъта Перъшого, а позваный бы до тое заставы не зналъся, а естли бы то менилъ быть своею властъностью отчызною, матерыстою албо спадъкомъ и якимъ правомъ набытымъ и пры томъ щытилъся и бралъ собе на помочъ давность земъскую, тогды перъвей тотъ, хто в таковой речы жалуеть, маеть то явне и значъне писмомъ слушнымъ водле права показати. Естли то, о што жалуеть, коли в дому и в продковъ его было, тогды за тымъ и ку дальшому доводу правному, ижъ то з дому его або от него самого заставою вышло, прыпущонъ будеть водле права и арътыкуловъ, о правахъ земъленыхъ описаныхъ, звлаща где бы сторона позваная оборонъ правных на писме не показала, а то се маеть розуметь о именье, люди и кгрунты заставные по выданью першого старого статуту. Пакли жъ бы жалобная сторона напродъ того же тое именье, люди або кгрунты, о што позываеть, было коли в дому его, на писме значне водлугъ статутовъ першихъ не показала, але за жалобою згола до присеги бралася, тогды без того и ку доводу на заставу не маеть быти припущона, але тотъ позваный а держачий того именья, людей и кгрунтовъ, при своемъ давномъ держанью, и надъ давность земъскую естли бы якого права на писме не показалъ, маеть самъ одинъ при давности, же то естъ его властъность, а о заставе жадной не ведаеть, присягнуть. А где бы при давности земъской сторона позваная який колвекъ доводъ листовный показала, тогды и без присеги от объжалованья пры держанью своемъ давномъ волна будетъ. Вед же и то варуемъ, если бы хто в такой речи мелъ до кого право, тогды ачъколвекъ вже порядкомъ сего статуту нового вси речи отправованы будуть. Нижли речи застаралые, предсе старымъ статутомъ, за которого ся што стало, сужоны и сказованы быти мають. А для того, абы се нихто неведомостью не вымовлялъ, кождый таковый, хто бы до кого мелъ якое дело, от выдан[ь]я и уживанья сего статуту будетъ виненъ правомъ своимъ того доходити. А где бы до десети летъ от выданья того статуту о таковую заставу давную молчалъ и правне з нимъ не поступовалъ, тотъ о таковую заставу вечне молчати маетъ, вынемъши толко дети летъ не дорослые, с которыхъ, дошедши летъ своихъ, братъ старший або опекун также до десети летъ о таковую заставу виненъ будетъ правомъ чинити, яко вышей описано. А который бы, дошедшы летъ своихъ, до десети летъ в молчанью был, таковый также вечне о то молчати маетъ. По тому жъ хто бы от уфалы статуту старого, от короля его милости Жыкгимонта Першого в року тисеча пятъсотъ двадцать девятомъ выданого, в такой речи ажъ до выданья сего теперешнего статуту в молчанью былъ, упоминанья не чинилъ и до права не притегал, таковый за такъ далекою давностью также о такую речъ до права потегати и того упоминати не маетъ вечными часы.

Артыкулъ 14.

О откладанье сумы за заставу.

