‡ Се ѧзъ кнѧзь великии смоленьскыи Ива|нъ Олександровичь, оунукъ Глѣбовъ, | докончалъ есмь с братомь своимь с мѣ|стерѣмь с ризьскимь, и съ п(и)с(ку)п(о)мь, и с ры|дѣли, и с ратманы, и со всѣми рижаны, | што подъ его рукою.
      Докончалъ есмь | по дѣда своего докончанью и по стары|мъ грамотам.
      Докончалъ есмь по то|му докончанью, како то брат мои старѣ|ишиї Кедименъ докончалъ и его дѣти | Глѣбъ и Алкердъ.
      Ездити немцемь в домъ | С(вя)тѣи Б(огороди)це и ко мнѣ, а мнѣ блюсти, какъ и своег | смолнѧнин. А моимъ ездити в Ригу, а мѣсте|рю и ратманомъ блюсти моег смолнѧнин, | какъ своег немчина.
      А приездили ко мнѣ | на докончанье из Риги ѡт местѣрѧ Пь|сковъ, Б(ож)иї дворѧнин, а ѡт ратманъ Иванъ | папъ.
      На том на всѣмь цѣловалъ есмь кр(е)стъ к брат къ своему к мѣстерю, а они цѣло|вали ко мнѣ кр(е)стъ мѣстеревою д(у)шею | и п(и)скуплею.

На обороте запись: Der Smolensker Fürsten Iwan Alexandrowitsch... confirmation denmals vor Riga mit lifländische Herrnmeister und der... A^o 1228 (почерком XVIII в.).

       Что сѧ дееть по веременемь, то ѡтидеть по веременемь. Приказано будеть добрымъ людѣмъ, а любо грамотою оутвьрдѧть, како то буде|ть всемъ ведомо или кто после жывыи останеть сѧ.
      Того лѣт, коли Алъбрахтъ, вл(а)д(ы)ка ризькии, оумерлъ, оуздумалъ кнѧзь смо|леньскыи Мстиславъ Д(а)в(и)д(о)въ сс(ы)нъ¹, прислалъ оу Ригу своего луцшего попа Еремьѧ и с нимь оумна мужа Пантелѣѧ изъ | своего города Смольнска. Та два была посломъ оу Ризѣ, из Ригы ехали на Гочкыи берегъ тамо твьрдити миръ.
      Оутвьрдили | миръ, что было не мирно промежю Смольнска и Ригы и Готскымь берегомь, всемъ купцемъ.
      Про сеи миръ трудили сѧ добрии людие: Ролфъ ис Кашлѧ, Б(о)жии | дворѧнинъ, Тумашь смолнѧнинъ, аже бы миръ былъ и до века. Оурѧдили пакъ миръ, како | было Русии любо и всему латиньскомоу ѧзыку, кто оу Русь гостить, на томь миру, аж бы твьрдъ былъ миръ, тако было кнѧ|зю² любо и рижаномъ всемъ и всему латинскому ѧзыку, и всемъ темъ, кто на оустокъ морѧ ходить, аж бы налезлъ правду, то напсати, | како то дѣржати Руси со латинскымь ѧзыкомь и латинскому ѧзыку со Русию то держати. Аж быхомъ что тако оуцинили, того | Богъ не даи, аж бы промежи нами бои былъ, а любо ч(е)лов(е)ка оубиють до см(е)рсти³, како ч(е)лов(е)ка то ѡтплатити, аж бы миръ не розрушенъ былъ: | тако плати⁴, како то бы обоимъ любо было.

      Зде починает сѧ правда.

      [1a] Аже будеть свободныи ч(е)лов(е)къ оубитъ, 10 гривенъ серебра за голов. |
      [1b] Аже будеть хотелъ погубити, 1 гривна себра⁵ платити.
      [1c] Оу Смоленске тако платити, и оу Ризѣ, и на Гоцкомъ березѣ.

