Wir Jagal, von Gotis gnaden grossir konig czu Littowen, und wir Skirgal, herczog czu Tracken, gebruder, allen kegenwortigen und czukunftigen, dy dessen briff ansehen, lesen adir horen grus und heil und dy warheit czu dirkennen desir undirgeschrebner dinge.
      Wandt dy beweisunge der werke czeichene sint der lybe, des han wir angeseen fruntlich beweysunge – rath, hulffe, arbeit und mancherleye müe, dy die erbern geistlichen bruder des Ordens des Dutschen huses von Ierusalem czu Prussen und czu Lieffland, uns und den unsern mit libe und mit gute bewiset haben, des wir uns ouch noch allewege czu in seyn vormuten.
      Hirumb so haben wir mit wolbedochtem mute, frey unbetwungen und mit rathe metewissen und volbort unser liben muter Julianne, der grossen koniginnen czu Littowen, und dessir undirgeschrebener unsir bruder, alse Cariebut, Langwenne, Carigal, Wigant, Swetregal, und unsers getruwen rathes, gegeben den vorgenanten erbern geistlichen brudern und yrem ganczen Orden alle dy land und jegenoth besaczt und umbesatczt czwisschen des Ordens landen, und der Dobyes gelegen, anczuheben am mittelstrome der Dobissen, als sie in die Mymmel vellet, uff czu gehen bis dar sy czum ersten entspringet mit allem nutcze, hirschaft, vreyheit, mit allem frommen und rechte ewiglich frey czu besitczen gleicherweis als sy yre ander land besitczen.
      Und wir vorczeien uns ouch do mete und unsere rechte erben und nochkomelinge allirley ansproche allir herschaft eygenschaft und rechtis geistlichs und wertlichs, dy uns adir unsern nachkomenden czu frommen und czu nutcze mochten komen, dy wir an dem lande haben gehat adir haben mochten.
      Czu ewigem gedechtnisse dessir dinge han wir unsere ingesegele an dessen brief lassen hengen, der uff Dobyssen werder gegeben ist, in den jaren unsers Herren tusent dreyhundert im czwey und achczigsten jaren, in Allir Heiligen obinde.
      Geczeug sint unsere liben geborne bruder hirnachgeschreben: Cariebut, Langwenne, Carigal, Wygant, Swetregal; und Hannike, burger czur Wilne, unser getruwer diner.