Его м(и)л(о)сть, панъ, казалъ тые листы записати в книги его м(и)л(о)сти, што тые бояре Мойжонъ Радивиловичъ, Томошъ Воитковичъ, Шчепунъ Даркойтис покладали перед его м(и)л(о)стью. А тые бояре земли Жомойтское, Медикянское волости, которые ся такъ в собе мають <...> [см.: d052] А другий листъ ихъ же:

      Отъ великого князя Жыкгимонта старосте жомойтъскому пану Монтовъту.
      Жаловали намъ жомоит Первоинова чадъ з Мединьковъ, и грамоту н(а)шу положыли передъ нами, Кгойлимину писаную, што велели есмо были дванадцати жомойтиномъ дати по чоловеку. И Кгойлиминъ, дей, и инымъ подавалъ, а инымъ не далъ.
      И мы тую грамоту н(а)шу, Къгойлимину писаную, к тобе послали есмо, в сей  нашой  грамоте, в которой  имена тое жомойти пописана. И ты бы сед  с тивуны, з бояры, досмотрелъ, которымъ будеть Кгойлиминъ подавалъ, тым  не надобе давати, а которымъ будеть Кгойлиминъ не далъ, тымъ бы есте подавали по чоловеку, обыйскавъ таковъские, штобы ся годили, штобы не путные, не данные, не куничники, а на [sic] такие, што на наше сено идуть, какъ же и въ той  грамоте, с тои жъ, што къ Кгойлимину писана.
      А в¹ дрецкихъ² дали есьмо той  жомойте Якуба Довойновича, которыхъ людей  вы обыйшчете, што ся будеть годити той  жомойти дати, он  бы имъ подавалъ.
      А Первоинъ самъ просилъ у нас  собе чоловечъка, а на ймя Шниркшетивича. Будеть ли ся ходити³, а ты бы ему того и далъ, ажъ будеть не путный, не данникъ а не куничникъ.
      Псан  у Троцехъ, в неделю, июля десятый день.

¹ Буква "в" под титлом. ² Дрецких: так в рукописи, следует читать "децких". ³ Ходити: так в рукописи, следует читать "годити".