      [2] Око, рука, нога | или ино что любо, по пѧти гривенъ серебра ѡт всѧкого платити: за око 5 серебра, за руку 5 серебр⁶, за ногу 5 серебра и за всѧкыи сустав 5 себра⁷. | За зубъ 3 серебра. И Смоленске, и оу Ризѣ, и на Гочкомь березѣ.

      [3a] Кто биеть друга деревомь⁸, а будеть с нимь⁹ любо кровавъ: полъторы серебра платит | ему.
      [3b] По оухоу оударить: 3 ч(е)твьрти¹⁰ серебра.
      [3c] Послу и попу что¹¹ оуцинѧть: за двое того оузѧти, два платежа.
      [3d] Аже кого оурѧнѧть¹²: полъторы гривны | серебра, аже будеть без века. То платити оу Ризѣ, и оу Смоленске, и в Ризѣ, и на Гочкомь березе.

      [4a] Аже извинит сѧ русинъ оу Ризѣ или на Гочкомь | березе, оу дыбу его не сажати.
      [4b] Аже извинит сѧ латининъ оу Смоленске, не метати его оу погребъ. Аже не будеть порукы, то оу зельза | оусадите.

      [5a] Аже латининъ дасть русину оу дологъ товаръ свои оу Смоленске, заплатити¹³ немчину первее, хотѧ бы иному кому | виноватъ былъ русину.
      [5b] Тако оузѧти русину оу Ризе и на Гоцкомь березе.

      [6a] Аже розгнѣвает сѧ кнѧзь на своего ч(е)лов(е)ка, а будеть вино|ватъ немчицю русинъ, а ѡтиметь кнѧзь все¹⁴, жену и дѣти оу холопство: первое платити ему латинину, а по томь кнѧзю¹⁵ ка|ко любо своимь¹⁶ ч(е)лов(е)к(о)мъ.
      [6b] Таку правду взѧти русину оу Ризе и на Гоцкомь березе.

      [7a] Аже латининъ дасть кнѧжю холопу во заимъ или и|ному добру ч(е)лов(е)коу а оумр(е)ть, не заплативъ, а кто емлеть его останокъ, тому платити немчину.
      [7b] Такова правда оузѧти роуси|ну оу Ризе и на Гоцкомъ березе. |

      [8a] Роусину не оупирати латинина однемь послухомь, аже не будеть двою послуху – одиного не|мцича, а другого русина, добрыхъ людии.
      [8b] Тако латининоу не перепрети русина, аже не будеть послуха русина, а другого¹⁷ немцина | оу Ризе и на Гоцкомь березе.

      [9a] Русину не вести латинина ко железу горѧцему, аже самъ восхочеть.
      [9b] А латинину тако русина | не вести, аже самъ восхочеть.

      [10a] Русину не звати латинана¹⁸ на поле бит сѧ оу Русьскои земли. А латинину не звати русина на поле бит сѧ | оу Ризе и на Гоцкомь березе.
      [10b] Аже латинскыи гость биет сѧ межи собою оу Рускои земли любо мецемь или деревовомь¹⁹, кнѧ|зю²⁰ то не надобе, сами межю собою судити.
      [10c] Тако аже рускыи гость биет сѧ оу Ризе или на Гочкомь березе, латине то не надо|бе, атъ сами промежи [...]²¹ оурѧдѧт сѧ.

      [11a] Аже застанеть русинъ латинского ч(е)лов(е)ка оу своие жены, за то платити 10 серебра.
      [11b] Таѧ правда | дати русину оу Ризе и на Готскомь березе, платити.

      [12a] Аже латинскыи ч(е)лов(е)къ оуцинить насилие свободне жене, а будеть переже на не|и сорома не было, за то платити 10 серебра.
      [12b] Таѧ правда русину взѧти оу Ризе и на Гочкомь березе.
      [12c] Аже²² будеть первее на неи соромь былъ, взѧти е²³ гривна серба²⁴ за насилие.
      [12d] Аже насилуеть | робе, а | буду|ть послу|си²⁵, дати | ему грив|на сереб|ра²² [...]²⁶.