Коли бы хто кому именье албо инъшую речъ которую колвекъ в пѣнезяхъ заставилъ на рокъ, в листехъ помененый, а потомъ на оном року припаломъ хотелъ бы ему п[е]н[е]зи его отдати, а заставу свою от него къ собе взяти, а он бы не хотел п[е]н[е]зей своих от него приняти, ани тое заставы ему вернути и поступити, а былъ бы о тое ку праву позванъ ку бранью п[е]н[е]зей своихъ, а онъ бы у права, яко на року завитомъ, не сталъ, тогды жалобникъ покажет ли то, же тую речъ заставилъ, маеть оную суму пенезей на вряде положыти. А врядъ нашъ маеть ему у тое именье его заразомъ увезанье дати и всякую заставу свою кождый з уряду нашого тымъ обычаемъ одержати маеть водлугъ опису своего. А врядъ нашъ потомъ маеть и повиненъ будеть тые пенези вси спольна тому отдати, хто будеть на заставу далъ, кромъ всякого затрудненья, ничого на себе зъ оное сумы не вытручаючи. А где бы хто, будучы до суду позванъ о заставную речъ, а на року прыпаломъ за позвы сталъ, тогды, за доводомъ заставы взявъшы тые пенези свои, оную заставу, именье лежачое жалобнику, ниякою давностью не вымовляючыся, того жъ часу поступити и с того се врядовъне выречы маеть, окромъ вынемшы то, где бы што хто кому заставилъ на рокъ, в листе помененый, а на тотъ рокъ, в листе назначоный, у него не окупилъ. Тогды онъ тую заставу маеть держати ажъ до другого року водлугъ запису его, на то даного. А вед же естли бы тотъ, хто што кому заставилъ, а не выкупившы тое заставы своее, умеръ, тогды дети, албо братья, або близъские, кому бы то правомъ слушнымъ выкупити приналежало, такового року, в листе описаного, не мають смотрети, але скоро бы о тое былъ позванъ, тогды тотъ и безъ року маеть пенези свои взяти, а заставную речъ заразомъ поступити.

Артыкулъ 15.

О долъгохъ; естли бы хто, позычывъшы што кому другому, самъ умеръ, а оный, который позычылъ, жывъ зосталъ.

Уставуемъ: естли бы хто, позычывъшы кому сумы пенезей або якихъ речей рухомыхъ, самъ умеръ, а тотъ долъжникъ, который виненъ, жывъ зосталъ, тогды потомъкомъ позосталымъ оного змерълого водле листу, опису своего тотъ долъгъ продка ихъ платити и всимъ обовязкомъ своимъ досыть чынити повиненъ будеть. А где бы опису своему досыть чынити не хотелъ и в чомъ з него выступилъ або не выполънилъ, тогды во все водлугъ запису своего упадываеть.

Артыкул 16.

О посеганью спадковъ родичомъ по детехъ ихъ.

Уставуемъ, ижъ естли бы хто, маючи якую свою властную маетность набытую, лежачую и рухомую, а никому ее не записавъшы и потомъства по собе, на долъ походячого, также братьи и сестръ рожоныхъ не зоставившы, умеръ, а отецъ або матка обое або одинъ з нихъ жывъ зосталъ, тогды по змерломъ сыне отец або матка оного змерлого таковые спадки мают посегати. Так же и по змерлой дочце безъ потомъства тое жъ се розумети будеть, которая бы свою властную маетность або от мужа записаную по собе зоставила, никому не записавшы.

Артыкулъ 17.

О привильяхъ и иньшыхъ вшелякихъ записехъ, яко ихъ жоны, зоставшыся по мужохъ, ужывати мають.

Уставуемъ, ижъ естли бы хто який прывилей або записъ на дар, на продажу або тежъ на якую жъ кольвекъ речъ одеръжалъ з докладомъ того, яко посполите в листехъ пишуть, даруючы або продаючы самому, жоне, детемъ и потомъкомъ его, за чымъ таковыхъ жоны, зоставившыся по мужохъ, половицы оное речы, в привилею або записе описаное, позыскуючы ку шкоде детинъной або близъскихъ, посегати хочуть, тогды таковая жона, есътли бы особливымъ записомъ того от мужа записаного не мела, хотя бы и имя ее поменено было, ничого одеръжати водле такого запису не можеть, але то на потомъки спасти маеть, окромя где бы в томъ записе доложоно было, же ему, жоне его за сполъные ихъ або за ее властные пенези оное именье проданое або обема сполъне дарованое было, тогды то водле запису заховано быти маеть.

Артыкулъ 18.

Где бы хто, кому давъшы на себе записъ, а в томъ не уистивъшыся, зъмеръ.

