Nos Jagalo, divina deliberacione magnus rex vel dux Litwanorum¹, Russieque dominus et heres, universis, ad quos presens littera fuerit devoluta, publice recognoscimus et fatemur, quod cum magnifico viro et religioso domino Conrado, magistro generali dominorum cruciferorum Ordinis sancte Marie Theutonicorum, convencionem in insula iuxta fluvium Dobisse antiquo more nostrorum antecessorum in vigilia Corporis Christi presentis anni decrevimus celebrare, die igitur nobis in simul convenientibus primevam consuetudinem nostrorum predecessorum parte ab² utraque rememorantes vel tenentes infra convencionis eiusdem intervallum quam diu inter nos existit³ et post penultimam diem eiusdem convencionis id est in recessu nostrorum⁴ utrorumque octo dierum treugas pacis et securitatis inter nos constituimus inviolabiliter conservare.
      Easdem treugas pacis promittimus fide nostra cum omnibus nostris hominibus nobis subiectis Littwanis et Ruthenis quovis dolo et fraude procul motis constanter et firmiter observare et ut eedem treuge inter nos rite⁵ conserventur, sigillum nostrum presentibus duximus appendendum.
      Actum et datum anno Domini⁶.

¹ В издании хроники Л. Давида (Э. Гениг): Litwinorum. ² Ex. ³ Existat. ⁴ nostro. ⁵ rate. ⁶ etc. У Рачинского конъектура: (1383).