      [13] Аже межю русиномь и лати|нскомъ свѧжеть другъ друга без вины, за то платити гривны²⁷ 3 серебра.

      [14a] Аже будеть русиноу платити латинскому, а не во|схоцеть плати²⁸, то ть латинскому просити детского оу тиуна.
      [14b] Аже дасть наемъ детскому, а не исправить товара оу русина | за 8 днии, тъ ть дати ему на собе порука.
      [14c] Аже смолнѧне не²⁹ дадуть ему воле, смолнѧномъ самымъ платити долгъ тъ.
      [14d] Таѧ правь|да оузѧти русину оу Ризе и на Гоцкомь березе.

      [15] Аже тиоунъ оуслышить латинскыи гость пришелъ, послати ему люди с колы | перевести товаръ, а не оудержати ему. Аже оудержить, оу гом³⁰ сѧ можеть оуцинити пагуба.

      [16a (18a)] Которыи волочанинъ возметь ла|тинскыи товаръ чересъ волокъ вести, а что погыбнеть ѡт того товара, что ему приказано, то платити всемъ волоцаномъ.
      [16b (18b)] Та пра|вда оузѧти Руси оу Ризе и на Гоцкомь березе.

      [17a (19a)] Аже латинскы³¹ придеть ко городу, свободно ему продавати, а противу того не молви|ти никому жь.
      [17b (19b)] Тако делати Руси оу Ризе и на Гочкомь березе.

      [18a (20a)] Аже латинскыи оусхоцеть ехати и-Смоленска со своимъ товаромь | во ину сторону, про то его кнѧзю не держати, ни иному никому жь.
      [18b (20b)] Тако русину ехати из Гоцкого берега до Травны.

      [19a (21a)] Аже руси|нъ купитъ оу латинского ч(е)лов(е)ка товаръ, а возметь к собе, то ть латинскому не взѧти товара на вспѧть, русину тому платити.
      [19b (21b)] Тако русину | не взѧти товара своего у³³ латинского опѧть, платити ему.
      [19с (21с)] Русину не звати латинского на иного кнѧзь³⁴ судъ, лише предъ смоленского кнѧ|зѧ, аже самъ восхочеть, то идеть.
      [19d (21d)] Тако латинскому не звати русина на иныи судъ, лише оу Ригу и на Гочкыи берегъ.

      [20a (22a)] Русиноу не ставити | ти³⁵ на латиниского детского, не ѧвивше старосте латинскому. Аже не слушаеть старосты, то ть можеть на него детского приставити.
      [20b (22b)] Тако ла|тинскому не ставити бирица оу Ризе и на Гоцко³⁶ березѣ.

      [21a (30a)] Латиньскому волно есть оу Смоленске которыи товаръ хочеть, то ть купить безъ пакости.
      [21b (30b)] Та|ко делати русину оу Ризе и на Гоцкомь³⁷ березе.

      [22a (32a)] Латинскому не ехати на воину с кнѧземь, ни со Русию. Аже самъ хочеть, то ть идеть.
      [22b (32b)] Тако рисину³⁸ | не ехати с латинскымъ на воину ни оу Ризе, ни на Гоцкомь березе. Аже хочеть самъ, то ть едеть.

      [23 (33)] Которыи русинъ или латинскыи иметь | татѧ, надъ тимь ему сволѧ³⁹: камо его хочеть, тамо его джеть⁴⁰.

      [24a (34a)] Ни одиному же русину не дати пересуда оу Ризе, ни на Гоцкомь березе. Тако лати|нскому оу Рускои земли не дати пересуда никому же.
      [24b (34b)] Которое орудие доконцано будеть оу Смоленске межю Русию и межи латинскымь ѧ|зыкомь предъ судиѧми и предъ⁴¹ добрыми людми, боле того не починати оу Ризе, ни на Гочкомь березѣ. А что будеть доконцано оу Ризе | и на Готскомь березѣ предъ судиѧми и предъ добрыми людми, того оу Смоленске не починати.