Уставуемъ: естли бы хто кому листомъ своимъ добровольне ся описалъ будь продажы вечыстое на именье албо на рухомую речъ, также и на заставу, позычку и паруку, а тотъ бы записъ былъ слушный, подлугъ сего статуту былъ справленъ, и в том бы записе его были обовязъки доброволъные на заплату сумы пенезей истизны, совитости, шкодъ, накладовъ, винъ и тежъ очыщанье и заступованье у суду албо и о паруку якую и о инъшые розъные речы и припадъки о што жъ кольвекъ, а тому бы запису своему тотъ досыть не учынившы и всихъ обовязковъ своихъ добровольныхъ, в немъ описаныхъ, не выполънивъшы, с того света вжо по року, в записе его менованомъ, зъшолъ, а дети бы его по немъ зостали, на которыхъ бы по смерти его маетность рухомая и лежачая спала.

А тотъ, хто бы записъ на то собе даный мел, по смерти оного жону, дети або близскихъ его, хто бы по смерти маетъность его мелъ подлугъ запису того, яко о самую речъ, в томъ листе описаную, также и обо всякие обовязки, доброволне в нем описаные, о невыполнен[ь]е того всего до которого вряду позвалъ, тогды если бы тая особа, хто на которую колвекъ речъ долъ [!] записъ, еще за жывота своего былъ позванъ о неучинен[ь]е досыть тому запису и съ права бы то на немъ вжо сказано, а онъ бы в томъ часе змеръ, того всего не заплативъшы, тогды врядъ нашъ, который тое присудить, маеть и по смерти его подлугъ суду своего и доброволного обовязку его стороне поводовой отправу на именью его учинити. А где бы именья не было, тогды на маетности его рухомой уделати маеть, пры комъ бы колвекъ на онъ часъ зостала. А вед же естли бы тая особа змерълая о неучынен[ь]е досытъ запису своего хотя бы былъ до которого вряду позванъ и, не стоявши у права, передъ рокомъ за позвы припалыми змеръ, тогды тые, на кого бы по нем маетность его лежачая або рухомая правомъ прирожонымъ спала, повинни будуть, естли о суму п[е]н[е]зей позычоную позовуть, истизну из совитостью заплатити; естли о очищен[ь]е позвани будуть, тогды так же потомки его подле запису продка своего з маетности его, на нихъ спалое, очыщати мають, а шкод, накладовъ, зарукъ, винъ и иньшыхъ обовязъковъ, в томъ листе описаныхъ, ничого за тое платити вжо не будуть повиньни, кгды жъ нихто ни за кого теръпети не маеть, так же и на другого тежару своего въскладати не можеть, одно самъ тот, хто се кому в чомъ опишеть, повиненъ за тое досыть учынити. А где бы о тое не будучы еще до права позваный або передъ рокомъ, в листе его описанымъ, змеръ, тогды большъ не маеть платити, одно истизну, ему позычоную, а совитости, винъ и накладов — ничого не маеть платити, окромъ естли бы жона або дети дорослые того змерълого были бы заровно в томъ листе описаны, тогды, не вымовляючисе смертью оного, повинни будуть позосталые особы такому запису своему досыть чинити и вси доброволные обовязки свои выполняти. Вед же естли бы мужъ от жоны змеръ або отецъ от детей, а записомъ своимъ еще за живота своего осталъ бы кому што виненъ, хотя бы вжо и презыски правные на немъ были сказаны, а именья бы своего властивого, такъже никоторое маетности рухомое по собе имъ не зоставилъ, а жона бы его мела свое властивое именье отчизное, материстое, купное, спадъковое, веновное и всякимъ правомъ своимъ набытое, такъ же и дети мели бы свое властивое именье выслужоное, купленое, матерыстое и всякимъ способомъ набытое, а не отчызное, тогды тымъ способомъ за вину и за описомъ отца албо и матки своее якъ дети и близъские, так же и жона того змерълого за то на маетности своей властивой шкодовати не мають и за то ничого платити повиньни не будуть. Одно естли бы отецъ або матъка отумеръли права на який спадокъ, который бы имъ по якомъ близъкомъ прыналежалъ, тогды дети, дошедъшы того спадъку правомъ, по нимъ спаломъ, повинъни з него долъги отцовъские або матъчины платнти, бо хто осегаеть добра, повиненъ носити и беремена.

А естли бы дети албо потомки того спадку доходити не хотели, тогды тотъ, кому бы што было винъно от отъца албо матки ихъ, маеть ихъ позвати до вряду того, до которого ему права [!] его укажеть на рокъ завитый, а врядъ маеть въсказати вжо тому самому жалобнику того спадку доходити, которого кгды дойдеть, маеть в томъ долгу своемъ держати до отдан[ь]я сумы п[е]н[е]зей, ему винъное, и тыхъ накладовъ, што бы, доходечы того спадку, утратилъ за узънаемъ [!] врядовымъ.

Артыкулъ 19.

Рокъ праву о заставную речъ маеть быти положонъ завитый.

Хочемъ мети и уставуемъ, ижъ каждый рокъ, за позвы зложоный о кождую речъ заставную, мает быти завитый под страченьемъ права. А от которого часу будеть позванъ заставникъ о то, же на року, в записе помененомъ, п[е]н[е]зей брати не хотелъ, тогды тотъ, который заставу держить, от того часу не маеть болшъ именей казити и жадныхъ доходовъ и пожитковъ брати. А што бы кольвекъ после положенья позвовъ з оного именья взялъ, о то дедичъ, вшедши в держанье именья, маеть того заставника позвати до права на рокъ завитый и тое шкоды своее доходити. А врядъ повиненъ будеть оную шкоду за доводомъ слушнымъ на власной маетности его сказати и отправу поступкомъ правнымъ учинити. А где бы тотъ зоставникъ не былъ оселымъ в томъ повете, в которомъ оное именье у заставе держалъ, тогды при откладанью п[е]н[е]зей сторона поводовая волна будеть оную суму, на уряде положоную, арештовати. А врядъ не будеть волень тое сумы отдавати, ажъ се о скаженье такового именья заставного стороне поводовой усправедливить и зъ выналязку урядового судовного досыть учинитъ.

Артыкулъ 20.

Естли бы хто имен[ь]е або якую речъ рухомую заставную другому в болшой суме заставилъ.

Уставуемъ: естли бы хто, маючи от кого в заставе имен[ь]е або которую речъ рухомою, в большой суме тую заставу кому иньшому завел, а держачий тое речи былъ бы о то припозванъ ку бранью сумы пенезей, которую онъ або продокъ его будетъ на тую речъ взялъ и передъ правомъ тую суму положилъ, и того слушне записомъ довел, ижъ не в болшой суме, толко в той, которую на праве положилъ, тая речъ заставлена, таковый, п[е]н[е]зи отдавши, речъ свою маеть взяти, а тотъ, который на чужую речъ болшую суму дасть, на истъцы нехай собе того смотритъ, што будетъ назвышъ первое сумы дал. А где бы се трафило о заставу речи рухомое, на которую бы записов жадныхъ не было, а споръ бы межи обудву сторонъ по тому, яко вышей описано, о суму п[е]н[е]зей сталъ, тогды держачый тое заставы близъшый будеть присегою того довести, же таковою суму, якую меновати будеть, на тую заставу далъ, за которимъ доводомъ, п[е]н[е]зи свои одержавшы, заставу вернути маеть.

Артыкулъ 21.

О именье заставное на рокъ подъ страченьемъ.

Естли бы хто кому заставилъ именье на рокъ подъ страченьем и на упадъ, тогды, естли бы рокъ пришолъ, а тотъ, хто заставил именье, а на тотъ рокъ не могъ выкупить, тогды тотъ, хто закупилъ, по ономъ року при томъ именью водле права своего зостати маеть вечне. Вед же естли бы тотъ истецъ, которий именье заставилъ, передъ рокомъ, на выкупенье оного именья записаннымъ, умеръ, тогды потомъ, хотя бы и оный рокъ записный минулъ, волно будетъ потомъкомъ або близскимъ его, отложившы суму пенезей, тую заставу одержати.

Артыкулъ 22.

О отнятье именья заставного.