      [25a (31a)] Всѧкомоу латинскому ч(е)лов(е)ку свобонъ путь | из Гочкого берега и до Смоленска без мыта.
      [25b (31b)] Таѧ правда есть Руси и-Смоленска⁴² до Гочкого берега.

      [26 (17)] Како то будеть, како придуть латинскыи | гость оу городъ с волока, дати имъ кнѧгини поставъ цастины. Тиуну на волоче дати рукавице, аж бы товаръ перевезлъ безъ держаниѧ. |

      [27 (24)] Латинскому дати ѡт двою капию воску весцю⁴³ куна смоленскаѧ.

      [28a (25a)] Купитъ⁴⁴ латинскыи гривну золота, дасть весити, дати вѣсцѣви ногата смо|ленскаѧ.
      [28b (25b)] Аже продасть, не дати ничего жь.

      [29a (26a)] Аже латинскыи купить суды сребреныи, дати ему весцю ѡт гривны сребра по ногате смоленскои.
      [29b (26b)] Аже | продасть, не дати ничего жь.

      [30a (27a)] Аже латинскыи купить гривну серебра, дати ему весцю двѣ векши.
      [30b (27b)] Аже продасть, не дати ничего же.

      [31 (28)] Аже лати|нскыи дасть серебро пожигати, дати ему ѡт гривны серебра куна смоленскаѧ.

      [32 (29)] Аже капь, чимь то весѧть, изломлена будеть, а любо лѣгце⁴⁵ | будеть, то ть спускивати обѣ во одино место, что лѣзить оу С(вя)тое Б(огороди)це на горе, а другаѧ оу латинское ц(е)ркви – обѣ ровнати.

      [33a (16a)] Аже латинскыи го|сть смолнѧны⁴⁶ приедеть на волокъ, то ть метати⁴⁷ жеребие, кого на передъ вести ко Смоленску.
      [33b (16b)] Аже будуть⁴⁸ людие из ыное земле, техъ после | вести.
      [33c (16c)] Таѧ правда оузѧти Руси оу Ризѣ и на Гоцкомь березе.

      [34 (36)] П(и)сск(у)пъ⁴⁹ ризкии, масторъ Б(о)жих дворѧнъ и вси земледержци⁵⁰, ти дають Двину сво|бону ѡт верху и до низу оу море, и по воде и по земли. Всему латинскому ѧзыку и Русии – кто правыи купець есть – ѡт морѧ свобоно даемо | есть: кто хочеть по Двине ехати оу верхъ и оу низъ.

      [35a (37a)] Оу кого сѧ избиеть оуцанъ или члънъ, Богъ того не даи, или оу русина или оу неме|цкого, оу техъ волости, кто сю свободу далъ, товаръ его свобонъ и на воде, и на березѣ, бес пакости всѧкому. Товаръ, иж то потополъ, | брати оу место своею дружиною из воды на берегъ.
      [35b (37b)] Аже надобе ему болше помоци, то ть наимуи при послусехъ. Кто былъ ту, то буде|ть послухъ. Что имъ посулишь, то имъ даи, а боле не даи.
      [35c (37c)] Таѧ правда латинскому взѧти оу Рускои земли оу волости кнѧзѧ смоленского, | и оу полотского кнѧзѧ волости, и оу витьбского кнѧ⁵¹ волости.