Тежъ уставуемъ: естли бы хто кому заставилъ именье або люди, або кгрунъты въ якой колвекъ суме пенезей на певный рокъ, в листе описаный, а потомъ на року припаломъ, не заплативши и не отдавши ему тое сумы, тое бы именье, люди або кгрунъты и, што бы колвекъ заставилъ у него, упорне и свовольне отнялъ, а того бы на него слушне сторона довела, тогды маеть тому кгвалту заплатити дванадцать рублей грошей и вси заруки, в листе своем описаные. А колко бы людей заставных ему за отнатьемъ [!] его не робило, тогды за кождый тыдень неслужоный маеть заплатити от кождое службы людей зуполное по шести грошей литовских. А которая бы служба пешая на тыден на роботу не ходила, ино по три гроши платити маеть. А инъшые всякие добра и пожытки оного именья отнятые водлугъ слушного а правного доводу и важности пожытковъ маетъ врядъ нашъ тую шкоду совито всказати и противъ такого маеть сторону жалобливую заховати, яко о томъ вышей, в розделе четвертомъ арътыкуле деветъдесятъ второмъ, о выбит[ь]е з покойного держанья, наука описана есть. А естли бы хто кому што заставил — именье, люди або кгрунъты, а зъ стороны хто третий за якимъ бы колвекъ правомъ албо и з упору с тое заставы што отнялъ, тогды тотъ, кому будетъ то отнято, похочет ли позвати того, хто ему заставилъ, тотъ маеть ему очыщати водлугъ запису своего, а не очыщит ли, ино такъ много можными людми из землями маетъ ему тое нагородити. А похочет ли, опустившы того, который ему заставилъ, с тымъ, хто у него отойметь, у права мовити, тогды то ему волно учинити и на ономъ тое заставы своее доходити. А врядъ нашъ и противъ тому заховатисе такъ маеть, яко в томъ артыкуле вышей наука описана естъ.

Артыкулъ 23.

Хто бы кого позвалъ о именье, а позваный заводъцу у права ставилъ.

Уставуемъ, ижъ естли бы хто позвалъ кого о именье, менечы до него быть право прырожоное або набытое, а тотъ, кого позовуть, ставилъ бы на праве заводъцу, который ему тое именье продалъ або якимъ колвекъ правомъ завелъ, а кгды бы тотъ заводъца его заступилъ, а позваный, поставившы заводъцу, хотелъ бы с права прочъ пойти, тогды в таковой речы яко тотъ заводца, такъ и позваный о тое именье с права отходити не мають потоль, ажъ се тотъ заводъца его з жалобною стороною росправит. И кгды бы се то показало с права, же тотъ заводъца неслушне чужое именье пустилъ, тогды тое именье тому, хто ищеть за правомъ его, слушне показанымъ, прысужоно быти маеть, а он своихъ пенезей и шкодъ на заводцы смотрети будеть. И если оселый заводца в томъ повете албо и въ инъшихъ поветехъ сего паньства, великого князъства литовъского будеть, тогды такого позвы позвати з оселости его о суму и о шкоды свои воленъ будеть. А естли бы былъ неоселый, тогды тамъ жо заразомъ тотъ судъ, не спускаючы его з уряду, справедливость з него чинити будеть повиненъ тымъ способомъ, яко о неоселыхъ в ыншомъ арътыкуле естъ описано.

Артыкулъ 24.

О листы на долги, на именья и на заставы згинулые.

Тежъ уставуемъ: кому бы листы на долги, на заставы речей рухомыхъ, вед же не на важнейшую речъ, толко до двухъсотъ копъ грошей, згинули на дорозе где жъ колвекъ, от огню або от воды и яким колвекъ обычаемъ страчоны, а тотъ, кому тые листы належали, скоро того жъ часу по оной згубе перед нами, г[о]с[по]д[а]ремъ, або перед врядомъ оповедалъ и записати далъ, а потомъ прышло бы ку праву, а тыхъ бы листовъ за очевистымъ зезнаньемъ у которомъ уряде записаныхъ не было, тогды тотъ, хто листы стратил, або кому тые листы прислушають и належать, маеть довести людми добрыми, веры годными, намней двема, которые листы видели и их сведоми были або печати свои до них прикладали. А потом сам с тыми светками своими на том прысегнути мает, светки на том, же тот лист або тые листы видели, а самъ на томъ, же такие листы згинули прыгодне. И кгды того доведеть людми добрыми и прысегою ихъ и своею, маеть оную речъ, на шъто листы згинули, одеръжати. А где бы печатники або тые люди, которые тые листы видели, померъли, тогды, пры оповеданью врядовомъ самъ прысегнувъшы, речъ свою одеръжати маеть.

Артыкулъ 25.

Естли бы колько паръсунъ однымъ листомъ кому кольвекъ описалися.

Уставуемъ тежъ: естли бы колко перъсонъ однымъ листомъ кому колвекъ описалися, а потомъ бы которые з нихъ тотъ записъ свой нарушили, а другие бы его предъсе водлугъ обовязку своего выполняли, тогды сторона укрвжоная [!], которой тотъ записъ служить, можеть толко таковыхъ позывати, от которыхъ се надъ тотъ описъ ему кривда дееть, до вряду того, где будеть належати або где се будуть описали, становити, и не докладаючы тыхъ на позве, от кого крывды не мають, а сторона тымъ ся вымовляти не будеть мочы, ижъ другихъ не позвано, которые се споломъ з нимъ описали, кгды жъ от тыхъ сторона жалобливая никоторое кривды мети будеть [!]. Але кождый самъ за свой учинокъ и выступъ у кождого права отповедати и водъле опису своего або продковъ своихъ, естли бы што на него прыходити мело, досыть от себе и щасти [!] своее стороне укривжоной чинити маеть и повиненъ будеть.

Артыкулъ 26.

Якъ много без листу вызнаного маеть позычити.

Уставуемъ, ижъ кождый шляхтичъ, мещанинъ и нихто инъшый не маеть безъ листу вызнаного позычати большей десети копъ грошей. А хто бы большую суму пенезей безъ листу вызнаного позычылъ и на то листу не мелъ, тогды тотъ, хто большей безъ листу далъ, пенези тратить, а тотъ, который позычылъ, не повиненъ большей платити, только десеть копъ грошей, и то за присегою оного, хто на немъ тыхъ пенезей доходить правомъ.

Артыкулъ 27.

Хто бы якую речъ рухомую запродалъ на рокъ.

Естли бы хто кому зоставилъ рухомую речъ на рокъ на впадъ тое речы, а коли бы рокъ прышолъ, а тотъ, хто заставилъ, не выкупилъ тогды тотъ, хто закупилъ, оповедавъшыся вряду, можеть тые речы обернути куды хочеть ку своей потребе на вечность.

Артыкулъ 28.

О речъ рухомую в заставе до часу певного, а не на упадъ.

Уставуемъ: кгды бы хто кому якую реч рухомую заставил до часу певного, а не на упадъ, а на тотъ бы часъ назначоный не окупил, а тотъ бы, маючы заставу, и позвалъ бы того, абы заставу свою выкупилъ, а онъ бы тое заставы окупити не хотелъ, тогъды врядъ маеть ему допустити тые речы рухомые продати, и што бы звышъ надъ оную суму свою за тую заставу взялъ, тогды, вытрутивъшы с того собе за накладъ свой, што будеть позываючы его наложылъ, остатокъ тому, чые были речы, отдати маеть. А тотъ, не прыводячы стороны своее до прысеги на томъ, што ему дасть, повиненъ будеть порестати [!] и болшей ся за тые речы свои не упоминаючы. А где бы безъ року тая застава была заставлена, тогды врядъ маеть рокъ зложыти чотыри недели, на который маеть заставу свою выкупити. А не выкупит ли на тотъ рокъ, тогды по ономъ року тым жо способомъ, яко вышей описано, мають о тую заставу росправитися.

Артыкулъ 29.

Хто бы кому коня або вола заставилъ безъ року.

Тежъ естли бы хто кому заставилъ коня або вола безъ року и на рокъ, а в томъ часе, поколь оное заставы не окупить, тот конь або волъ здохнеть безъ прычины ображенья, ижъбы, робечы имъ, не поръвалъ и не забилъ або голодомъ его не уморилъ, тогды такового коня або вола платити не повиненъ, толко скуру указати и отдати ему маеть. А тотъ, взявъшы скуру, повиненъ будеть только половицу тыхъ пенезей позычоныхъ стороне своей отдати.