      Коли сѧ грамота псана, ишлъ⁵² было ѡт Р(о)ж(де)ства Г(о)с(под)нѧ до сего лѣт 1000 лѣт и 200 лѣт | и 20⁵³.
      Подъ п(и)сск(у)п(о)мь⁵⁴ ризкимь проувстъ Ѧганъ, масторъ Волквинъ, Б(о)жии дворѧнинъ, и подъ горожаны ризкими, предъ всеми латинскыми купци. |
      [...]⁵⁵ Регньбодъ, Детѧрдъ, Адамъ; то были горожане на Готскомь березе.
      Мьмьбернь, Фредрикъ, Думбѣ – ти были из Любка.
      Индрикъ Готь, Илдигьрь – та два была изо⁵⁶ Жата. |
      Кондратъ Шхелѣ, оде Ѧганте Кентить – та два была из Муньстьрь.
      Бернѧрь, оде Волъкерь – та два была иизъ⁵⁷ Грюнигь.
      Ермебрехтъ, оде Албрахтъ – та два была из [Дор]тмѧнѧ⁵⁸. |
      Гиндрикъ Цижикъ из Бремень.
      Албрахтъ Слукъ, Бернѧртъ, оде Валтоторъ, оде Алъбрахтъ Фоготь – что были горожане оу Ризе.
      Инехъ много оумныхъ добрыхъ | люди.
      Которыи русинъ или латинскыи противу сее правды поцнеть, того почисти за лихии мужь.
      Сѧ грамота есть выдана на Гоцкомь бѣрезѣ | предъ рускымь посломь и предъ всеми латинскими купци.

¹ Лишнее с под титлом. ² ѧ над строкой. ³ Под титлом лишнее с. ⁴ Так в рукописи. ⁵ Так в рукописи. ⁶ Так в рукописи. ⁷ Так в рукописи. ⁸ в исправлено из м. ⁹ Вместо синь. ¹⁰ Так в рукописи. ¹¹ Между попу и что клякса. ¹² Так в рукописи. ¹³ п исправлено из б. ¹⁴ в исправлено из ж. ¹⁵ н исправлено из а. ¹⁶ съ своимь. ¹⁷ о и г над строкой друг над другом. ¹⁸ Так в рукописи. ¹⁹ Так в рукописи. ²⁰ ѧ над строкой. ²¹ Пропущено собою. ²² Слова аже, серебра и заключенный между ними текст, пропущенный писцом, вписан им в междустрочье и на правом поле. Конец строки обозначается здесь вертикальной чертой. ²³ Вместо еи (см. списки A и B). ²⁴ Так в рукописи. ²⁵ у над строкой. ²⁶ Пропущен пункт e статьи 12. ²⁷ ы исправлено из а. ²⁸ Так в рукописи. ²⁹ н и е над строкой друг над другом. ³⁰ Вместо том. ³¹ Так в рукописи. ³² ис Смоленска. ³³ у над строкой. ³⁴ Так в рукописи. ³⁵ Так в рукописи. ³⁶ Так в рукописи. ³⁷ Левая диагональ м стерлась. ³⁸ Так в рукописи. ³⁹ своя волѧ. ⁴⁰ Так в рукописи. ⁴¹ ъ исправлено из о. ⁴² ис Смоленска. ⁴³ е исправлено из у. ⁴⁴ ъ исправлено из ь. ⁴⁵ л исправлено из п. ⁴⁶ съ смолнѧны. ⁴⁷ b исправлено из а. ⁴⁸ у исправлено из о. ⁴⁹ Под титлом лишнее с. ⁵⁰ ц исправлено из и. ⁵¹ Так в рукописи. ⁵² исшло. ⁵³В дате пропущено и (то есть 8). ⁵⁴ Лишнее с под титлом. ⁵⁵ В рукописи пропущен текст: Сѧ грамота оутверьжена всѣхъ коупецъ печатью. Се ороудье исправили оумнии коупци. Ср. списки A и B. ⁵⁶ У буквы "зело" недописан хвост. ⁵⁷ Так в рукописи. ⁵⁸ Дор уже в 1963 г. не читалось: верхний слой пергамена с ним срезан; восстановлено по списку A.

На обороте записи: 1) Dit is en vthseryfft der breue van Smollenske (почерком XIV в.); 2) Copey | Des Smolensker Recht | vnnd vertrages mitt der | Stadt Riga unnd Gott|land vffgericht A^o 1228 (почерком XVIII в.).