Артыкулъ 30.

О речахъ заставъныхъ, зъгинулыхъ в чиемъ схованью.

Уставуемъ тежъ: хто бы кому хотелъ речы рухомые заставити або в захованье дати, тогды на таковые речы на обе сътороне для упевненья листы межы себе под печатми своими и печатми людей добрыхъ маютъ давати. А где бы тые речы, в заставе або в захованью будучые, посполу в одномъ кгмаху з речъми домового г[о]с[по]д[а]ра пригодне огнемъ погорели або покрадены, а он бы то вряду, под которымъ седитъ, тогды жъ оповедалъ, и къ тому будет ли еще при тыхъ речахъ и властивое маетности его што украдено або згорело, тогды маеть самъ на томъ присягнути, ижъ оныхъ речей не скорыстилъ и ку пожитъку своему ничого не обернулъ. За таковымъ отприсеженьемъ ма быт[ь] волен. А пакли бы поведилъ, же толко того речы, хто далъ сховати, згорели або покрадены, а оного г[о]с[по]д[а]ра самого целы, таковый тые речы вси повиненъ оному вернути або заплатити. А естли в суме п[е]н[е]зей заставлено, ино пенези взяти, а тые речы предъсе вернути, на што слушный доводъ учынитъ. Такъ тежъ естли хто у кого зложилъ в клети або въ якомъ схован[ь]ю речы свои и замъкнул, а домовый г[о]с[по]д[а]ръ тые речи в небытности его рушалъ або на иншое местъцо перенесъ, а в томъ бы се шкода стала, тогды тотъ, хто рушалъ, маетъ тую всю шкоду платити тежъ за слушным доводомъ або присегою оного шкодного. А где бы се то трафило, жебы без листовъ хто кому речи якие в заставу, в захованье або быдла на перехованье далъ, а тотъ, в кого бы што заставлено, або в захованье, або тежъ на перехованье дано, до того се не зналъ, тогды не згола маеть быти воленъ, але повиненъ будетъ на томъ присягнути, яко того от него не мелъ. А пакъли бы в чыем схованью таковые речы взяты были от кого кгвалтомъ, тогъды на объжалованомъ тотъ, у чыемъ охованью [!] было, доходити ихъ маетъ. А навезка таковыхъ речей тому, чыя была властъност[ь], з самого истизъного от того, у кого взято, зыскавъшы, вернена быти маетъ.

Артыкулъ 31.

О заповеданью речей рухомыхъ, в захованью чыемъ будучыхъ.

Уставуемъ: где бы хто неоселый речы свои рухомые далъ кому в захованье, а инъшый, з стороны доведавшысе о тыхъ речахъ в захованью, приповедалъся ку тымъ речамъ, менуючи, ижъ тотъ исътый, хто тые речы зложилъ, ему должонъ, тогды тотъ г[о]с[по]д[а]ръ маетъ тые речы за заповеданьемъ врядовымъ учыненымъ у себе мети, а ихъ не выдавати до росправы до певного часу, надалей от часу арештованья за две недели, въ которомъ часе тотъ, хто оные речи заповедалъ, маетъ ся з нимъ передъ врадомъ тымъ, под которымъ тые речы заповедалъ, росправити. Ведъ же естли бы се то на праве показало, ижъбы без жадное слушное причины невинъне приводечы ку шкоде сторону противную, тые речы его арештовалъ, тогды урядъ, передъ который ся тая справа приточытъ, маетъ тому тые речы заарештованые водле уваженья своего и подле часу, особы и далекости дороги шкоды на том, который речы невинне арештовалъ, сказати и отправу вделати. А ведъ же оселого маетность нигде арештована быти не мает, а где бы, заарештовавъшы, в тыхъ дву неделяхъ росправы не принемъшы, самъ прочъ от[ъ]ехалъ, ино тые речы, которие заповедалъ, маютъ оному выданы быти, чые суть. А тотъ г[о]с[по]д[а]ръ домовый никоторое трудности и шкоды поносити не маетъ.